مەمەت مێردینی

پەکەکێ، کو بەرێ خوە وەکی ئالاھەلگرا ئازادی و دادپەروەریێ ژ بۆ گەلێ کوردستانێ ب ناڤ دکر، نھا د رەوشەکە خەتمی دەیە. ڤێ پارتیا قاشۆ کوردستانی ب سالانە، درووشمەیێن بەرخوەدان و پاراستنا نەتەوەیا کورد هلگرتین و ل هەر دەرێ ڤان درۆشمەیان ب ئالیگرێن خوە ددە قێرین، لێ د پراکتیکێ دە، سیاسەتێن ڤێ رێخستنێ تەنێ بوون سەدەما وێرانی، بێھێڤیبوون و کۆچبەریا گەلێ کورد، بوون سەدەما شەوتینا گوند و باژارێن کوردان. شەر و پەڤچوونێن لەشکەری یێن بێداوی و بێیی ئاسۆیەک زەلال پەکەکە ژ رەواتیا گەل بێپار ھشتیە و باوەریا جڤاکێ ب تەڤاھی ھلوەشاندیە.

پاشڤەکشاندنێن بەردەوام، پەیمانێن ڤەشارتی لگەل ھێزێن ھەرێمی، و بالکشاندنا سەر بەرژەوەندیێن ناڤخوەیی یێن رێخستنێ نیشان ددن کو پەکەکە تجاری نوونەرا راستەقینە یا نەتەوەیا کورد نەبوویە؛ بەرەڤاژی ڤێ، ئەو تەڤگەرەکە کو پیرۆزیێن دیرۆکی یێن گەلێ کورد ژ بۆ ماییندەبوونا خوە فەدا کریە و دکە، پەکەکە پارتیەکە ئەوقاس خایینە کو ژ فەداکرن و قوربانیکرنا ت پیرۆزیەکێ خوە ب دوور ناگرە، ئەڤ پارتی هەما بێژە بوویە کارگەها ب کوشتندانا جوانێن کورد، فرۆشتنا ئاخا کوردستانێ ب دەولەتێن کۆلۆنیالیست و ئاسمیلەکرنا کوردان د ناڤا دەولەتێن داگیرکەر دە.

دیرۆک دێ پەکەکێ نە ب سەربلندی، لێ ب تێکچوونێن ل پەی ھەڤ، تەڤلھەڤی و دەرفەتێن دیرۆکی یێن ژ دەست چوونە ب بیر بینە. سیاسەتێن بێ باندۆر و نەکارینا گوھەرتنا رێیێ ئەڤ رێخستن ڤەگوھەراندیە سەمبۆلا تێکچوونێ، رەوشا نها یا پەکەکێ تێ دە ژیان دکە، نیشان ددە کو چقاس درووشمە و پرۆپاگاندایێن خاپینۆک بلند بن ژی، راستیا تەعل نایێ ڤەشارتن، وەکە کورد دبێژن، روویێ رۆژێ ب بێژینکێ نایێ گرتن.

سیاسەتا پەکەکێ ژ خاپاندن و تێکچوونا دوبارە زێدەتر تشتەک دن نینە. رێخستنا کو خوە وەکی پارێزڤانا ئازادیێ ب ناڤ دکە، ئیرۆ بوویە ئاموورەک ژ بۆ بەرژەوەندیێن کەسانە و ھێزێن ھەرێمی یێن داگیرکەرێن کوردستانێ. سلۆگان و بریارێن نەئاقلانە یێن پەکەکێ تەنێ وێرانی و کۆچبەری ژ بۆ گەلێ کوردستانێ ئانییە.

ئیرۆ، پەکەکە نە خوەدی ھێزا باندۆرکرنێیە و نە ژی مەشرووعیەتا گەل ھەیە؛ تشتێ کو مایە ناڤێ تەڤگەرەکە د رەوشا ژناڤچوونێ دەیە کو دێ د دیرۆکا کوردان دە وەکە رێخستنەکا خایین و وەلاتفرۆش هێت ببیرئانین.