بووبێ ئەسەر

باب و دایکێن گەریلایێن پەکەکێ، زارۆکێن وە ژ بۆنا ئازادی و سەرخوەبوونا کوردستانێ، ب وێرەکی چوون سەرێ چیایێن کوردستانێ دا کو وەلاتێ خوە ئازاد بکن.

د ئارمانج و ھەدەفا وان دە دەمۆکراتیکبوونا ترکیێ تونە بوو. دەمۆکراسیا سەردەستان نە کارێ وەلاتپارێز و شۆرەشگەرێن ملەتێن بن دەستە. تەکۆشین ئازادی و بەرخوەدانا وان ئەوە کو وەلاتێ خوە ئازاد و خەلکێ خوە بپارێزن.

ھەر جوانەکی کو چووی سەری چیا و بوویە گەریلا، ئارمانج، ھەدەف و داخوازا وان ئەو بوو کو وەلاتێ خوە ئازاد بکن. ئالا کوردستانێ د ناڤا ئالێن جیھانێ دە بلند بکن. مرۆڤێن خوەیێن سەد سال بوو کو وەکە کۆلە دژیان، ژ وێ کۆلەداریێ ئازاد بکن.

ژ بۆنا ئەو شەر بسەربکەڤە و کوردستان ئازاد ببە، ملەتێ کورد بەدەلێن مەزن دان. مال و زارۆیێن خوە دان، جان و پەرەیێن خوە دان. زارۆکێن خوە شاندن کو کوردستانێ ئازاد بکن.

لێ مخابن ئیرۆ تێ فێمکرن کو ئەو بەدەلە ھەمی ژ بۆنا دەمۆکراتیکبوونا داگیر-کەران بوو. ئیرۆ ھات فێم کرن کو ئەوقاس بەدەلێن ھاتین دایێن ھەمی ژ بۆنا دەمۆکراسیا ترکیێ بوو. ئێدی ئەڤ زەلال و ڤەکری ھاتیە فێم کرن.

پەکەکە دبێژن: “مە چەک دانین و ئێدی ئەم دێ ل ھەمبەر ترکیێ چەکان ب کار نەینن”. واتە چەکدانینا وان تەنھا ل ھەمبەر دەولەتا ترکە. ئەو ژی تێ وێ واتایێ کو ژ بۆنا ترکیەکا خورت ئەو بەدەلە ھاتبوون دایین.

بالا خوە بدنێ رۆژا پەکەکێ چەکێن خوە دانی و ھەتا نھا 130 گەریلەیێن خوە کوشتنە. ئەز وەھا باوەرم دێ ئەڤ کوشتنە ل ڤر نەسەکنە. ھەتا کو پەکەکە خوە ب تەمامی ھلوەشینە و ل مالا خوە ڤەنەگەرە، دێ ھەمی گەریلایێن وەلاتپارێزیێن د ناڤا خوە دە بکوژن پشترە ژی دێ ب تەمامی چەکێن خوە ل خوەدیێ وان ڤەگەرینە.

ژ بەر ڤێ، گازی دایک و بابێن گەریلایێن قەھرەمان دکم کو دڤێت خوەدی ل زارۆکێن خوە دەرکەڤن. یان نە یەک گەریلایێ کورد کو بێھنا کوردستانێ ژ وی بهێت نەمینیت. پشتی قاشۆ چەکدانینێ دێ ھەمیان بکوژن. ژ خوە ئارمانجا پەکەکێ یا  ب تەمامی نەتەسلیمکرنا چەکان یەک ژێ ژی ئەڤە.

دڤێت ئەم و ھەمی دایک و بابێن گەریلایان، خوەدی ل وان دەرکەڤین. ژ بۆنا نەیێن کوشتن، ب رێیا کۆمەلەیێن ناڤنەتەوەیی یێن ئینسانی، ب رێیا خاچا سۆر و ل سەر دەستێ ئەمنستێ دڤێت ئەم خوەدی ل وان گەریلایێن ژ بۆنا ئازادیا وەلاتێ خوە چووبوون سەرێ چیایان دەرکەڤین، بپارێزین و وان ل دایک و بابێن وان ڤەگەرینین.

ھەگەر ئەم وەکە ملەتێ کورد ل ھەمبەر کوشتنێن ل سەر دەستێ پەکەکێ یێن کو پشتی چەکدانینێ دەرنەکەڤن، بێ ھەلوەست بمینین، دێ گەلەک گەریلایێن جانفیدا هێنە کوشتن. ژ گەریلەیێن تێنە کوشتن تێ فێم کرن کو گەریلایێن پشتی چەکدانینێ ژی  ئانجاخ ژ جاران یەک ساخ بمینن، ئەوژی یان وێ زلامێن دەولەتێ بن، یانژی مریدێ عەڤدلا بن.

دە کەرەم بکن و دڤێت ئەم وەکە ملەت ب ھەڤرە ل دژ کوشتنێن گەریلا یێن پشتی چەکدانینا پەکەکێ، بێ دەنگ نەمینن. ژ بەر کو ئێدی پەکەکە ل گۆر گۆتن و رێنیشاندانا باخچەلی تەڤدگەرە. مرۆڤ ب رەحەتی دکارە بێژە کو سەرۆکێ پەکەکێ نھا باخچەلی ب خوەیە.

دایک و بابێن گەریلایان خوەدی ل زارۆکێن خوە دەرکەڤن. وان ب تەنێ نەھێلن. یان نا ھوون دێ جەنازەیێن وان ژی نەبینن. سەری ل حکوومەتا ھەرێما کوردستانێ بدن دا کو ئەو ژی ژ وە رە ببن ئالیکار. نامەیان ژ سەرۆکێ ھەرێما کوردستانێ رێزدار نێچیرڤان بارزانی رە بشینن دا کو ئەو د قادا ناڤنەتەوەیی دە خوەدێ ل زارۆکێن وە دەرکەڤە.

کوردنۆ، سیاسەتمەدارنۆ، پارتی و رێخستننۆ، ژ ڤێ رەوشا نوو یا پەکەکێ ھایدار بن. یەکیتیا خوە پێک بینن دا کو ھوون ژی نەقەدن و خوەدی ل زارۆکێن خوە و ل گەریلایێن جانفیدایێن وەلاتێ خوە دەرکەڤن.

ب مەش، خوەپێشاندان، بەلاڤۆک، سمینەر و کۆنفەرانسان ڤێ رەوشێ ژ بۆ ئەورۆپیان زەلال بکن. زەلال بکن و بدن فێھمکرنێ کو ھەر کوشتنا گەریلایەکی پشتی پێڤاژۆیا ئاشتیێ(!) کو دەستپێھاتیە کرنێ، قاتیل ئانگۆ کوژەر پەکەکە و دەولەت ب خوەیە…

نڤیسا خوە ب گۆتنەکا باقی قەرار دقەدینم. “پەکەکە تەڤگەرەکا کورد کوژە.”