ھەڤسەرۆکا گشتی یا دەم پارتیێ تولای ھاتیمۆغلاری، د بەشداریا خوەیا ل دیدارا میری دە راگھاند، ھەر چەند پشتگریا گەل ژ بۆ پێڤاژۆیا ئاشتیێ بلند بە ژی، ژ بەر نەبوونا گاڤێن کرداری باوەریا گەل ب سەرکەفتنا پێڤاژۆیێ کێمە.
ھاتیمۆغلاری ئیرۆ 8ێ جۆتمەھێ ل ھەولێرێ د چارچۆڤەیا پانەلەکا دیدارا میری دە دیار کر، جڤاک خوەدی ل پێڤاژۆیێ دەردکەڤە لێ ژ بەر کو حکوومەت گاڤێن بەرچاڤ ناڤێژە، باوەری لاواز دبە. ھەروھا وەکە میناک دۆزا سەلاحەدین دەمیرتاش ئانی زمان و گۆت: “سەلاحەدین دەمیرتاش نێزی نەھ سالن د زیندانێ دەیە. دادگەھا مافێن مرۆڤان یا ئەورۆپایێ سێ جاران بریارا ئازادکرنا وی دایە. لێ ترکیەیێ د رۆژا داوی یا دەما ئیتیرازێ دە، ل دژی بریارێ ئیتراز کر و ئەڤ یەک بوو سەدەم کو دەمیرتاش نەیێ ئازادکرن.”
ھەڤسەرۆکا دەم پارتیێ تەکەز کر: “کریارێن ب ڤی رەنگی باوەریا جڤاکێ ب پێڤاژۆیێ کێم دکن. ئەگەر دەمیرتاش، فیگەن یوکسەکداغ و گرتیێن دۆزا کۆبانێ ھاتبانا ئازادکرن، دا باوەریا جڤاکێ ب پێڤاژۆیێ زێدەتر بت.”
تولای ھاتیمۆغلاری ھەروھا بال کشاند سەر گرینگیا ئاڤێتنا گاڤێن یاسایی و گۆت، ئەو گرینگیەکا مەزن ددن دامەزراندنا “کۆمیسیۆنا پێڤاژۆیا ئاشتیێ”، لێ یا ژ وێ گرینگتر ئاڤێتنا گاڤێن پراکتیکییە.
ھاتیمۆغلاری پرسێن کو دڤێت ب رێیا یاسایان وەرن چارەسەرکرن وھا رێز کرن: “ھێژ ت پێنگاڤەکا یاسایی نەھاتیە ئاڤێتن. دڤێت ژ بۆ کەسێن کو چەکێن خوە دانینە و دخوازن بەشداری سیاسەتا دەمۆکراتیک ببن رێ وەرە ڤەکرن. یا دویەم، مژارا ‘مافێ ھێڤی’یێ ژ بۆ برێز ئۆجالان ھەیە کو کۆمیتەیا وەزیران یا کۆنسەیا ئەورۆپایێ دەربارێ ڤێ دە بانگ ل ترکیەیێ کربوو. ھەروھا ل ترکیەیێ نێزیکی ھەفت ھەزار گرتیێن سیاسی و رۆژنامەڤانێن گرتی ھەنە، دڤێ ئەو وەرن ئازادکرن.”
ھەروھا ھاتیمۆغلاری ھشیاری دا و گۆت: “ھەتا کو دەربارێ ڤان مژارێن بنگەھین دە گاڤ نەیێن ئاڤێتن و یاسا نەیێن دەرخستن، کارێ کۆمیسیۆنێ ڤالا دەردکەڤە.”
