پەکەکە، شەنگال، و چەند پرسەک
چەند پرس و بەرسڤێن سادە و راستەراست ب زمانەکی کو ھەتتا زارۆکێن دبستانا سەرەتایی ژی دکارن فێم بکن، راستیا شەنگالێ ژ ھەر کەسی رە وەرە ببیرخستن.
ما باشوورێ کوردستانێ نە یەکانە سازیا کوردییە کو خوەدی ستاتویا نەتەوەیی یە، ب قانوونی ھاتیە دامەزراندن، ل سەر بنگەھا یاسایان و ل چارئالیێ جیھانێ ژی تێ ناسکرن؟
ما سازیەکا قانوونی (رێڤەبەریا باشوورێ کوردستانێ) و سازیێن نەقانوونی (پەکەکە و بەرھەمێن وێ) دکارن د ھەمان کاتەگۆریێ دە، ب ھەمان ئارگومانان و وەکی وەکھەڤ بهێن نرخاندن؟
ما پەدەکە نە پارتیا ھەری مەزن یا د ناڤا حکوومەتا کوردستانێ دایە؟
ما پرسگرێک وەکی پەڤچوونا “پەدەکێ-پەکەکێ” وەرە نیشاندان و ھەر دو پارتی وەکھەڤ دیتن ما نایێ واتەیا نەناسکرنا یاسایێن کوردستانێ؟
ما مافێ ھەر دەولەتەکێ ل جیھانێ (فەدەرال، یەکگرتی و ھتد.)نینە کو ھەر جوورە سزایان ل دژی پێکھاتەیێن کو ھەبوونا وێ تەھدیت دکن فەرز بکە؟
سەرخوەبوون تەنێ ب راکرنا ئاستەنگیێن ل پێشیا سەرخوەبوونێ موومکنە؛ ما پەکەکە نە رێخستنەکا دژی سەرخوەبوونێیە؟
ما ھەر رێخستنا چەکداری کو ل کوردستانێ ھەبوونا خوە ددۆمینە و ل دژی مافێن نەتەوەیی/ئاڤاکرنا دەولەتێ بە، نە خزمەتکار/کرێگرتی و جەحشێن دەولەتێن سەروەرە؟
ما پەکەکە، کو ب ئەشکەرەیی ل دژی سەرخوەبوونا کوردستانێ دەردکەڤە و دخوازە شەنگالێ د بن ناڤێ “خوەسەریێ” دە ژ کوردستانێ ڤەقەتینە، گەلۆ ما ئەڤ نە سازییەکا جەحشاتیێ یە؟
ما پێشکێشکرنا سازیەکا جەحش وەکی سازیەکا نەتەوەیی نابە سپیکرنا جەحشاتیێ؟
ما ھەبوونا پەکەکێ ل باشوور ژ بۆ دەولەتا ترکیەیێ نابە ھنجەتا داگیرکرنا ھەرێما کوردستانێ؟
دەما کو باشوور ژ ئالیێ جەپھێ شیعەیێن سەر ب ئیرانێ و چەتەیێن گرێدایی وێ ڤە دخوازە بهێت خەندقاندن، ب ھنجەتا ‘پێوەندییێن ل گەل ترکییێ’ ئێرشکرنا سەر سەرخوەبوونا وێ ھەرێمێ ما نە جەحشاتییە؟
باشوور وەکە دەولەتەک فێعلی ما نە حەقێ وێیە کو دیپلۆماسیەک سەربخوە ل گەل ھەمی جیھانێ و ترکییێ ژی د ناڤ دە بمەشینە؟
ناکۆکیا بەرژەوەندیان د ناڤبەرا ھێزێن داگیرکەر دە دکارە جارنان ھندەک لایەنان نێزیکی کوردان بکە. ما نە سرووشتی یە کو باشوور ژ ڤێ ڤالاھییێ مفا وەربگرە؟
پەکەکێ، کو باکور وێران کریە و نەکاریە یەک بھۆست ئاخا کوردستانێ ئازاد بکە، ل باشوور چ دگەرە؟
ما پەکەکێ، ب تەرۆرا خەندەکان، گەلەک گوندەوار کو د گۆت “مە ئازادکرنە” وێران نەکرن و ب سەدان ھەزار کورد نەچار نەکرن کو کۆچبەر ببن (ل گۆری پلانا ئیسلاحێ یا رۆژھلات)؟
ما ھەمان زیھنیەتا کو وێرانکرنێ وەکی “ئازادی” پێناسە دکە، دکارە شەنگالێ ئازاد بکە؟
ما ھوون دخوازن شەنگال ژی وەکی سوور/جزیر/نسێبین/شرنەخێ بهێت “ئازاد” کرن؟
ما داخوازەک وسا نە خیانەتە ل کورد و کوردستانێ؟
تەڤی ڤان ھەموو راستیان، ما نە بێەخلاقیا ھەری مەزنە کو کەسێن کو دبێژن “دڤێت پەکەکە ژ شەنگال دەرکەڤە” ب “خوەستنا براکوژیێ” تاوانبار بکن؟
بەلێ، دڤێت پەکەکە ژ شەنگال دەرکەڤە؛ گەر پێویست بە ب دارێ زۆرێ.
گەر ل دژی چەتەیێن پەکەکێ، کو 45 سالن کوردان دکوژن، خیانەتا خوە فەرز دکن، شەرەکی پێویست بکە، وێ دەرێ وێژەیا “براکوژی” نایێ بکار ئانین. تشتێ کو دڤێت وەرە کرن ئەڤە کو جەحشاتی بهێت شەرمەزار کرن و بێ شەرت و مەرج پشتگری بدن ھێزێن نەتەوەیی یێن کو ل دژی جەحشا ھەلوەستێ وەردگرن. یێن کو نە خوەدی ھەلوەستەکا کوردستانینە تەنێ “وێژەیا براتیێ” کریە نیشانا بێروومەتی، بێەخلاقی و ژ ناڤ چوونێ.
سلەیمان ئاککۆیون
