ئۆجالان هیڤیێن ملله‌تكی بۆ یوتوبیایه‌كا مژه‌وى گوهارتن
ب فه‌رموون دا دو گاڤان بۆ پاشڤه بزڤرین و بزانینن د سالێن هه‌شتێیان و نۆتان دا ئۆجالان چ د گۆت.
د وان سالان دا زۆربه‌ى گۆتن و گۆتار و دانوستاندنێن عه‌بدوللا ئۆجالان ل سه‌ر دامه‌زراندنا ده‌وله‌تا كوردى یامه‌زن بوون، دگۆت: «كوردستان یا كه‌تیه بن ده‌ستێ چار ده‌وله‌تێن داگیركه‌ر و ئه‌ركێ شوره‌شێ ئه‌وه كو ملله‌تى ژ زۆرا ڤان ده‌وله‌تان رزگار بكه‌ت».
لێ ئه‌ڤرۆ ئۆجالان یێ دیرۆكا كوردى سه‌ر و ژ نوو دنڤیسیت، د ڤان نڤیسینان دا وه‌سا خویا دبیت كو دخوازیت ببێژیت كو ئه‌م به‌رى نوكه د دروست نه‌بووین، مه چ ده‌وله‌ت نه‌دڤیان، به‌لكو ئه‌م ل دووڤ دیمۆكراسیه‌ته‌كا ئەبستراکت دگه‌ریاین.
ئه‌ڤ گۆرانكارییا هزرى ئه‌وا كو ل ده‌ڤ عه‌بدوللا ئۆجا‌لانى په‌یدابووى، دهێته ناڤكرن ب توندوتیژییا هزرى یا بیرهاتنان، ئه‌ڤا فه‌یله‌سۆفێ جیهانى (بۆل ریكۆر) ناڤ لێ ئیناى.
توندوتیژییا بیرهاتنان: ئه‌و هزره ئه‌وا شرۆڤه‌كرنێ دده‌ته هزره‌كێ كو خزمه‌تا نوكه بكه‌ت ل جهێ رێز ل راستیێ بهێته كرن.
عه‌بدوللا ئۆجا‌لانى پشتى كو بیره‌وه‌ریێن نه‌ته‌وه‌یه‌كێ ب خوینێ دروستكرین، ئه‌ڤرۆ یێ دهێت و ب زمانه‌كێ نه‌رم شرۆڤه‌كرنه‌كا نوو دده‌ته وان بیرهاتنان ژ بۆ كو بهێنه گونجاندن ل گه‌ل ستراتیجیه‌تا ده‌وله‌تا ترك، هه‌روه‌ك ئه‌و شۆره‌ش هه‌موو ئه‌زموونه‌كا فه‌لسه‌فی بوو.
ل سالا 1991 كورستانى ل باشورێ كوردستانێ شیان حكومه‌تا كوردى دامه‌زرینن و فیدرالیه‌تێ د ده‌ستوورێ ئیراقێ دا بچه‌سپینن. ئه‌ڤ كاره نه‌لژیر دروشمێ (دیموكراسیكرنا گه‌لان) به‌لكو ب پێداگیرییا نه‌ته‌وه‌یى ل سه‌ر كیان و نوونه‌راتى و ده‌ستهه‌لاتا بجهئینانێ.
بۆسنه و هێرسك رزگار نه‌بوون تاكو كیانێ نه‌ته‌وه‌یێ یێ سه‌ربخو رانه‌گه‌هاندى سه‌ره‌راى كۆمكوژییا سربیا.
فه‌له‌ستینى نه‌شیان دانپێدانا سیاسی ب ده‌ست بێخن تاكو رێخستنا رزگارییا ده‌وله‌تا فه‌له‌ستینى رانه‌گه‌هاندین.
باشوورێ سوودانێ كو دهێته ناسكرن (ب كیانێ هه‌له‌وه‌شایى) وه‌ك هاوتایه‌ك مامه‌له دگه‌ل نه‌هاته كرن تاكو ده‌وله‌تا خۆ یا نه‌ته‌وه‌یى رانه‌گه‌هاندى.
ئه‌رێ ما به‌رئاقله كو ملله‌تێ كوردستانى ده‌ست ژ ده‌وله‌تا نه‌ته‌وه‌یى به‌رده‌ت كو خودان دیرۆكه‌كا هزار سالی یه ل به‌رانبه‌ر گۆتاره‌كا چ زه‌مانه‌ت تێدا نه‌بیت ژبلى بێكه‌ڤه‌ژیانه‌كا ب مه‌رج د ناڤا ده‌وله‌ته‌كا چ دانپێدانێ ب نه‌ته‌وا كوردستانى نه‌كه‌ت ؟!.
ل ڤێرده پرسیاره‌كا ئه‌خلاقى دهێته كرن: ئه‌رێ چاره‌نڤێسا سه‌دان هزار خێزانێن زارۆكێن خۆ ژ ده‌ست داین دێ چبن؟
ئه‌رێ چاره‌نڤیسێ وان جانگۆرێن ل چیایێن كوردستانێ و دێرسمێ و وانێ … ئه‌وێن هاتینه سۆتن دێ چبیت؟
ئه‌رێ دێ به‌رسڤ ئه‌و بیت، كو بێژنێ ئه‌م هاتینه گوهۆرین و پێدڤییه هوون ژى خۆ دگه‌ل هزرێن نوو بگونجینن ؟!
هه‌ژییه بێژین، ده‌مێ هزر ژ بیرهاتنان دهێته ڤه‌قه‌تاندن دبیته ژ ده‌ستدان بۆ روومه‌تێ، هه‌روه‌ك فه‌یله‌سۆفێ جیهانى (ئیریك فۆرم) ناڤ لێ ناى.
عه‌بدوللا ئۆجا‌لانى ده‌ست ژ هزرا فه‌لسه‌فا نه‌ته‌وه‌یى به‌ردا و بێى چ به‌دیله‌كێ موقنع به‌رچاڤ بكه‌ت، به‌لكو ئه‌وى هیڤیا ملله‌تكێ گوهارت ب یوتوبیایه‌كا مژه‌وى.
گۆتارا نه‌ته‌وه‌یی نه‌تاوانه، به‌لكو بنگه‌هێ هه‌بوونا ملله‌ته‌كی یه د چار ده‌وله‌تێن داگیركه‌ر دا و تاكو نوكه ئه‌و ملله‌ت یێ به‌رده‌وامه ب دانا جانگۆرییان ژبۆ ئازادییا خۆ.
ڤه‌گوهاستن ژ نه‌ته‌وه‌یبوونێ بۆ دیمۆكراسیكرنا گه‌لان، ژ سه‌ربه‌خۆیێ بۆ رێڤه‌برنا شاره‌وانیا و ژ رزگاربوونێ بو پێكڤه‌ژیانێ، نابیته پێشكه‌فتن، به‌لكو دبیته لێڤه‌بوونا هزرى و بشافتنا دیرۆكێ، ئه‌ڤه ژى قه‌د ب هنده‌ك گۆتنێن سه‌رڤه‌سه‌رڤه یێن مرۆڤایه‌تى ناهێنه بۆراندن.
