بافل تالەبانی وەکی جانەوەرێ میکرۆفانا دهێت ناسکرن… وی سالا پار دەما ھلبژارتنا پارلامەنتۆیا ھەرێما کوردستانێ میکرۆفۆن دشکاند و ئەڤ سیفەتە بدەست خستبوو. ئیسال ل سەر مژارەکا دن سیفەتا پسپۆرییێ وەرگرت. ئەوژی پسپۆرییا بێبەختی و درەوایە…
بافل تالەبانی دەرەنگ ھاتە ناڤا مەیدانا سیاسەتێ، لێ چاوا ھات وەک دونیا نەدیتی و چاڤ برسییان خوە ئاڤێت ناڤا مەیدانێ. نە پیڤان، نە وەفا، نە رەحم چ تشت پێرە نەبوو.
کا بینن بیرا خوە وە کەنگی روو و ناڤێ بافل تالەبانی سەر ھەڤ سەر ھەڤ ل سەر شاشا دیت. ھەلبەت وەختێ 22یی ئۆکتۆبەرێ… پشتی کو کەرکووک تەسلیمی حەشدا شەعبی کری. ب بێشەرمی دەرکەت سەر شاشان، د دەستێ وی دە ژی نامەیەک ھەبوو، گۆت مە کەرکووک ب ئیمزەیا ٣٨ ئەندامێن سەرکردایەتیا یەنەکێ تەسلیمی ئیراقێ کر. بافل ئەڤ یەک ب ئاوایەکی دگۆت ھەر وەک نە ئیخانەتەکا نیشتیمانی بت، ھەر وەک کەرکووک رادەستی خوەدیێ وێ یێ رەسەن کربە و نە باژارەک کوردستانێ بە.
دبێژن کو ھاتنا پێنجشەمبێ ژ چارشەمبێ دیارە..
ڤێ ناڤ و دەنگ بوونا ب ئیخانەتا کەرکووکێ گەلەک تشت دان دیارکرن. بافل تالەبانی نە خوە و نەژی شۆپا خوە ھیچ نە گوھارت. سەر ھەمان سلبیاتان (نیگەتیفان) بەردەڤام بوو ھەتا رۆژا مەیا ئیرۆ…
پشتی کەرکووک تەسلیم کری چ چێبوو وەرن ئەم بینین بیرا خوە…
ل ناڤ یەنەکێ دە چیرۆکا ھەڤدو ژەھری کرنێ دەرکەت. ھەڤال و برا، دۆست و رێڤەبەر ھەر کەسێ گۆت ئەم ھاتنە ژەھریکرن. ھەڤدو تومەتبار کرن، ناڤ خوە مەسەلە برن و ئانین و پشترە ژی شوور ژ بۆی ھەڤدو کشاندن.
ئەڤ کەسێن کو کەدکارێن یەنەکێ بوون، وەک مەلا بەختیار و ب دەھان کەسێن دن، د شەڤەکی دە ژ یەنەکێ ھاتن ئاڤێتن. ڤێ بھێلە دەست دانین سەر مال و ملکێن وانژی.
کەسێن موخالیف یێن د ناڤا یەنەکێ دە، وەک موراد کانی کوردەیی، ھاوکار جاف و ب دەھان کەسێن دن ھاتن کوشتن.
بافل تالەبانی کۆنگرەکی سەیر د ناڤا یەنەکێ دە چێکر، وی دەستێ ئەنیا شیعە، کەسێن وەکە قەیس خەزعەلی و کەسایەتێن حەشدا شەعبی گرت و کۆنگرە لگەل وان چێکر. ئەڤ وێنە راستی بوو. و پشتی ڤێ کۆنگرێ قەت ژ خەتا حەشدا شەعبی دەرنەکەت…
ھەکە تو بێژییە بافل تالەبانی ھەڤال کوژ، راستە…
ھەکە تو بێژییە بافل تالەبانی تو خاک فرۆشی، راستە…
ھەکە تو بێژییە بافل تو گەندەلی و پەرەیێن گومرکێ ددزی، ئەڤە ژی راستە…
ھەکە تو بێژییە بافل تو شۆرەشگێرێن رۆژھلاتێ کوردستانێ دفرۆشی ئیرانێ، ئەڤ ژی راستە…
ھەر تشتێ خەراب دکە بەس چەرمێ روویێ وی گەلەک قاھیمە. ل مەیدانا بەحسێ دەمۆکراسیێ دکە… دبێژە من کەرکووک رزگار کر.
چوو ھەولێرێ و گۆت، تشتا گرینگ نە خزمەتە، بەلکو ئازادییە… بلا تامام، تو بەحسا کیژان ئازادیێ دکی… ئازادی ئەوە تو ب تانکا ئێرشی ئۆتێلا لالەزار بکی؟.
دبێژی گەندەلی ھەیە. کیژان گەندەلی یا دەریێ باشماخ..
دبێژە سیاسەتمەدار ژ بۆی خوە پارە کۆم دکن. یاا، کا مولکێن تەیێن لەندەن، و کا قاسەیا ڤەشارتی یا دەباشان…
بافل تالەبانی ئەڤ 8 سالن ھاتیە مەیدانا سیاسەتێ، لێ ب قاسی 30 سالان کریارێن گەنی و قرێژ ل دەورووبەرێ خوە کۆم کرن.
عەیبە کەسەکی وەکە ڤی سەرۆکێ پارتیەکێ بە ل کوردستانێ.
ئەساسەن دڤێت جەماوەرێ یەنەکێ و خەلکێ سلێمانیێ ژ بافل تالەبانی رە ببێژن ئێدی بەسە. ڤێ سیاسەتا خوە یا قرێژ و پاشڤەروو ھلوەشینە…
