بووبێ ئەسەر
پشتی کو وەلاتێ مە کوردستانا شێرین پارچەکرن و ھەر پارچەک خستن بن ئەمرێ داگیر-کەرێن ترک، عەرەب و فارسان، ھەلبەت کورد ژی ژ بۆنا مافێن خوەیێن رەوا ل ھەمبەر ڤێ داگیرکەریی بێ دەنگ نەمان. سەرھلدان و بەرخوەدانا کوردان ل ھەر چار پارچەیێن داگیرکری رانەوەستیا.
د وان تەکۆشین و بەرخوەدانان دە ئافات و تۆفانێن مەزن ئانین سەر کوردان. وەلات ڤالاکرن، ب ھەزاران کورد کوشتن، ب ملیۆنان کورد ژ وەلاتێ وان ھاتن دەرخستن. ئەنفال، بۆمبەکرنێن ژەھرێ ل حەلەبچە و دەڤەرێن دن. واتە ل ڤێ جیھانێ ژ بۆنا کوردان بقەدینن، چ لازم بوو داگیر-کەران ل ھەر چار پارچێن کوردستانێ ئانین سەرێ گەلێ مە.
لێ ل ھەمبەر ھەمی قرکرن، وێرانی و کۆچبەریێ کورد و ب تایبەتی تەڤگەرا بارزانیان یا ژ بۆنا ئازادی و سەرخوەبوونا کوردستانێ قەت رانەوەستیا.
ب تەکۆشین و بەرخوەدانا زێدەیی سەد سالان یا بارزانیان ل باشوورێ کوردستانێ مافێ کوردان یێ رەوا ئۆتۆنۆمی و دوورە فەدەراسیۆن بدەستخستن. پشتی ب دەستخستنا وی مافی، بارزانیان ھێدی ھێدی و ب گاڤێن ئەساسی، ژ بۆنا کوردستانەکا سەربخوە، چ د قادا ناڤنەتەوەیی دە و چ ژی د ناڤا خوەدە گاڤ و دیپلۆماسیا ژ بۆنا کوردستانەک سەربخوە کار و خەبات ھاتە کرن و ھێژ ژی تێ کرن.
د ئەنجاما ڤان کار و خەباتێن ژ بۆنا کوردستانەکا سەربخوە، رێزدار مەسعوود بارزانی وەکە سەرۆکێ گەلێ کورد بریارا رەفەراندووما ژ بۆنا وێ دا.
ھەلبەت رێزدار مەسعوود بارزانی زانیبوو کو دێ گەلەک ریسکێن (خەتەر) ڤێ بریارێ د قادا ناڤنەتەوەیی دە ھەبن. جەنابێ وی دزانیبوو کو ھەمی داگیر-کەرێن دژمنێن گەلێ کورد ل ھەمبەر بریارەکا وەھا بێ دەنگ نامینن. ژ خوە نەمان ژی.
جەنابێ مەسعوود بارزانی زانیبوو کو دێ د قادێن ناڤدەولەتی دە ژی گەلەک دەنگێن نەرازیبوونا ڤێ بریارێ بلند ببن. لێ رێزدار ل ھەمبەر ھەمی ئاستەنگی و ناکۆکیێن ھەیی بریارا رەفەراندووما ژ بۆنا سەرخوەبوونا گەلێ خوە دا و خوەست فێر ببە، کا گەلێ وی دێ ژ بۆنا بریارەک وەھا چ بێژە؟
ھەلبەت گەلێ کورد ژی گۆتن و بریارا سەرۆکێ خوە یا رەفەراندووما ژ بۆنا کوردستانەکا سەربخوە، پێک ئانین. دەنگێن خوەیێن ژ بۆنا سەرخوەبوونا کوردستانێ ژ سەدی 94 گۆتن ئەرێ ئەم کوردستانا خوەیا سەربخوە دخوازن.
ب وان دەنگێن خوەیێن ئازاد، کوردان کلیتا دەریێ سەرخوەبوونا کوردوستانێ دان دەستێ سەرۆک بارزانی دا کو رۆژا وێ بێ، جەنابێ وی ژی ب وێ کلیتا گەلێ وی دابوویێ، دەریێ کوردستانا سەربخوە ڤەکە.
ئەو رۆژ گەلەک نێزیک بوویە. لەورا ژی ژ بۆنا خورتکرن و خوەدی لێدەرکەتاندنا وی مافێ خوە، کورد ھەر سال رۆژا 25ی مەھا 9ێ دە، ب گشتی و ب دەنگەکی بەرز دقیرن و دبێژن: “سەرخوەبوون مافێ کوردانە”. ئاھا ئەڤ دەنگ ھەشت سالن کو ل کوچە و کۆلانێن ئەورۆپا بەلاڤ دبە. ئەڤ دەنگ دچیتە گوھێن کاربدەستێن دەولەتێن مەزن کو ئەو ژی رۆژەکێ بێژن: “ئەو ماف مافێ وەیە، کەرەم بکن، بلا سەرۆکێ وە رێزدار مەسعوود بارزانی ب وێ کلیتا گەلێ وی دابوویێ، دەریێ سەرخوەبوونا کوردستانێ ڤەکە.”
ژ بەر کو بێ بریارا دەولەتێن مەزن، چ ملەت نکارن سەرخوەبوونا خوە راگەھینن. لەورا دڤێت کورد ب خەباتێن خوەیێن دیپلۆماسی، ب خوەپێشاندانێن دەمۆکراتیک دەنگێ خوە یێ ژ بۆنا سەرخوەبوونا کوردستانێ بلند بکە و وی دەنگی بگهینن دەولەتێن کو بریارا ملەتێن دخوازن سەرخوەبوونا خوە راگھینن. ژ بەر ڤێ لازم و پێویستە کو ھەتا ئەم مافێ خوە یێ سەرخوەبوونا کوردستانێ ب دەست بخن، دڤێت ھەرسال د رۆژا بریارا رەفراندوومێ دە، ئەم دەنگێن خوە بگهینین وان دەولەتێن کو بریارا سەرخوەبوونا دەولەتان ددن.
ئاھا ئەو رۆژ ئیرۆ ژ ھەر دەمێ بێتر نێزیک بوویە. ژ بۆنا رێزدار سەرۆک بارزانی ژی رابە و ب وێ کلیتا د دەستێ خوە دە، دەریێ سەرخوەبوونا کوردستانێ ڤەکە، دڤێت ھەمی کوردێن جیھانێ ببن پالپشت و پشتگرێ سەرۆک بارزانی دا کو ئەو ژی ب رەحەتی وی دەریێ کو ئەڤ سەد سالن کو کورد ل بەندێنە ڤەکە. دا کورد ب ھەڤرە ب قیرینێ بێژن:
بژی ئازادی و سەرخوەبوونا کوردستانێ
بژی رەفراندووما ژ بۆنا کوردستانەکا سەربخوە.
بژی کورد و کوردستان
