پشتی 140 رۆژان ژ هلوەشاندنا خوە، پەکەکێ نووچەیا مرنا 156 جوانێن کورد گھاندیە مالێن وان
د 27ێ شوباتێ دە، عەڤدللا ئۆجالان، رێبەرێ پەکەکێ، داخویانیەک دا و بانگ ل پەکەکێ کر کو خوە ھلوەشینە. پەکەکێ، د داخویانیەکێ دە کو د 7ێ گولانێ دە ھات وەشاندن، ھلوەشاندنا خوە و بداویبوونا تێکۆشینا چەکداری راگھاند. دەما کو مە ئەڤ ڤدیۆ چێکری، پەکەکێ تام دبە 140 رۆژ کو خوە ھلوەشاندییە. د ڤان 140 رۆژان دە ل ھەرێمێ و رۆژھلاتا ناڤین بوویەرێن بالکێش قەومین. ل غەززە، ئوکراینا، تەڤلیکرنا حەشدا شەعبی د ناڤ لیستەیا تەرۆرێ دە، بلندبوونا بھایێ زێری، و ھتد. لێبەلێ، پرسگرێکەک دن ژی ھەبوو: ئەو ژی ئاگر کەت ناڤا 156 مالباتێن کورد.
ل کی دەرێ؟ ل کوردستانێ.
چاوا؟ نووچەیا مرنا 156 جوانێن کورد گھیشت مالێن وان.
ئەڤ زارۆک کی بوون؟ ئەو جوانێن کورد کو پەکەکێ مرنا وان ب سالان ڤەشارتی بوون.
ئەڤ 140 رۆژن کو پەکەکە ھاتیە ھلوەشاندن. و ھاتیە راگھاندن کو د ڤان 140 رۆژان دە 156 کەسان د ناڤ رەفێن ھەپەگێ دە ژیانا خوە ژ دەست دانە. ئەڤ ھەژمارا کو ھاتیە راگھاندن کەسێن کو ل رۆژئاڤا، شنگال، مەخموور و پژاکێ ژیانا خوە ژ دەست دانە ناگرە ناڤ خوە. ھەر وھا بەرپرسێن پایەبلندێن وەکی عەلی حەیدار قەیتان، رزا ئالتوون و نورەدین سۆفی ژی ناگرە ناڤ خوە. ئانگۆ، لیستە د راستیێ دە پر مەزنترە. ئەم دکارین داخویانیێن ھەپەگێ ب کورتاسی وھا بژمێرن:
ھەپەگێ د ڤان 140 رۆژان دە دەربارێ شەرڤانێن خوەیێن کو ژیانا خوە ژ دەست دانە دە 53 جارا داخویانی وەشاند.
ل گۆری داخویانیان، ھەژمارا گشتی یا جانێ خوە ژدەستداییا: 156 کەسن.
51 ژ ڤان ژن و 105 مێر بوون.
16 ژ ڤان ل باکور ژییانا خوە ژ دەست دانە. 140 کەسێن مایی ل ئاخا باشوورێ کوردستانێ یا د بن کۆنترۆلا پەکەکێ دە ژیانا خوە ژ دەست دانە.
14 ژ وان ناڤێن کو ھاتینە راگھاندن بەرپرسێن پایەبلند بوون (ناڤێن وان ھەنە).
بەلێ، کوردان د ڤان 140 رۆژان دە گەلەک تشت نیقاش کرنە، لێ وان ل سەر مرنا ڤان 156 زارۆکان نیقاش نەکریە. کەس دەرنەکەتیە پێش کو بپرسە چما ئەو مرنە، چما مرنا وان ھاتیە ڤەشارتن، چما نھا تێنە راگھاندن… وەکە کو ئەو جوان ملکێ پەکەکێ نە کەس چ پرسا ناکە.
ژ سەدی 70ێ یا ڤان 156 کەسان کو پەکەکێ وەکی “مری” راگھاندی، یێن ژ بەریا سالا 2023یێ بوون. ھندەک ژ وان د سالێن 2016 و 2017ێ دە ژییانا خوە ژ دەست دانە. واتە، ھندەک ژ مرنا ئەڤە 9 سالن تێن ڤەشارتن. چما؟
لێ دیسا ژی، دەولەتا ترکیێ دەما بوویەرێن کوژەری دکە، ناڤ و وێنەیێن وان ئەشکەرە دکە.
میناک: دەولەتا ترکیێ کوشتنا رۆھات رۆڤەر (ئازاد ئاکینجی) د سالا 2024ێ دە راگھاند. ناڤ، وێنە و ئەرکا رۆھات ئەشکەرە کر. لێ پەکەکێ تەنێ سالەک و نیڤ شووندا ئەڤە راگھاند… چما؟
دیسا، دەولەتا ترک کوشتنا ئەمینە ئەرجیەس( نازل تاشپنار )د سالا 2021ێ دە، دگەل جھ و ئارمانجا وێ راگھاند. لێبەلێ، پەکەکێ تام چار سال شووندا، د سالا 2025ێ دە، پشتی کو خوە ھلوەشاندی، راگھاند. و ب رۆژانە، پەسنێ ئەمینە ئەرجیەس ددن.
گەر دەولەت دزانە پەکەکە ژی دزانە، کادرۆیێن پەکەکێ ژی دزانن. ژ بەر چ مرنا ڤان جوانێن ژ مالباتێن وان تێ ڤەشارتن؟ چما ژ رایا گشتی ڤەدشێرە؟ چما پەکەکە ژ گرسەیا خوە ڤەدشێرە؟ ب راستی، گەلۆ پەکەکە راستی ل سەر سەدەم و جھێن مریان ئاگاھییێن راست ددە یان نە، ئەو ژی نە دیارە.
د ناڤبەرا سالێن 2017 و 2024ێ دە، دەما کو پەکەکێ دەربەیەک لەشکەری یا مەزن خواری، وەنداھیێن خوە ڤەشارتن دا کو تێکچوونا خوە ڤەشێرە.
نھا، پەکەکە ھەما ھەما ھەر رۆژ ناڤێن جوانێن مری ئەشکەرە دکە، پەکەکە تەرمێ جوانێن مری بکار تینە دا کو پێشی ل بەرتەکێن کوردان ل ھەمبەر پێڤاژۆیا بێچەکبوونێ یا بێ دەستکەفتی یا کو عەڤدللا ئۆجالان راگھاندی بگرە. ھەر رۆژ، یەکەم نووچەیا کو مەدیایا پەکەکێ مرۆڤی پێ بێزار دکە، پارڤەکرنا داخویانیا ھەپەگێیە دەربارێ جوانێن مری دە. ب وێنەیێن کەچێن جوان و دەلال، ھەلبەستێن کو ئەو بەری مرنا خوە دخوینن و دسترن تێن پەخشکرن، پەکەکە ب ڤی شێوازی دخوازە رێ ل بەر رەخنە و بەرتەکێن گەل بگرە. د ھەمان دەم دە ئەو دخوەزە جەوێ ھەستییاری ل سەر کوردان بەلاڤ نەبە دا کو بکارە کۆنترۆلێ ل سەر کوردان بکە.
ژ ڤێ رە سیاسەتا جەنازەیێ تێ گۆتن.
راستی ئەڤە: پەکەکە جوانان نە ژ بۆ زندی ھشتنا وان، ژ بۆ ل سەر خوینا وان سیاسەتێ بکە بکار تینە. ھەر جوانەک کو دمرە د چاڤێن وان دە ھەژمارەکە، ئاموورەکێ پرۆپاگاندایێیە. ژیانا وان ژ بۆ پەکەکێ چ نرخەک نینە. لێ ژییانا وی زارۆکی گییانێ دایکێیە، ھێڤیا بابێیە. ئاھا ئەڤە خییانەتا راستین.
دڤێت ھەر کەس ل زارۆکێن خوە خوەدی دەرکەڤە؛ دڤێت مالبات ژ پەکەکێ بپرسن زارۆکێن مە ل کو نە.
ب ھەزاران ناڤ ھەنە کو پەکەکێ ژ سالێن 1990 ڤر ڤە ئەشکەرە نەکرینە، کو چارەنووسا وان نەدیارە. ھەر وھا تێ زانین کو ناڤێن زێدەتری ھەزار جوانێن کو ژ پێنگاڤا شەمزینانێ یا 2013ێ ڤر ڤە ژیانا خوە ژ دەست دانە ڤەشارتی نە. نە ھەوجەیە کو ھەر رۆژ ئاگرێ جەگەرێ بەرددن ناڤا مالەکا کورد. مادەم کو پەکەکێ خوە ھلوەشاندیە، دڤێت د جارەکێ دە ھەموو ناڤێن ژییانا خوە ژ دەست دایی راگھینە. وەکە ئەرکەکی ئەخلاقی و ویژدانی دەست ژ سیاسەتا خوین و جەنازەیان بەردە.
لێ مخابنی ڤە، ئەم دێ ھەیا چەند سالان شووندا ژی ناڤێن کو پەکەکە مرنا وان ئەشکەرە دکە ببھیزن.
