باندۆرا ئیمرالیێ ل سەر رۆژئاڤایێ کوردستانێ!
تێ ئیدیعا کرن کو، د ڤان رۆژێن داوی دە، ل بازنەیێن سیاسی و ل سەر مەدیایا جڤاکی ئاگاھییێن شۆک، کو چاڤکانی و راستیا وێ نەھاتیە پشتراستکرن، ب لەز بەلاڤ دبە و بوویە سەدەما نیقاشەکا نوو ل سەر ھەڤسەنگیێن حەساس یێن ھەرێمێ و رۆژئاڤایێ کوردستانێ.
تێ ئیدیعاکرن، عەڤدللا ئۆجالانێ کو ل ئیمرالیێ بریارگەھ ئاڤاکرییە؛ ب ریا تەلەکۆنفەرانسەکێ لگەل رایەدارێن پلەبلندێن رۆژئاڤایێ کوردستانێ (رێڤەبەرییا خوەسەر) ئاخڤیە و د ڤێ ھەڤدیتنێ دە ئالۆزی دەرکەتیە.
ل گۆری ئیدیعایان، ئۆجالان ب رێیا کۆنفەرانسەکا ڤیدیۆیی تەعلیمات دایە شاندا 12 کەسی یا رێڤەبەریا خوەسەر، کو د ناڤ وان دە بەرپرسیارا تێکلیێن دەرڤە ئیلھام ئەحمەد ژی ھەیە. ئەساسێ ڤێ تەعلیماتێ ئەڤە کو عەڤدللا ئۆجالان ژ رێڤەبەریا رۆژئاڤا خوەستییە کو؛ “دەملدەست لگەل رەژیما شامێ بکەڤە تێکلیێ، دانوستاندنان بکە و ھێزێن خوە یێن لەشکەری لگەل ئارتێشا سووریێ بکە یەک.”
ئەڤ، د پراکتیکێ دە، تێ واتەیا تەسفییەکرنا ئاڤاھیا خوەسەر یا ھەیی و بەشداربوونا لگەل حکوومەتا ناڤەندییا سووریێ.
تێ گۆتن کو د جڤینێ دە کەسەکی ل ھەمبەری ڤێ “فەرمانا تەقەز” نەرازیبوون نیشان نەدایە. لێ ئیلھام ئەحمەد، بەرپرسیارا تێکلیێن دەرڤە، ھەول دایە رەوشێ راڤە بکە و دیار کریە کو؛ “راستیا ل قادێ سەپاندنا ڤێ بریارێ زەحمەت دکە و ئەڤ بریارە نە ژ لایێ ھەڤالبەندێن ناڤنەتەوەیی و نە ژی ژ لایێ گەل ڤە نایێ قەبوولکرن.”
بەشا ھەری بالکێش و ژ ئالیێ ئەخلاقی ڤە ھەری ب ئاریشە یا ئیدیعایێ ئەوە کو، ئۆجالان ل ھەمبەری ڤێ نەرازیبوونا ئیلھام ئەحمەد، ب توندی بەرتەک نیشان دایە. تێ ئیدیعاکرن کو ئۆجالان ب گۆتنەکا پر گران و ب سڤکاتی ئیلھام ئەحمەد ئارمانج گرتیە و ئەو ژ جڤینێ دەرخستیە. ل گۆری ئیدیعایێ، ئۆجالان رێڤەبەریا رۆژئاڤا ب ھەڤکاریا لگەل ھێزێن رۆژئاڤایی (ئامەریکا، فرانسا) تاوانبار کریە و ھێرسا خوە ئانیە زمان، ژ بەر کو فەرمانێن وی یێن ڤێ داوییێ ل رۆژئاڤایێ کوردستانێ نایێن جیبجیکرن.
دەمەک درێژە ئاگاھییێن کو ئۆجالان ب نامە و رێیا تەلەفۆنێ دەستوەردانێ د رێڤەبەریا خوەسەر دە دکە. پر جاران رێڤەبەرێن رۆژئاڤایێ کوردستانێ مەجبوور کرنە کو لگەل میتا ترکان دانوستەندنان بمەشینن و داخوازێن وان قەبوول بکن. ئەڤ ئیدیعا، ھەکە راست بە، ژ گەلەک ئالیان ڤە نیقاشێن کوور لگەل خوە تینە:
تەعلیماتا ئۆجالان یا یەکبوونا لگەل رەژیما شامێ، ب ستراتەژییا بنگەھین یا رێڤەبەریا رۆژئاڤا، کو سالێن درێژ ب ئیدەئالا خوەسەری و کۆنفەدەرالیزما دەمۆکراتیک تەڤدگەرە، ناکۆکە. ئەڤ یەک، ژ بۆ پێشەرۆژا ملەتێ کورد ل ھەرێمێ و ھەڤالبەندیێن ناڤنەتەوەیی یێن کوردان، دبە کو ببە سەدەما شکەستنەکا بنگەھین.
کەسەکی کو ل ئیمرالییێ ژ خوە رە بریارگەهەک ئاڤاکرییە، د دەستێ دەولەتا ترکان دەیە و خزمەتێ ژ بۆ کوردان ناکە. چاوا تێت قەبوولکرن کو ب رێیا تەلەکۆنفەرانسەکا وسا یا پلەبلند بریارەکا ھەری کریتیک یا ھەرێمێ بدە؟
ئەڤ مەکانیزمایێن سیاسی کو ل ئیمرالیێ ھاتنە ئاڤاکرن، نیشان ددە و ئیسپات دکە، ستراتەژییا ل سەر کوردان تێت مەشاندن، ستراتەژییا کوور یا دەولەتا ترک ب خوەیە. ئەڤ رەوش، باندۆرا سەمبۆلیک و فێعلی یا دەولەتا ترکان-ئۆجالان ل سەر تەڤگەرا پەکەکێ ژی پشتراست دکە.
ئیلھام ئەحمەد، یەک ژ روویێن ھەری ناسکری یێن رێڤەبەریا خوەسەرە و د قادا ناڤنەتەوەیی دە ھەری زێدە تێ موخاتەبگرتن. ئەڤ سڤکاتی و دەرخستنا ژ جڤینێ (ھەکە چێبووبە)، نە تەنێ مەسەلەیەکا شەخسییە، د ھەمان دەمێ دە وەکە کارڤەدانەکە ل ھەمبەری گرینگیا دەستکەڤتنێن ملەتێ کورد، کو رێڤەبەریا خوەسەر ژ تێکلیێن دیپلۆماتیک و ناڤنەتەوەیی رە ددە ژی بێت قابوولکرن.
سڤکاتیا ب ئیلھام ئەحمەدێ و دەرخستنا وێ ژ جڤینێ (ھەکە چێبووبە)، ژ نیقاشەکا د ناڤبەرا دو کەسان زێدەتر، ب ئاوایەکی زەلال جوداتیێن ئایدۆلۆژیک و ستراتەژیک یێن د ناڤبەرا باسکێن جودا یێن تەڤگەرا پەکەکێ-ئۆجالان و ملەتێ کورد دەردخە ھۆلێ.
د دەمەکێ دە کو رێڤەبەریا خوەسەر ل قادێ ھێزەکا فێعلی ئاڤا کریە، فەرمانا “ڤەگەرێ” یان “تەسلیمیەتێ”یا ژ چاڤکانیا ئایدۆلۆژیک یا سەرەکی، دکارە تێکۆشینا رۆژئاڤایێ کوردستانێ ژ بۆ دیارکرنا چارەنووسا خوە بەر ب قەیرانەکا نوو ڤە ببە. ئەڤ ئیدیعا، جارەکا دن نیشان ددە کو پێشەرۆژا ھەرێمێ نە تەنێ ل ئەنیێ، لێ د ھەمان دەمێ دە ب تەعلیماتێن کو عەبدوللاھ ئۆجالان و دەولەتا ترکان کو د پشت پەردێ تێن مەشاندن، بنپێکرنا ئیرادەیا ملەتێ کورد ب خوەیە.
دەولەتا ترک و عەڤدللا ئۆجالان ب ھەڤ را ڤێ بنپێکرنا ئیرادەیا ملەتێ کورد دمەشینن. دڤێت ملەتێ کورد ل ھەنبەر ڤێ باندۆرا خەراب خوەدی ھەلوەست بە و رێ نەدە کو کوردێن رۆژئاڤایێ کوردستانێ دەرفەتا دەستکەڤتنێن خوە وەندا بکن.
