د 21-22 تەباخێ دە، ل سلێمانیێ شەرێ ناڤخوەیی یێ ھەری خوینرژ یێ دیرۆکا سیاسی یا یەنەکێ قەومی. پشتی پەڤچوونێ چار دەمژمێران د ناڤبەرا پسمامان دە، لاھور شێخ جەنگی و برایێن وی پۆلات و ئاسۆ شێخ جەنگی ھاتن دەستەسەرکرن. ل گۆری ھندەک ئاگاھییان  پۆلات شێخ جەنگی ژ قرکێ بریندار بوویە و د نەخوەشخانەیەکێ دە د رەوشەکا خەراب دەیە. ل دەربارێ چارەنووسا  برایێن شێخ جەنگی دە ت داخویانیەک فەرمی نەھاتیە دایین و وان لگەل مالبات یان پارێزەرێن خوە پەیوەندی نەبوونە.

ل گۆری داخویانیێن فەرمی، د پەڤچوونان دە ب تەڤاھی پێنج کەس ھاتنە کوشتن، ژ وان 3 ئەندامێن ھێزێن ئەولەھیێ یێن سلێمانیێ و 2 ئەندامێن ھێزێن لاھور شێخ جەنگی نە. چاڤکانیێن نەفەرمی دەستنیشان دکن کو 7 ئەندامێن ھێزێن سەر ب لاھوور جەنگی ڤە ھاتنە کوشتن.

ناڤەندا پەڤچوونان ئۆتێلا لالەزار یا لاھوور شێخ جەنگی بوو. د پەڤچوونان دە چەکێن گران ھاتن بکار ئانین و ئۆتێل ژ ئالیێ تانک و چەکێن زریپوش ڤە ھاتە ئارمانجکرن. ھەتا گۆتن کو ئێریشەکا ب درۆنەیان ل سەر مالا بافل تالابانی ھاتیە کرن. لێبەلێ، چاڤکانیێن ھەرێمی ئیدیعا دکن کو ئێریشێن ب درۆنان ژ ھێلا بافل تالابانی ب خوە ڤە ھاتینە کرن دا کو ئێریشا خوەیا ب تانک و تۆپان ل سەر لاھوور شێخ جەنگی رەوا بکە.

پاشخانەیا بوویەران پر ئالۆزە. ژ بەر ڤێ یەکێ، ئەڤ رەوش ژ بۆ یەنەکێ خالەک وەرچەرخانێ یا دیرۆکییە و رەوشەک مەترسیدار ل سەر ھەرێما کوردستانێ دە ددە چێکرن.

دیرۆکا ھەڤپەیمانی و دژمناتیێن د ناڤبەرا لاھوور جەنگی تالابانی و بافل تالابانی دە…

دیرۆکا ناکۆکیێن د ناڤبەرا پسمامێن تالابانی دە پر درێژە. ژ بەر کو ھەر دو کورێن جەلال تالابانی، قوباد و بافل، ژ سیاسەتێ دوورن و ب گشتی ل دەرڤەیی کوردستانێ دژیان، لۆما ژی برازیێ وی، لاھوور جەنگی، د ناڤ یەنەکێ دە، ب تایبەتی د ھێزێن دژی-تەرۆرێ دە، پر ب باندۆر بوو.

لێبەلێ، شێوازێ بوویەران ب نەخوەشکەتنا مام جەلال تالابانی د سالا 2012ێ دە گوھەری. یەنەکێ ئالۆزیەک مەزن ژیان کر و د ھلبژارتنێن ھەرێما کوردستانێ دە د رێزا سێیەمین دە دەرکەت. ل سلێمانیێ ل ھەمبەری تەڤگەرا گۆران سەرۆکاتیا خوە وندا کر. یەنەکێ، کو ھێدی ھێدی دەستھلاتداریا خوە وندا دکر، ژ بۆ پاراستنا سیستەما کو ئاڤا کربوو، رێڤەبەریەکا ھەڤبەش ئاڤا کر کو ژ کەسایەتێن ب باندۆرێن وەکی مەلا بەختییار، کۆسرەت رەسوول، لاھور شێخ جەنگی و شاناز ئیبراھیم پێک دھات. ئیرانێ ب خوە سەرکێشییا پێشیگرتنا ل ھلوەشینا یەنەکێ کر. کورێن جەلال تالابانی، قوباد و بافل، ئێدی د قادا سیاسی دە بێتر دەرکەتن پێش.

ب ئێریشێن داعشێ و لگەل مژارێن لەشکەری د سالا 2014ێ دە، لاھوور شێخ جەنگی بێتر دەرکەت پێش. د سالا 2017ێ دە، لاھوور جەنگی و بافل تالابانی کەرکووک رادەستی حەشدا شەعبی و پاسدارێن شۆرەشا ئیرانێ کرن. وان لگەل ئیرانێ ھەڤکاریەکا ستراتەژیک ئیمزاکر. و ھەمان دەم خوە وەکی ھێزەک کو دکارە پەدەکێ ئاستەنگ بکە، پێشکێشی ھێزێن دەولەتێن رۆژئاڤایی یێن کو ل دژی رەفەراندووما سەرخوەبوونا کورد بوون، کرن. د ئەنجامێ دە، یەنەکێ ئالۆزیا کو پشتی جەلال تالابانی روودایی، دەرباسکربوو.

پەڤچوونێن د ناڤبەرا مالباتا تالابانی و مالباتا ئیبراھیم ئەحمەد دە…

لێ پشتی کو مەترسی دەرباس بووی، دەم دەما پارڤەکرنا دەستھلاتدارییێ بوو. و ئەسل قیامەت ل سەر شەرێ دەستھلاتێ دەسپێکر. کەسێن مینا شاناز ئیبراھیم، کەچا ئیبراھیم ئەحمەد، ئیدیعا کرن کو ئەو خوەدیێن  یەنەکێ نە و ژ بۆ ژناڤبرنا مالباتا تالابانی کورێ وی  بافل تالابانی ئامادە کرن.

د کۆنگرەیا یەنەکێ یا 19ێ سباتا 2020ێ دە، بافل تالابانی و لاھور شێخ جەنگی وەکی ھەڤسەرۆک ھاتن ھلبژارتن.

د تیرمەھا 2021ێ دە، یەنەکە دیسا راستی بابەلیسکەکێ ھات. ھات ئیددیعاکرن کو کەسایەتیێن سەرکردەێن یەنەکێ، ھێرۆ ئیبراھیم، مەلا باختییار و کۆسرەت رەسوول، ھاتنە ژەھریکرن. ب ڤێ ئیدیعایێ لاھور جەنگی ھاتە تاوانبارکرن.

ئەڤ بوویەرە وەکی پەڤچوونا 8ی تیرمەھێ د دیرۆکا یەنەکێ دە ھاتە تۆمارکرن.

پشتی ڤێ بوویەرێ، ئالۆزیێن د ناڤ یەنەکێ دە قەد بداوی نەھاتن. بافل تالابانی پێنگاڤێن ئابۆری، سیاسی و تەرۆری دان دەستپێکرن دا کو ھێزا لاھوور شێخ جەنگی، د ناڤا یەنەکێ دە ب تایبەتی د ناڤ ھێزێن دژی تەرۆرێ دە، قەلس بکە. ب ڤێ مەرەمێ دەست ب کوشتنێن ناڤخوەیی کر. کەسایەتێن سەرەکی یێن نێزیکی لاھوور جەنگی؛  نیاز دەرگەلەیی، ھاوکار جاف، ئاکام عۆمەر و موراد کانیکوردەیی، ھاتن کوشتن. مال و ملکێن وان ھاتن دەستەسەرکرن.

پشتی وێ دەمێ، بافل تالابانی، وەھاب حەلەپجەیی کر بەرپرسێ دژی-تەرۆرێ و وان ب ھەڤرە یەنەکە ب شیوازەکی مافیاواری برێڤەبر.

ئامادەکاریێن بافل تالابانی ژ بۆ ھلبژارتنێن ئیراقێ و لیستەیا وی یا تەسفییەکرنێ…

ب تایبەتی پشتی 2012ێ، یەنەکە خوە وەکی دژە پەدەکێ ب جھ کر، و دەرگەھەکی رانتێ ژ بۆی خوە ڤەکر. ژ ئالیێ ھەموو ھێزێن دژمنێن پەدەکێ ڤە ھاتە پشتگریکرن. ئیران، حەشدی شەعبی، ھندەک ھێزێن رۆژئاڤایی و پەکەکێە ب ڤێ پەیمانێ ڤە تەڤگەرییان.

د ھلبژارتنێن پارلەمەنتۆیا ھەرێما کوردستانێ دە کو د 20ی جۆتمەھا 2024ێ دە هاتن لدارخستن دە بافل تالابانی سەرکەفتنەکا مەزن ھێڤی دکر. وی خوە ب تێکبرنا پەدەکێ ڤە ئەرکدارکر بوو. میکرۆفۆن دشکاندن، گەف و بێرێزی ل سەرکردەیێن پەدەکێ دکر. تەڤی ڤێ یەکێ ژی، وی نەکاری سەرکەفتنێ ب دەست بخە.

نھا، ھلبژارتنێن پارلەمەنتۆیا ئیراقێ دێ د 11ێ مژدارێ دە هێنە کرن. ڤێ جارێ، بافل تالابانی لگەل ھێزێن شیعە ھەڤالبەندی کریە دا کو پەدەکێ لاواز بکە. ژ بۆ ڤێ ئارمانجێ، ئەو دخوازە ھەمی ھێزێن کو ژ بۆ خوە مەترسیدار دبینە ژ ھۆلێ راکە ب تایبەتی یێن سلێمانییێ. سەرۆکێ تەڤگەرا نفشێ نوو شاسوار عەبدولواحد د 12ێ تەباخێ دە ھاتە گرتن.

سەرۆکێ ھەڤپەیمانیا نەتەوەیی ئارام قادر د 10ی تیرمەھێ دە ھاتە گرتن. سەدەما گرتنا وی ھین نەھاتیە ئەشکەرەکرن و ئەو ھین ژی نە دەرخستینە پێشبەری داداوەری. ھەڤپەیمانیا نەتەوەیی پارتیەکە کو ژ ھێلا بەرھەم سالح ڤە ھاتیە دامەزراندن.

وسا تێ پێشبینی کرن کو بافل تالابانی دێ بەری ھلبژارتنێن ئیراقێ ل سلێمانیێ ئۆپۆزیسیۆنێ ھەمییێ رامالیتن.

لێبەلێ، ئەڤ تەنێ ب ڤان کەسان ڤە سینۆردار نابە. ل پشت پەردێ ژی تێ گۆتن کو کەسایەتێن مینا مەلا بەختییار و بەرھەم سالح ژی دێ ھێدی ھێدی ژ سلێمانیێ هێنە دەرخستن و ملکێن وان هێنە دەستەسەرکرن. ئانگۆ، ئۆپەراسیۆنا بافل هێژ ب دوماهی نەهاتیە. سلێمانی دێ ببە جھەکیکو ھەر رۆژ تێ دە گرتن، کوشتنێن گومانبار و روودانێن ئالۆز دقەومن.

بافل تالابانی نھا ژ بەرێ مەترسیدارترە

ئۆپەراسیۆنا بافل تالابانی یا ل دژی مالباتا شێخ جەنگی نە تەنێ پەڤچوونەک ناڤخوەیی یە؛ د ھەمان دەمێ دە لنگەکی وێ یێ ھەرێمی ژی ھەیە.

نێزیکی 11 مەھان ل سەر ھلبژارتنێن ھەرێما کوردستانێ ڤە دەرباس دبن، لێ ھێژ حکوومەتەک نەھاتیە ئاڤاکرن. ھەر چەند سەدەما ڤێ یەکێ پر جاران ب ناکۆکیێن د ناڤبەرا یەنەکێ و پەدەکێ دە تێ ڤەگۆتن ژی، لێ راستی ب تەڤاھی نە وھایە. بافل تالابانی ب زانەبوون ھەولێن ئاڤاکرنا حکوومەتێ ل گۆری داخوازا وان ھێزێن کو دخوازن ھەرێما کوردستانێ بێ یستیقرار بکن و حکوومەتا ھەولێرێ بێباندۆر بکن، تەڤدگەرە. واتە، ل گەل نەدانا موچەیێ 8 مەھان، بۆمبەبارانکرنا بیرێن پەترۆلێ و راوەستاندنا ھناردەکرنا پەترۆلێ، یەنەکە ب زانەبوون د خوازە کوردستان بێ حکوومەت بمینە.

ئەم دکارین پێشبینی بکن کو بافل تالابانی یێ ب تانک و تۆپان ئێریشی سلێمانیێ کری، دێ ژ نھا و پێ ڤە هێژ مەترسیدارتر تەڤبگەرە. ھەر وھا ئەم دکارین ببێژن کو بافل تالابانی دێ بەرێ لوولییان بزڤرینە سەر ھەولێرا پایتەخت.

کێ گلۆپا کەسک ژ بۆ تاسفیەکرنا لاھوور جەنگی پێخست؟

نھا مژارا ھەری ناکۆک ئەوە کو کیژان ھێزان ئۆپەراسیۆنەکا وسا ژ بۆ بافل تالابانی پەسەند کریە. ب تایبەتی ھندەک دەردۆر دخوازن ناڤێ پەدەکێ د ڤێ مژارێ دە بهێتە گۆتن. لێبەلێ، گاڤا مرۆڤ ژ نێزیک ڤە لێ دنێرە ب زەلالی دبینە کو پەدەکێ پشتگری نە دایە ڤێ ئۆپەراسیۆنێ.

ژ بەر کو نە تەسفیەکرنا مالباتا شێخ جەنگی و نە ژی تاکەھێزکرنا دەستھلادارییا بافل تالابانی نە د بەرژەوەندیێن پەدەکێ دەیە.

ئیدیعایا کو ئەو دخوازن بەرامبەر ئەدھەم بارزانی، لاھوور شێخ جەنگی بهێت تەسفیەکرن نە راستە. ژ بەر کو ئەدھەم بارزانی ل کوردستانێ کەسایەتیەک سیاسی نینە.  و تەنێ شەخسەکە کو ژ ھێلا راگھاندنا پەکەکێ و یەنەکێ ڤە تێ برقاندن. بافل ب تەسفییەکرنا دژبەرێن خوە ئارمانج دکە کو ل دژی پەدەکێ ھێزا خوە خورت بکە.

گلۆپا کەسک ژ بۆ گرتنا لاھوور جەنگی ژ ئەنیا شیعە، کو شەرەکی ڤەشارتی ل دژی ھەرێما کوردستانێ دمەشینە ڤە ھاتییە پێکرن. ئەنیا شیعە ژ بۆ کو د ھلبژارتنێن پارلەمانی دە ئەنجامەک چێتر ژ بۆ یەنەکێ مسۆگەر بکە، گلۆپا کەسک بۆ بافل پێخست. ئاگاھییێن کو لاھوور جەنگی “د کوشتنا قاسم سلێمانی دە باندۆرەک ئەرێنی ھەبوویە” ئەنییا شیعا نیگەران دکە.

کەسێن سەرەکی یێن کو رۆناھییا کەسک بۆ ئۆپەراسیۆنا پاقژکرنا مالباتا شێخ جەنگی تالابانی پێخستی، سەرۆککۆمارێ ئیراقێ عەبدولەتیف رەشید و ژنا وی شەھناز ئیبراھیم بوون. عەبدولەتیف رەشید تەڤی کو سەرۆککۆمارە و خەلکێ سلێمانیێ یە، د دەربارێ بوویەرێ دە داخویانیەک ژی نەدایە. ژنا وی شەھناز ئیبراھیم ئەحمەد، ھێزا ھەری کووروتاری د پاقژکرنا مالباتا جەنگی دە بەشدارە. بافل تالابانی ل بەر دەستێ شاناز ئیبراھیم و عەبدولەتیف رەشید مەزن بوویە. بافل وەکە زارۆکێ وان ھاتییە مەزن کرن و وی زارۆکێ خوە دحەسبینن. شاناز ئیبراھیم وەکە روحا ڤەشارتی یا بافل تالابانییە.