ئاریان فەرەج

ھەفتەیا بۆری، د جڤینا میری ل ھەولێرێ دە، سەرۆک نێچیرڤان بارزانی د دەربارێ پرۆسەیا ئاشتیێ یا ل ترکیەیێ، گازندە ژ پەکەکێ کرن کو ب تەڤاهی گوهداریا بریارێن ئۆجالان ناکە و ھێڤی کر کو رەوش باشتر ببە دا کو دیسان ئاستەنگی ل پێشیا پێڤاژۆیا چارەسەریێ دروست نەبن.

ل شوونا کو شیرەتان ب جدی وەربگرن و گۆتنێ ب ئاوایەکی دۆستانە وەربگرن، کەجەکێ داخویانیەک توند ل دژی داخویانی و ھەلوەستێن سەرۆکێ ھەرێما کوردستانێ پارڤە کر، و هەلوەستێن سەرۆکێ هەرێما کوردستانێ ب ئاوایەکی نەرینی و ل دژی پێڤاژۆیا ئاشتی و چارەسەریێ شیرۆڤە کر.

د بەرسڤا بەرتەکا بلەز و نە گونجاو یا کەجەکێ دە، دھات تەخمینکرن کو ژ کەسێن نێزیکی سەرۆکێ ھەرێما کوردستانێ بەرسڤەک وەرە دایین و تۆھمەتێن کەجەکێ یێن ل هەمبەر نێچیرڤان بارزانی دە سەبارەت دژبەریا پێڤاژۆیا ئاشتیێ رەد بکن، لێ بەری کو ژ وێ دەردۆرێ ت بەرسڤ و زەلالکرنەک وەرە دایین، جهێ خوەشحالیێ بوو کو ژ ھێلا عەبدوللاھ ئۆجالان ب خوە ڤە نە ب تەنێ بەرسڤا وێ شیرۆڤەیا شاش هات دایین، بەلکو تەڤاھیا شیرۆڤەیا کەجەکێ سەروبن کر.

ئۆجالان د نامەیەکێ دە ژ سەرۆکێ ھەرێما کوردستانێ نێچیرڤان بارزان رە کو دوهی یەک ژ مالپەرێن ئامەریکی ئەڤ یەک ژ رایا گشتی رە ئەشکەرە کر، نە ب تەنێ داخوازا ڤێ یەکێ دکە کو سەرۆکێ ھەرێما کوردستانێ د پێڤاژۆیا ناڤبەینکاریێ دە رۆلێ خوە بلیزە ژ بۆ پێشڤەبرنا پێڤاژۆیا ئاشتیێ، بەلکو ھێڤی خواست کو سەرۆکێ ھەرێما کوردستانێ چاڤدێری و رێبەریا پرۆسەیێ بکە، و ڤێ یەکێ ژی پر ئەرێنی، گرینگ، ب نرخ و دلنیابەخش دبینە.

ھێڤیێن ئۆجالان ژ سەرۆک نێچیرڤان بارزانی ل گۆری ھەمان ھێڤی و باوەریا کو ئالیێن دن یێن د پێڤاژۆیێ دە د رۆل و پەرسپەکتیفا وی یا ئاشتیخواز و دیپلۆماتیک دە ھەنە نە، دڤێت ئەڤ یەک رێبەرێن کەجەکێ بخە هەمبەری رامان و ل خوەڤەگەرینێ. گەر ئەو ئاشتی و سەرکەفتنا پێڤاژۆیا چارەسەریێ دخوازن، دڤێت ئەو هوورتر، ئارامتر، ب بالداریتر و دۆستانەتر شیرۆڤەیان بۆ هەلوەستان بکن، ب تایبەت ھەلوەستا سەرۆک نێچیرڤان بارزانی، کو نە تەنێ د ڤێ پێڤاژۆیێ دە، لێ د ھەمان دەمێ دە د ئارامکرنا گەلەک ژ هەڤرکی و پرسگرێکێن دن یێن هەرێمێ دە وەکە کاراکتەر و فاکتۆرەک باشی، ئاشتی و چارەسەریێ تێ دیتن.

نڤیس ژ فەیسبۆکا نڤێسەر هاتیە وەرگرتن.

نڤێسەر ل بەشا راگهاندنا سەرۆکاتیا هەرێما کوردستانێ کار دکە..