کەجەکە سڤکاتیێ ب سەرۆکێ هەرێما کوردستانێ برێز نێچیرڤان بارزانی دکە
کەجەکێ د رۆژا 10ی جۆتمەهێ دە داخویانیەک پارڤەکر و تێ دە هەقارەت ل سەرۆکێ هەرێما کوردستانی برێز نێچیرڤان بارزانی کر، کەجەکێ د داخویانیا خوە دە پلەیا سەرۆکێ هەرێما کوردستانێ ژ بۆی نێچیرڤان بارزانی ب لێڤ نەکر و ئەو سووچبار کر کو ب زمانێ دەولەتا ترک ئاخڤییە.
نێچیرڤان بارزانی ژ بۆی رۆژئاڤا هەمبەر ترکان هەلوەست نیشان دا
سەرۆکێ هەرێما کوردستانێ نێچیرڤان بارزانی د هەشتێ جۆتمەها 2025 د دیدارا میری دە ئاخافتنەک کر. بەشا مەزن ژ ڤێ ئاخافتنێ ل سەر رۆژئاڤا بوو. ژ بۆی پێشنیارا چەکدانینا هەسەدێ دژبەرییا خوە ئانی زمان و سووریەیەکا نەناڤەندی کو د سەری دە کورد و هەموو پێکهاتە تێ دە جهبگرن پێشنیار کر، ئاخافتنا سەرۆکێ هەرێمێ هەلوەستا هەرێما کوردستانێ ژ بۆی رۆژئاڤا دیار کر. ئەڤ ئاخافتن د سەری دە ژ بۆی ترکیێ و تەڤاهیا هێزێن کو دژبەرییا رۆژئاڤا دکرن پەیامەکی گرینگ بوو.
دیسا سەرۆکێ هەرێمێ د ئاخافتنا خوە دە پێڤاژۆیا د ناڤبەرا باخچەلی، ئەردۆگان و ئۆجالان دە شیرۆڤە کر و ئەڤ بلێڤکر کو هەلوەستا ئۆجالان زەلالە و دڤێت پەکەکە ژی دەملدەست ب شێوەیەکێ بلەز گاڤان باڤێژە.
رێڤەبەرییا کەجەکێ ژ ئاخافتنێن نێچیرڤان بارزانی ب مووچمکێ هنەک تشت هلبژارتن. و ئیدیعا کر کو پەکەکێ هەموو گاڤێن پێویست هاڤێتینە، و تا رۆژا دەرکەتنا عەڤدللا ئۆجالان د 9ی جۆتمەها 1998ێ ژ شامێ ئەڤ ئاخافتنێن نێچیرڤان بارزانی گەلەکی ب رامانن و ب قەست ئەڤ ئاخافتنە کرینە، واتە ل گۆر کەجەکێ نێچیرڤان بارزانی روونشتییە و فکرییە کا د سالڤەگەرا دەرکەتنا ئۆجالان ژ شامێ ئەز دکارم چ تشتێ خراب ببێژم. لێ ب راستی ژی ئەڤ شیرۆڤەیا کەجەکێ وەک حەنەکەکێ یە.
نێچیرڤان بارزانی کێم گۆتییە
شیرۆڤەیێن سەرۆکێ هەرێما کوردستانێ گەلەک راستن، نە تەنێ راستن بەلکو کێمن ژی، پەکەکێ قاشۆ خوە هلوەشاندیە، لێ بەلێ د تەڤگەرا خوە دە چ گوهەرین نەکرینە، هینا د چیایێن هەرێما کوردستانێ دە خالێن پشکنینێ داتینە، ناسنامەیێن گەلێ هەرێمێ کۆنترۆل دکە و سەنگەر و تونەلێن نوو ئاڤا دکە. هینا ژی خەلک نکارە بچە سەر ئەرد و گوندێن خوە، ئێ باشە تە خوە هلوەشاندییە و دەست ژ شەرێ چەکداری بەردایە، چما تو خوە ب چەکڤە ل پشت خەلکێ هەرێما کوردستانێ ب جی دکی.
مادەم کو وە هێژان لهەڤ نەکریە کا دێ چەکان ب چ ئاوایی دانن، گەلۆ چما وە خوە هلوەشاند، واتە تەنێ هوونێ ناڤێ پەکەکێ دانن کێلەکەکێ و ب ڤیرژنەک نوو هوونێ وەریسێ خوە بکن ستوویێ گەلێ کورد؟!
مادەم کو تە شەرێ چەکداری دایە راوەستاندن (جەمیل بایک بەری دەمەکی دەرکەفت و گۆت، هەگەر پێڤاژۆ بسەرنەکەت ژی ئەم ل هەمبەر دەولەتا ترک شەرێ چەکداری بەردەوام ناکن)، مادەم کو تو جارەک دن ل هەمبەر دەولەتا ترک چەکان بکار نائینی، باشە هێزێن تە یێن چەکدار چما ل سەرێ گارە، مەتینا و زاپێ بمینن؟!
هوون ژ کیژان ئالی ڤە دەست پاڤێژن مەسەلەیێ هوونێ ببینن کو سەقەتیەک د جیبجیکرنا ڤێ پێڤاژۆیێ دە هەیە، لیستک و شانۆیەک تێدە هەیە، واتە ب کورتاسی نێچیرڤان بارزانی راست گۆتییە، هەتتا ژ بەر سەدەمێن سیاسی و دیپلۆماتیک کێم گۆتیە، پەدەکە ژ دەستپێکا پێڤاژۆیێ ڤە د مژارا چەکدانین و هلوەشاندنا پەکەکێ دە گەلەکی زەلالە. ژ بەر کو ئەڤ پێڤاژۆیە بێی پرسگرێک دەرباس ببە، چ ژ دەستێ وێ تێ دکە، پەدەکێ ژ بۆی ڤێ پێڤاژۆیێ هەزار کارێن باش کرینە، لێ بەلێ پەکەکە نەدەرکەتییە و ژ بۆی پەدەکێ و هەرێما کوردستانێ سپاسیەک دەرنەکریە، سپاسیێ بهێلە، هیچ ئاماژە ب رۆلێ وان نەکریە، هەتتا رۆلێ وان ڤەشارتییە، ئەڤ ژی ل ملەکی، ئێریشێن خوە ب شکلەکی زراڤ زراڤ ل هەمبەر پەدەکێ و حەرەکەتا بارزانی بەردەوام کرییە، هێژان بەری دو سێ رۆژان ل شەنگالێ مەشەک کرن و د پێشییا مەشێ دە وێنەیەکێ سەرۆک بارزانی کو خوین ل روویێ وی دابوو هلدان، ئەڤ ب خوە ژی دژمناتییە.
پەکەکە ژ بۆی رێڤەبەرییا هەرێما کوردستانی و پەدەکێ وەها دبێژە، ئەز دێ ژ تەڤاهیا دەستکەفتیێن تە یێن دیپلۆماتیک، سیاسی و ئابۆری سوود وەرگرم، دەما سەرێ من کەت تەنگاسییێ ئەز دێ بەرێ خوە بدم تە و ئەز دێ ئالیکارییێ ژی ژ تە بخوازم، هەگەر پێویست بوو تویێ من ل پشتا خوە سووار بکی ژی، لێ بەلێ نابە تو یەک گۆتن ل سەر من ببێژی و من رەخنە بکی.
چما پەکەکێ پلەیا نێچیرڤان بارزانی بکار نەئانی؟
د داخویانیا کەجەکێ دە پلەیا بەسێ هۆزات و هەر کەسی تێ دە هاتیە بکارئانین، لێ بەلێ پلەیا نێچیرڤان بارزانی نینە. ئەڤ نێزیکبوون نە ب شەخسیەتا نێچیرڤان بارزانی ڤە گرێدایی یە، ئەڤ مەسەلە نەناسکرنا پەکەکێ ژ بۆی هەرێما کوردستانێ و رێڤەبەرییا سیاسی و ئیداری ڤەدگەرە، چاوا کو هەموو داگیرکەر دبێژن کو کورد نابن چ تشتەک و چاڤێن وان ڤەنابن دەستکەفتیێن کوردان ببینن، پەکەکێ ژی ل سەر هەمان خەتێ هەلوەست دانییە.
سەرۆکێ هەرێما کوردستانێ کو ژ ئالیێ تەڤاهیا دەولەتێن جیهانێ و سەرۆکێن وان تێ ناسکرن، پەکەکێ نەخواستییە ناس بکە، ما ئەڤ ب خوە نە دژمناتییە، ما ئەڤە سەکنینا ل سەر خەتا داگیرکەران نینە، ئەڤ ئێریشا کەجەکێ سینۆران ناس ناکە و دژمنانەیە، هەلبەت سەدەما وێ یا دەستپێکێ ب کاراکتەر و سیاسەتا پەکەکێ ڤە گرێدایی یە. لێ د ئالیەک دن دە ژی سەکنا مەدیایا هەرێما کوردستانێ و رەوشەنبیرێن هەرێمێ د ناڤا وی تشێ کو ژێ رە دبێژن پێڤاژۆ کا حەقیقەتا وێ چییە باش نەدانین هۆلێ.
ل سەر ڤێ خالێ ئەم دکارن مەدیایا رووداو ژی رەخنە بکن، ژ بەر کو رێڤەبەرییا وان یا وەشانێ و خەباتکارێن وان یێن کو پەکەکەیینە، بوون پەرچەیەک ژ پرۆپاگاندایا پەکەکێ، ئەڤ ب خەتا مەدیایا پەکەکێ و پرۆپاگاندایا وان رە بوون درێژاهیا وان، هەتتا ژ وان زێدەتر، وێ دەمێ دە خوەستن پەکەکێ پیروپاک نیشان بدن، لێ نها ژی دەما کەجەکە داخویانیەکێ وەک هەقارەت ژ بۆی نێچیرڤان بارزانی پارڤە دکە، ئەو خوە بێدەنگ دکن و گرنگیێ ب ڤێ مژارێ نادن، ئەڤ یەک ژی دهێلە کو پەکەکە جورئەت بکە کو پەیامێن ب ڤی ئاوا بوەشینە.
