هاته دیاركرن کو دەمێ ئالۆزییا شۆڕشێ ب دوماهی هاتییە و قۆناغا هزرکرنا سیاسی یا ب ڕێک هاتیه دهستپێكرن.
ئەو ب زمانەکێ تازه ئاخڤت، زمانێ دەولەت و قانوونێ، نەکو زمانێ درووشمێن ئایدۆلۆژی.
مهزلووم عهبدی دوپات كر كو پێدڤییه دەستوورەکێ نوو بۆ سووریێ بهێتە دانان کو مافێن کوردان تێدا پاراستی بن، و ئێکەتییا سیاسی یا سووریێ د شێوەیەکێ دی دا بیت، و کورد ژی پشکدار بن د دانانا پاشەرۆژا وەلاتی دا، ههر وهكو وی گۆتنێن سهرۆك مەسعوود بارزانی دگۆتنە ڤە، یێ کو هەردەم ل هەمی کۆمبوونێن جیهانی گۆتی: چ چارەسەرییەک ل ڤێ دەڤەرێ دادپهروهر نابیت، ئەگەر مللەتێ کورد و مافێ وی یێ چارەنڤیسیێ بهێتە پاشگوهـ كرن.
ئەڤ لێکنێزیکبوونا فەلسەفی ژ ڤالاهیێ نینە، بەلکو ژبەر هەستەکا دیرۆکی یا هەڤپشکە کو دبێژیت دەم هەتا هەتایێ ل هیڤیا خەیالپەرێسان نا مینیت، بەلکو دهرفهتهكا کورت ددەتە وی کەسێ بشێت ئێش و ئازارێن خوە بکەتە دام و دەزگەهەکێ سیاسی.
د سالێن بووری دا، رێبهرێ كوردان و سهرۆك (مەسعوود بارزانی) ل بەراهییا جیهانێ د گۆتارێن خوە یێن مەزن دا ڕاوەستیایە و گۆتیە کو مەسەلا کوردی نە مەسەلا سەرکێشی و ئاسێبوونێ یە، نە یا چەند گرۆپەکێن چەکدارە، بەلکو مەسەلا مللەتەکی یە، خودان ئەرد و شۆناس و دیرۆکە، و ئەوی بهایەک دایە مللهتێ كورد کو تنێ ئەو مللەتێن ل جهێ خوە د ناڤا مەزنان دا دگەرن ددەن.
ئەڤ هشیارییا نەتەوەیی یا واقعییه – نە یا خەیالیه – رامانا فەلسەفا سیاسی یا بارزانیزمێ یه یە، کو شۆڕشێ تنێ وەکو ئارمانج نابینیت، بەلکو وەکو پرەک دبینیت ژ بۆ ئاڤاکرنا دەولەت و دامەزراوان و دانپێدانەکا جیهانی.
ژبەر هندێ ژی بارزانی دەنگێ خوە ب درووشمێن خەیالی وەک یێن ئۆجالانی بلند نەکرییە، بەلکو ب گرێبەستێن نەفتێ، ب هەڤپەیمانیێن جیهانی، ب ئاڤاکرنا دامەزراوێن حوکمرانیێ، و پاشی ب ئەنجامدانا وێ ڕیفراندۆما دیرۆکی یا کو جیهان نەچار کری گوهێ خوە بدەتە ڕاستیا کوردی، حەتا ئەگەر ل دژ ژی ببن.
ل بەرامبەر دا، ئۆجالانی فەلسەفا خوە ل سەر ئینکارکرنا دەولەت و سنۆر و شۆناسا نەتەوەیی ئاڤا کر، و مەسەلا کوردی نە وەک یا گەلەکێ کو ل دەولەتێ دگەڕێت دیت، بەلکو وەک مەسەلەکا ئینسانی دیت کو دڤێت شۆناس تێدا بحەلیێن د جیهانەکا بێ دەستهەلاتا سیاسی یا ناڤەندی دا، ئەڤ بۆچوون د پەرتووکان و زیندانان دا هاته نڤیسین و ل بن سیبهرا داگیرگهران هاته دارێشتن و بهلاڤ كرن و بریار ل سهر پارتیا كاركهران كر كو دهملدهست و بێى دانوستاندن بهێته جیبهجێكرن.
لێ ئەڤرۆکە ل هەمبەر ئاستەنگیێن دەستوور و قانوون و دانپێدانا جیهانی، ناچیتە سەرى، ژ بەر کو یێ بڤێت ل گەل دهولهتێن داگیرگهر دانوستاندنێ بکەت، ناگههیته مافێن خو گهر خۆ پێناسه نهكهت، و بێى پرۆژەکێ سیاسی یێ ڕوون کو مافان ب شێوەیەکێ قانوونی مسۆگەر بکەت.
لەوا گۆتارا مەزلووم عەبدی وەکو دانپێدانەکا دیرۆکی بوو کو زەمانێ شورهشێ ب سەر زەمانێ دیمۆكراسیكرنا گهلان کەفتییە، و ڕاستڤەکرن ڕێیا خیانەت نینە، بەلکو ڕزگارکرنا قوربانیێن وان کەسانە یێن خوینا خوە ل سەر ڤی ئەردی رژاندی.
و دەمێ چەند ڕۆژەک بەری نھا نێچیرڤان بارزانی پەیڤی و گۆتی کو چارەسەرییا مەسەلا کوردی ل ڕۆژئاڤا دڤێت چارەسەریەکا سووری – نیشتمانی و دەستووری بیت، کو مافێن کوردان مسۆگەر بکەت و دانپێدانەکا فەرمی بدەتە وان.
نێچرڤان بارزانى ئەو هاوكێشه دانا، کو چ پرۆژه د سۆزداری نینن، بهلكو ڕەوایەتیا جیهانی بتنێ ب دیالۆگ و لێکهاتن و دامەزراوێن قانوونی دهێتە وەرگرتن، نە ب خەیالا بیرمهندهكێ زیندانى یێ خو رادهستكرى.
دەمێ نێچیرڤان بارزانى بانگ ل کوردان کری کو ل سووریێ ببنە ئێک و دەست ژ ناکۆکیێن ناڤخۆیی بەردەن، ئەو ژ جهێ ئامۆژگارەکێ نەدپەیڤی، بەلکو ژ جهێ ئێکێ کو دزانیت جیهان بتنێ سەرەدەریێ ل گەل هێزێن ئێکگرتی دکەت یێن کو دشێن پرۆژەیهکێ واقعی و باوەپێکری پێشکێش بکەن.
هەمان نێرین د گۆتارا مەزلووم عەبدی دا هەبوو، دەمێ ئاماژە ب گرنگیا ئێکڕێزییا کوردان ل سووریێ كرى، و پێکئینانا پەیوەندییەکا دەستووری و ئاسایی ل گەل دەولەتا سووریێ، و ڕەتکرنا وێ لۆژیكێ ئالۆزیێ یێ کو ب سەدان ئالا و سەرکردهیێن شەرکەر ب دوماهی هات.
تێکهەلییا ڤان گۆتاران نیشا ددەت کو هشیاریەکا نەتەوەیی یا نوو ژ دایک دبیت، کو ئێدی خەباتا کوردی نە تنێ خەباتا چیا و تڤەنگێ یە، بەلکو خەباتا ڕەوایەتیا سیاسی، دیپلۆماسی و پێدڤیێن قانوونی یە.
خوینا کو ل کۆبانێ و شنگال و زاخۆ و دهۆک و کەرکووک و سەرێ کانیێ ڕژیایی، دڤێت نە تنێ ببیتە داستانەکا قارەمانیێ کو پەرتووکان و گۆتاران بخەملینیت، بەلکو ببیتە بنەمایەک ژ بۆ ئاڤاکرنا پاشەرۆژەکا قانوونی و دەستووری کو مافێن کوردان د نەخشەیەکا سیاسی دا کو جیهان دانپێدانێ پێ بکەت، پاراستی بن.
چرکەساتەیە یا کو گۆتارا مەزلووم عەبدی پتر نێزیکی قوتابخانهیا بارزانی یا واقعی دکەت، نەک یا ئۆجالانی یا خەیالی.
بارزانیێ باب و کوڕ زانی کو جیهان ڕێزێ ل یێ بهێز دگریت، دەمێ ئەو بزانن کا چ ژێ دڤێت.
مەزلووم عەبدی ژی ئەڤرۆ گەهشت وێ باوەریێ کو ماف ب قیژ و گازییا و خەونا شۆڕشێ یا بەردەوام ناهێنە ستاندن، بەلکو ب شیانا دانانا ڕێککەفتنەکا سیاسی یا گشتگیر دهێنە ستاندن.
دەمێ ئۆجالانی مەسەلا کوردی کریه پرۆژەیهکێ ئینسانی بێ چارچووڤەکێ سیاسی، بارزانی کرە پرۆژەکێ دیرۆکی خودان ڕهـ و دامەزراوە و سنۆر و گۆتارەکا ڕەوا، و ئەڤرۆ ژی عەبدی هەول ددەت ڕۆژئاڤایێ کوردستانێ ژ تەم و مژا شۆڕشێ دەربێخیت و بینیتە بەر ڕۆناهیا قانوونێ.
چرکەساتەکا دەگمەن د دیرۆکا کوردی دا چێدبیت: چرکەساتا گەهشتنا هزرا واقعی یا کریارا سیاسی یا کوردی ل دهۆک و قامشلۆ، د ناڤبەرا تەجروبەکا کو ل کوردستانا ئیراقێ خوە سەلماندی و تەجروبەکا کو ل ڕۆژئاڤا ل دانپێدانێ دگەڕێت.
ئەگەر ئەڤ چرکەساتە ببیتە ئێکەتیا بۆچوون و گۆتارێ، مەسەلا کوردی ل سووریێ ئێدی نابیتە پاشکۆیێ چ پرۆژەیهکێ دهرهكی، بەلکو دێ بیتە پرۆژهیهکێ نەتەوەیی یێ ڕەسەن کو چ چارەسەرییەکا سووری یان هەرێمی نەشێت بێی وی بچیتە سەر.
