پاشڤەکشینا پەکەکێ پێنگاڤەک دیرۆکییە یانژی خیانەتەکە دن؟
ئیرۆ رۆژا یەکشەمی، پەکەکێ راگهاند کو تەڤ هێزێن خوە یێن ل باکورێ کوردستانێ ڤەدکشینە باشوورێ کوردستانێ، ئەڤ پێنگاڤ ژی وەکە پێنگاڤەکە دیرۆکی ب ناڤ کر، لێ بەلێ د راستی دە ئەڤ نە تەنێ پێنگاڤەکە دیرۆکی نینە، بەلکو پێنگاڤەکە دن یا خیانەتێ یە کو وێ ل سەر پێنگاڤێن دن یێن خیانەتێ یێن ڤێ پارتیێ زێدە بە.
ب سالانە، په‌كه‌كه خوە وەکی ھێزەک بەرخوەدانێ ل دژی پۆلیتیکایێن تەپەسەرکرنێیێن حکوومەتا ترکیەیێ پێشکێش دکە؛ لێ نھا، نووچەیا ڤەکشینا وێ ژ ئاخا ترکیەیێ ژ بلی قوتبوونا ژ ھەمان سلۆگانان تشتەک دن نینە. ڤەکشینا ل هەمبەر ترکیەیێ کو ھین ژی خوینا ب ھەزاران کوردان ب دەستێن وێڤەیە، ژ تەسلیمبوونا ل ھەمبەر پەرگالەک شەرم و جوداکاریێ وێدەتر تشتەک دن نینە.
تشتێ کو په‌كه‌كه ژێ رە دبێژە “تاکتیک” د راستیێ دە پاشڤەکشینەک ژ ئیدیالێن گەلێ کو ل چیا و باژاران ژ بۆ ئازادیێ بەدەلێن گران دانەیە. د دیرۆکا لێگەرینا ئازادیێ دە تو کەسی ب پاشڤەکشینێ مافێن خوە ب دەست نەخستیە. ئەڤ گاڤ نە تەنێ دژمن ب جەسارەت دکە، لێ د ھەمان دەمێ دە د ناڤ رێزێن کەسێن کو ھین ژی باوەریا وان ب ئیحتیمالا بەرخوەدانێ ھەیە دە ڤالاھیەکێ چێدکە.
گەر بریار بە پێشەرۆژەک ئازاد و وەکھەڤ وەرە ئاڤاکرن، ئەڤ نە رێیا درستە. ڤەکشینا ژ ئاخا ترکیەیێ پاشڤەکشینە ژ وژدانا دیرۆکی یا نەتەوەیەک بندەست، نەتەوەیەکێ کو ب سالان ل دژی ھلوەشینا چاندی و ناسنامەیا خوە راوەستیایە.
په‌كه‌كه ب سالان د بن ناڤێ بەرخوەدانێ دە چیا و دەشتێن کوردستانێ ب خوینا جوانێن کورد سۆر کریە. لێ ئیرۆ، نووچەیا ڤەکشینا خوە ژ باکورێ کوردستانێ، بێی ت دەستکەفتیەکە نەتەوی وەکە پێنگاڤەکە دیرۆکی و د بەرژەوەندیا گەلێ کورد دە ددە نیشاندان. نە پەکەکە و نەژی ت هێز و ئالیەک نکارە ڤێ پاشڤەکشینێ رەوا بکە، نە تاکتیک، نە ئاشتی، نە سیاسەت نە ت تشتەک دن، تەنێ یەک پەیڤ هەیە کو ڤێ پێنگاڤێ راڤە بکە کو ئەوژی: تەسلیمبوونە.
مرۆڤ چاوا دکارە ژ ئاخەکێ کو پیر و کال، زارۆک و جوانێن وێ ھین ژی د بن خربەیێن پۆلیتیکایێن کۆلۆنیال دقیرن، ڤەکشە؟ مرۆڤ چاوا دکارە ل ھەمبەر دژمنەکی کو قرکرنا چاندی و سیاسی ددۆمینە گاڤەکێ پاشدە باڤێژە؟ ئەڤ ڤەکشین نە بریارەک سیاسییە و نە ژی ستراتەژیەک لەشکەرییە، ئەو قوتبوونەکە ستراتەژییە ژ دۆزا گەلەک بندەست. ڤەکشینا ژ ترکیەیێ تێ واتەیا تەرکاندنا قادا شەرا کو ھین ژی دشەوتە.
دیرۆک دێ ڤێ پاشڤەکشینێ ژ بیر نەکە. تو ھێز، تو پەیمان نکارە لەکەیا ڤێ تەسلیمبوونێ ژ ئەنیا وان کەسێن کو رێیا ڤەکشینێ ل شوونا بەرخوەدانێ ھلبژارتنە ژێ ببە. ئەڤجا پێویست ناکە ب ت پەیڤ و کەسەکی پەکەکە هەول بدە ڤێ تەسلیمبۆنێ وەکە پێنگاڤەکە دیرۆکی ب کوردان بدە قەبوولکرن، ئەڤ پێنگاڤ ژ بلی تەسلیمبوون و خیانەتکە دیرۆکی و نیشتیمانی نە ت تشتەک دنە.
