ئۆجالان داخوازیەکە عنتیکە ژ کوردێن رۆژئاڤا دکە..
سمکۆ عەبدولعەزیز
د 11/5/2025 دە عەڤدللا ئۆجالان دیسان نامەیەک ژ هێزێن سووریەیا دەمۆکراتیک رە شاند، دەما مرۆڤ ل ڤێ نامەیێ دنێرە، ب زەلالی خویا دبە کو ئۆجالان دیسا راستی دورووتیا فەلسەفی و سیاسی هاتیە.
هندەک جاران وێ ببینی کو عەڤدللا، خوە وەکە رێبەرەکی بزاڤا سیاسی یا نەتەوی یا کورد ددە ناسکرن، جارنا ژی وێ ببینی ئەو حاشاتیێ دکە کو کوردان خەباتەکە سەدسالی مەشاندیە ژ بۆی سەرخوەبوون و دیارکرنا چارەنڤیسا خوە و دامەزراندنا دەولەتەکا سەربخوە یا کوردستانی، جارنا ژی وێ ببینی عەڤدللا خوە وەکە پارێزەرێ پاراستنا ژینگەهێ و ئازادییا ژنێ و دەمۆکراتیک کرنا جڤاکان ددە ناسکرن.
گەر مرۆڤ ب ئاوایەکی هویر شیرۆڤەیا گۆتار و رەفتارێن ئۆجالان بکە، وێ پر ب هێسانی ژ مرۆڤ رە خویا ببە کو هەر ژ دەستپێکا خەباتا وی یا سیاسی و هەیانی نها، ئەو بەردەوام ل دژی خەباتا سیاسی یا نەتەوەیا کورد بوویە، بەردەوام کوردان هان ددە کو بچن د بن کۆنا دەولەتا ناڤەندی دە بژین، بێی کو ئەو دەولەت دانپیدانێ ب مافێن گەلێ کورد بکە.
گۆتنێن ئۆجالان بەردەوام ژ دو روویان پێک تێن، روویێ سەرڤە، کو وسا خویا دکە پرۆژەیا وی ژ بۆی رزگارکرنا کوردانە.
روویێ هوندر و پراکتیک و بنەرەت، ئەڤە کو ب هن هێنجەتێن عنتیکە کوردان بەر ب خوەرادەستکرنێ ڤە دبە.
دەما ئۆجالان دبێژە، دەولەتا نەتەوی پرۆژەیەکە بەرتەنگ و بێی بەرهەمە. ئەڤ تێگەهـ زێدەتر یێ وان فیلسۆفێن رۆژئاڤایینە یێن کو ب سەدان سالانە خوەدی دولەتێن نەتەوی و دخوازن شێوەیێ برێڤەبرنا ناڤخوەیی و تێگەها هزری یا هەموەلاتیێن خوە بگوهەرن، کو ب ئاوایەکی دن ب ناڤێ ژینگەهێ و فیمینیزمێ وێ خزمەتا دەولەتا خوە یا نەتەوی بکن. واتە ئەو دخوازن ئاموورێن خزمەتکرنێ بگوهەرن، نە وەک ستراتەژییێ.
هەیانی نها کورد نەبوونە دەولەتەکە نەتەوی یا سەربخوە، هێژان دەستکەفتیێن سەرخوەبوونا نەتەوی نەدیتنە، هەیا کو بهێن گوهەرینێ تێ دە بکن، ئانکو دەما پێشوەخت مرۆڤ ل دژی سەرخوەبوونا خوە دسەکنە، هەر وەکە تو ژ دەستپێکێ ڤە دەستان ژ مافێن خوە یێن سیاسی و نەتەوی بەرددەی و وەکە فیلسۆفەکی رۆژئاڤایی یێ کو ژ نەتەوەبوونێ تێر بووی بفکری و بانگەشەیێ بۆ دکی، ئەڤ وێ یەکێ دگهینە کو تو هەولا ژناڤبرنا خوە ددی و دبیە بەرهەمێ هزرێن بێگانەبوونێ.
هیگل د دیالۆگا (مەزن، کۆلە) دە وسا بەرچاڤ دکە کو خوەناسین وێ دەمی ب دەست دکەڤە کو سەرخوەبوونا خوە رادگهینی و د وێ دەمێ دە ژناڤ دچە کو ب کۆلەتیێ رازی دبی.
ئۆجالان داخوازێ ژ هێزێن سووریەیا دەمۆکراتیک دکە کو تەڤلی حکوومەتا ناڤەندی یا سووریەیێ ببن، ئەڤ داخوازیەکە پر ب ترسە، ترسا وێ ڤەدگەرە بۆ وێ یەکێ کو مرۆڤ هشا کەسێن نها دەستهلاتا سووریەیێ برێڤە دبن نزانە، لێ دیسان دبە ئەحمەقی دەما مرۆڤ وێ هشێ بزانبە و وێ داخوازیێ ژی بکە.
دەستهلاتا کو نها سووریەیێ برێڤە دبە، نە دەستهلاتەکە نیشتیمانی و عەلمانی و لیبرالە، بەلکو دەستهلاتەکە توندرەو یا سەلەفی جیهادی یە کو رێڤەبەرێ وێ یێ ژمارە یەک “ئەحمەد شەرع” پێش ها ب سەدان تاوانێن مینا کوشتنا بێ گونەهان هاتیە تومەتبارکرن، ئەڤ دەستهلات درێژەپیدەرا راستەراست یا ئیدۆلۆژیا داعش و قاعیدەیە.
پێش نها و نها ژی، ئەڤ دەستهلات ب پشتگیرییا دەولەتا ترکیەیێ هەبوونە و هەنە، و ژ ئالیەک دن ڤە ئەڤە ئەو کەسن یێن کو هەیانی نها خوینا ب هەزاران جوانێن کورد ب دەستێن وان ڤە هشک بوویی، و ب هەزاران کەچێن کورد رەڤاندین و کرین کەنیزەک و جاریە.
ئەز فێم ناکم ئەڤ چ هزر و باوەرییە ژ بۆی ئۆجالان چێبووی کو کورد ل رۆژئاڤایێ کوردستانێ بێی هیچ رێکەفتنەکە دیار ژ بۆی پاراستنا مافێن خوە یێن نەتەوی بچن و د ناڤا سووریەیێ دە خوە ئاسیمیلە بکن، ئەز فێم ناکم ئەڤ چ پێشکەفتنەکە؟؟
یا کو ئۆجالان داخواز دکە وەکە وێ یەکێ یە کو کورد ب خوە تربا خوە بکۆلن، ژ ئالیێ فەلسەفی ڤە ئەڤ قەت نابە، ژبەرکو نەموومکینە کورد ب نرخێن ئازادی و مافێ مرۆڤان هاتبن پەروەردەکرن و لگەل هزرکرنەکا کو نەتەوبوون و ئازادی و مافێ مرۆڤان ب گونەهەک مەزن بزانبن و پەیرەو بکن، یەک بگرن.
ئۆجالان ژ هەرکەسی زێدەتر کەساتیا کوردێن رۆژئاڤایێ کوردستانێ ناس دکە، ژبەرکو ئەو باش دزانە کا چما بۆ دەمەکی پر کێم بەشەکێ بەربچاڤ یێ کوردێن رۆژئاڤا تەڤلی رەفێن پەکەکێ بوونە، گەر ئۆجالان ژ بیر کربە، ئەزێ ل بیرا وی بینم، ژ بەر کو د وێ دەمێ دە ل رۆژئاڤا من ب ئۆجالان رە کار دکر، سەدەمێن بنگەهین یێن کو هەژمارەکە زێدە یا کوردێن رۆژئاڤا تەڤلی ناڤا رەفێن پەکەکێ بوونە ئەڤ خالێن ل خوارێ بوون:
کوردێن رۆژئاڤا پرانی خوەندەڤانن، کێم مال هەنە د ناڤا رۆژئاڤا دە کو پرتووکخانە تێ دە نەبە.
پاشخانا هزری یا پرانیا کوردێن رۆژئاڤا، مارکسی نەتەوی یە.
کوردێن رۆژئاڤا گەلەک وەلاتپارێزن و دەر چریسکەکا خەباتا سیاسی یا نەتەوەیا کورد هەبایە یان ژی هەبە کوردێ رۆژئاڤا ل ور بوونە. دیرۆکا شۆرەشین کوردان دیدەڤانە.
پەکەکێ د 40 سالێن دەرباسبوویی دە خوە وەکە پارتیەکە کورد یا نەتەوی کو خەباتێ ژ بۆی کوردستانا مەزن دکە دایە ناساندن، لۆما کوردێن رۆژئاڤا تەڤلی ناڤا رەفێن وێ بوون.
ئەڤجا چاوا و ب چ روی ئۆجالان د نها دە ڤێ داخوازا عنتیکە ژ کوردێن رۆژئاڤا دکە؟
