د 22یێ تەباخێ دە ل باژارێ سلێمانیێ پەڤچوونەک مەترسیدار و وێرانکەر پێک ھات. ھێزێن کۆماندۆ یێن سەر ب بافل تالەبانی ئێریشی لاھوور تالەبانی، ھەڤسەرۆکێ بەرێ یێ یەنەکێ، و برایێن وی کرن. سەیرانگەھا سەر چنار، ناڤەندا لوکسێ، شاھیێ و گەشتیاریێ ل سلێمانیێ، ب دەنگێ تانک و تۆپان ھەژییا.
سلێمانی، باژارێ رۆناکبیری، رەوشەنبیری، ئەنتەلەکتوولیزمێ، ھەلبەست و موزیکێ، نھا بریندارە.
دەردۆرێن سیاسی و مەدیایا دلسۆزێ بافل تالەبانی ھەول ددن کو تەڤاھیا رابردوویا لاھوور جەنگی و برایێن وی ب ھورگوولی ڤەکولن دا کو ئێریشا بافل رەوا بکن. ئەو ھەول ددن کو ب ئیدیعایێن “سوویقەستێ و ئێریشێن ب درۆنان” بافل پاقژ دەرخن و ئێرشێن وی رەوا دەستنیشان بکن.
سیاسەتمەدارێن رۆژئاڤا و مەدیایا پەکەکێ، کو بەرێ دۆستێن لاھوور جەنگی بوون، مینا چەقەلان ملێن خوە دھەژینن و ب بێەخلاقانە ھەول ددن ژ ڤێ پەڤچوونێ سوود وەربگرن. ئەندامێن پەکەکێ، کو ب گۆتنا “فاشیزما ئەردۆگان” جیھان دھەژاندن، دەما کو جەنازەیێن جوانێن سلێمانیێ ھین ژی ل ئەردێ بوون، ب لەزووبەز سالح مووسلم دشینن سەردانا بافل تالەبانی، ھەول ددن کو فاشیزما بافل تالەبانی د پەڤچوونا لالەزارێ دە پیرۆز بکن.
ژ بەر کو راگھاندنا لاھوور جەنگی ھاتیە بێدەنگ کرن، یێن لاھوور جەنگی دپارێزن پر کێمن.
گەلۆ کی حەق بوو و کی ب سەرکەت؟
ھندەک پەڤچوون ھەنە، کو تێ دە چ لایەن حەق نینن. ژ بەر کو سەدەمێن راست ژ بۆ پەڤچوونان تونە نە. تەنێ ژ بەر حەزێن کەسانە و بەرژەوەندیێن ئالیان پەڤدچن. نە لاھوور جەنگی تالەبانی و نە ژی بافل جەلال تالەبانی د ڤێ پەڤچوونێ دە حەق نەبوون.
ژ بەر کو ئەڤ ھەر دو شریک بوون. د ناڤبەرا سالێن 2012 و 2021ێ دە مل ب ملێ ھەڤ دمەشیان. بافل تالەبانی ل سەر شاشێن تیڤیێ دگۆت، “لاھوور خوە بوو من کر مەرتالێ زندی و خوە ئاڤێت بەر گوولەیان” و سلاڤەک لەشکەری ژ لاھوور رە رێکر. ھەر چقاس دەما ئەو دۆست و شریک بوون ژی، ب ھەڤدوو رە نەدورست بوون. چ مفا نەگھاند مڵەتێ کورد. خورتبوونا ھەرێما کوردستانێ وەکی مەترسی ژ بۆی خوە ددیتن و لگەل ھەر کەسێ کو دخوەست رێڤەبەریا کوردی یا ل ھەولێرێ لاواز بکە ھەڤکاری دکرن.
ب ھەڤکاریا ڤان ھەردو پسماما، ل دژی ھەولێرێ، لگەل حەشدا شەعبی و پەکەکێ ئەنیەک ھەڤپار ئاڤا کرن. ڤێ ھەڤپەیمانییێ وەکە نوونەرێ رەژیما شیعە یا ئیراقێ و ملیسێن وێ ل سەر خەتا گەرمیان-سلێمانی-کەرکووک-مەخموور-مووسل و شەنگالێ تەڤگەریان. ڤی ئەنیا شیعا د رەفەراندووما سەرخوەبوونا کوردستانێ دە خەنجەرەکا ژەھری ل کوردان خست. ب ھەڤ رە کەرکووک، دلێ 50 ملیۆن کوردان، فرۆتن ئیران و ھێزێن حەشدا شەعبی.
بافل جەلال تالەبانی و لاھوور جەنگی تالەبانی، دەما کو دۆست بوون، ھەول دان کو کوردان بکن بەشەک ژ حەشدا شەعبی.
دەما کو ئەو دۆست بوون، ل دژی ھەولێرێ مینا مافیا تەڤدگەریان. نھا، ب شێوازێ مافیاواری شەرێ ھەڤ دکن.
کوردان نە ژ دۆستانیا وان مفا دیت و نە ژی ژ دژمناتیا وان سوود وەرگرتن.
بافل تالەبانی ژ دەستپێکا ڤان پەڤچوونان ڤە خوەدی ئاڤانتاژەکا گرینگ بوو، ژ بەر کو کەچێن ئیبراھیم ئەحمەد (ھێرۆیێ-شانازێ) و ئیرانێ پشتگرییا وی دکر. وی لاھوور خستە قونجکێ رە. ب چاڤسۆری کەسایەتیێن مینا ئاکام عۆمەر، مورات کانیکوردەیی و نیاز دەرگەلەیی و ھەڤکار جاف کوشتن.
بافل تالەبانی نھا دخوازە خوە بکە یەکانە “سەرۆک” ل سلێمانیێ. بافل وەکە یەکانە سەرۆک دخوازە سەرھشکییێ ھەمبەر رێڤەبەریا کوردان یا ھەولێرێ بکە ھەکە نە کاری ڤێ یەکێ بکە، ئەو دخوازە ژ ھەولێرێ ڤەقەتە. ب کەسایەتیا خوە یا نارسیست و مەگالۆمانی، بافل تالەبانی ژ نھا و پێ ڤە ھین مەترسیدارترە. ئەو دێ ھەر کەسی نەچار بکە کو موریدییا وی بکن. ژ بۆ ڤێ ئارمانجێ، ئەو دخوازە هەڤرکێن خوە ژ ھۆلێ راکە. یێن رکابەرییا وی نەکن تەنێ وی رەخنە ژی بکن دێ بکە ئارمانج. ھەر چەند ئەو رەخنە نەکن ژی، ئەوێ کەسێن کو درووشمەیا “بژی سەرۆک بافل” ناقیرن دێ بکە ئارمانج. واتە، پێڤاژۆیا کۆدەتایا لالەزارێ یا 21ی تەباخێ ھین نەقەدیایە، ئەو دێ بەردەوام بکە.
دیمەنێن ل سلێمانییێ کۆدەتایا 15 تیرمەھێ یا ب گوومان ل ترکییێ تینە بیرا مرۆڤی. ل ترکییێ لایەنگرێن ئاکەپێ ب بەهانەیا کۆدەتایێ لەشکەر دگرتن؛ ئەو رووت دکرن و ل وان دخست. ھەتا سەرێ ھندەک عەسکەران ژی ژێکرن. پشتی چەند رۆژا ئەردۆگان و پایەدارێن لەشکەری ب ڤەشارتی لھەڤ کرن و ئەو پەڤچوون کرن مالێ ھندەکێن دن. زارۆکێن خەلکێ د ناڤبەرا ھەر دو لایەنان دا ھاتن کوشتن. ژ وێ شەڤێ و ڤر ڤە ل ترکییێ ھەر تشت بەرووڤاژی بوو، جەوەکی ب ترس ل سەر گەل ھات سەپاندن و ھەرکەسێ سەرێ خوە ل ھەمبەر دەستھلاتا ئاکەپێ تەواند.
ھەمان تشت دێ ل سلێمانیێ ژی بقەومە. گەر ھەر دو کلیکێن دەستھلاتدار ل سەر سەناریۆیەک ھەڤپار نەگھیژن رێکەفتنەکێ، پەڤچوون دێ بەردەوام بکە. لێ یێ کو ب راستی وندا دکە دێ خەلکێ سلێمانیێ بە.
رەوشەنبیرێن سلێمانیێ نھا رۆلا سێ مەیموونان دلیزن و دبێژن “من نەدیت، من نەبھیست و ئەز نزانم.” ئەو وەکە خشیمان تەڤدگەرن کو وان پەڤچوونێن ب تانکان د ناڤ باژێرێ سلێمانیێ دە نەدیتنە. وەکە داعش و دەولەتا ترک کۆماندۆیێن بافل ژی دەستێن جوانێن کورد پشتڤە گردا بوون ئەو ب تازی ل ئەردێ درێژ کربوون و ئەو تەشھیر دکرن. گەلۆ ما رەوشەنبیرێن سلێمانیێ ئەڤ دیمەنێن ل کێلەکا خوە ژی نەدیتن. ھەکە ئەو پەڤچوون نە ل سلێمانیێ ل بەھدینان بان دا رەوشەنبیرێن سلێمانیێ دەملدەست کۆنفەرانسێن چاپەمەنیێ لدارخن و پەدەکێ تاوانبار کن. ھەتا ھندەک ژ ڤان “رەوشەنبیران” زەندێن خوە ھلدانە کو پەدەکێ توومەتبار بکن. ئەو رەوشەنبیرێن ل کافی و قەھواخانا روونشتی و ھەرۆژ خەلکێ بەھدینان و ھەولێرێ وەکە عەشیر بێرێزیێ لێدکن و دلسۆزێن پەدەکێ وەکە کۆلە پێناسە دکن ھەمبەر ڤی شەرێ مافیاواری یێ ل سلێمانی رۆلا سێ مەیموونا دلیزن.
تاوانبارێن ھەری مەزن یێن کو ل دژی فاشیزم و کوژەرییا ڤەشارتی یا کو یەنەکە د ڤان دەھ سالێن داوی دە ھێدی ھێدی پێشتێخە کەروولالن. ئەو ژی ئەو کەسن یێن کو خوە وەکە رەوشەنبیر و دەمۆکراتێن سلێمانیێ دبینن و چاڤێ خوە ل ڤێ مافیایا سییاسی دگرن.
رەوشەنبیر و رۆناکبیرێن سلێمانیێ ب ڤێ خەفلەتا خوە شریکێن ڤێ مافیا سییاسی نە. یێن ئیرۆ خوە کەروولال دکن بلا باش بزانن کو سبە دۆرا وان نە.
