بووبێ ئەسەر
ئەم وەکە کوردێن ژ وەلاتێ خوە حەز دکن و دخوازن ژ بۆنا ئازادی و ئارامییا وی کەڤرەکی دانن سەر کەڤرەکی، تم بەحسا لۆزانا دویەمین دکین. ئەڤە ژی تشتەکی د جھ دەیە ژ بۆ کو لۆزانەکا دن، ب سەرێ کوردان دە نەیێ.
لێ ب قاسی ئەز تێ گھشتمە و من ژێ فێمکریە ئەوە کو مە وەکە ملەتەکێ کورد، رەوشەنبیر و سیاسەتمەدارێن کورد ژ پەیمانا لۆزانێ تشت فێم نەکرنە. لۆما ژی ژ بۆنا لۆزانەکا دویەم نەیێ سەرێ کوردان، دڤێت ئەم یا ئەول باش فێر ببن.
ھەگەر مە لۆزانا ئەول فێمکربا، د ناڤا ڤی سەد سالی دە دا کورد یەکتیەکا خوە ئامادە کن دا کو وەکە دیوارەکێ پۆلا ل ھەمبەر لۆزانا دویەم راوەستن. لێ ھەزار مخابن ئەڤ د ناڤا کوردان دە تونەیە.
دبێژم تونەیە ژ بەر کو ملەتەک و پارتیێن سیاسی ب ھێز و قاوەتا خوە دکارن ل ھەمبەر مەترسیێن تێنە سەرێ وی و گەلێ وی راوەستن. ھەگەر مرۆڤ نە ب ھێز و قاوەت بت، مرۆڤ دێ ببە خوارنا دەولەتێن داگیرکەر.
دێ داگیرکەرێن مە ب ھەر ئاوایی لێ بخەبتن دا کو بکاربن ژ ناڤا ملەتێ کو وی داگیر کریە زلام و پێگرتێن خوە دەرخن دا کو دەما رۆژا وێ ھات، وان ل ھەمبەر ملەتێ وان و ل گۆر بەرژەوەندیێن خوە ب کار بینن.
بەری کو پەیمانا لۆزانێ پێک بهێت ئەتاتورک و ئاقلمەندێن ترکان ب باژار و کۆلانێن کوردستانێ کەتن کو بکاربن ھندەک ئاغا و شێخێن مەزن ل سەر ناڤێ کورد و ترکان برایینیا د ناڤبەرا ھەڤ دا یا مسلمانان، ۆەیدا بکن. ژ بەر ڤێ دڤێت ئەو ب ھەڤرا ل ھەمبەر نە مسلمانان تەکۆشینێ بکن. وان ژ وەلاتێ خوە دەرخن و ھتد.
ب ڤێ یەکێ ب سەرکەتن و ھندەک ژ ئاغا، بەگ و شێخێن مەزن یێن کوردان کرن ئالیگرێن خوە. ب وان دانە زانین و ئەزبەرکرن کو ترک و کورد برایێن ھەڤ یێن مسلمانن. لۆما ژی تەکۆشینا وان یا ب ھەڤرا ل دژی خاچپەرەستان د خێرا وان دەیە.
ھەتا گەلەک جاران میناکا سەلاحەدین ئەیوبی یێ کورد ددا کو ئەو وەکە کوردەکی چاوا ژ بۆنا فرەھبوون و پاراستنا دینێ ئیسلامێ ل ھەمبەر خاچپەرەستان راوەستیابوو، دئانین زمان. ب ڤێ کار و خاپاندنێ د پەیمانا لۆزانێ دە بسەرکەتن. کوردستان ھاتە پەرچەکرن. پشتی وێ ژی ئاغا و شێخێن کوردان دارڤەکرن. وێرانی و کۆچبەریەکا مەزن ئانین سەرێ کوردان.
گۆتن: ئەڤ وەلاتە، ئەڤ ئاخە یا ترکانە. یێن ل سەر ڤێ ئاخێ دژین ترکن. ھەرکەسێ خوە ترک نەبینە دێ هێتە کوشتن و مالا وی د سەرسەرێ وی دە هێت ھلوەشاندن. د ڤی وەلاتێ ترکان دە تەنێ ئەرکەکی کەسێن خوە کورد دبینن ھەیە، ئەو ژی ئەوە کو خولامتیا ترکان بکن. یێن ڤێ ژی قەبوول نەکن ژ ھۆلێ رادبن.
ئەڤە زێدەیی سەد سالانە کو تەکۆشینا کوردان ژی ل ھەمبەر ڤێ زلما کەمالیستان رانەوەستیا. لێ دەما کو کەمالیستان فێم کرن، دێ نکاربن ب کوشتن و وێرانیێ کوردان بقەدینن. ئەو گۆتنا کوردان یا ناڤدار کو دبێژن: “کورمێ دارێ نە ژ دارێ بە، دار نارزە.”
ھەر وەھا پشتی 1965ێ ژ بۆنا وێ گۆتنێ ب جھ بکن. کار و خەباتێن بێ راوەستیان کرن. کەسەکی دایکا وی ترک و بابێ وی کوردەک کو زلم و تەعدا ل دایکا وی یا ترک دکر، پەیدا کرن. وی ژی د شەخسیەتا بابێ خوە دا ژ رۆژا رۆژدا دەست ئاڤێت دژمناتیا کوردان.
دەما کو دەولەتێ ئەو پەیدا کر. کێفخوەش بوون کو وان کەسەکی دایکا وی ترک و بابێ وی یێ کورد کو تەعدایێ ل دایکا وی دکە کو ئەو ژی ژ بەر وێ زلما بابێ خوە بوو دژمنێ ملەتێ کورد. ژ بۆنا کوردان یۆخ و دۆخ (تونە) بکە سۆز دا کاربدەستێن دەولەتێ کو چ ژ دەستێ وی بێ دێ تەخسیر نەکە.
چیرۆکا ڤێ درێژە. ئەڤ ب فرەھی د رۆمانا من یا ب ناڤێ ساپۆ دە ھاتیە نڤیسێن و بەحسکرن. یێ دایکا وی ترک ل سەر زلما بابێ وی زلم ل دایکا وی دکر، بوو دژمنەکی ملەتێ کورد کو داخوازا وی ژ یا دەولەتێ ژی ب ترستر دەرکەت.
دەولەتێ ژی چ ژ دەستێ وان ھات تەخسیر نەکرن. پارە، ھێز و قاوەت دانێ کو وی بکن سەرۆکێ کوردان. کاربدەستێن دەولەتێ 30 سالان ل سەر دەستێن زانا، و پسکۆلۆگێن خوە خەبات کرن. د ئەنجامێ دە پارتیا ل سەر ناڤێ کوردان دامەزراندن، ل سەر دەستێ وی کورد کوشتن و وەلاتێ وان وێران کرن.
ئیرۆ ژی ئەو کار بەردەوامە. لێ ب رەنگەکی دن، ب تاکتیکەک دن. واتە پشتی کوشتن و وێرانیا کوردان، ئیرۆ دبێژن ترک و کورد برانە. یێ بابێ وی نە دیار بوو کو کییە و دایکا وی ترک کو ترکان ئەو کرن سەرۆکێ کوردان ژی تشتەکی ناخوازە.
پرۆژەیا سەد سالان دخوازن ب ڤی رەنگی داویێ پێ بینن. ھەگەر ل باکورێ کوردستانێ یەکیتی و ب ھەڤرەکارکرنا کوردان و پارتیێن وان د بن سیوانەکا نەتەوەیی دە پێک نەیێ، پرۆژەیێ دەولەتێ دێ ل سەر دەستێ عەڤدللا و پارتیا وی و یا دەولەتێ کو ب ھەڤرە دامەزراندبوون، دەمێ ب سەرکەڤە. ل سەر ناڤێ براتیا ترک و کوردان دێ کوردان تونە بکن.
