ھلبژارتنێن دەورا 6ێ یا پارلامەنتۆیا ئیراقێ ب داوی بوون. رەوشا پارتیێن کوردی وھایە:
پەدەکە گھیشت ئارمانجا خوە یا 1 ملیۆن دەنگان و ژ وێ دەرباس بوو، پەدەکێ سەرکەفتنەک مەزن د ھلبژارتنێ دە ب دەست خست. ل ھەموو باژارێن کوردان رێژەیا دەنگێن خوە زێدە کر. ھەتا کۆتایا ژ بۆ کرستیان، ئێزدی و کوردێن فەیلی ژی ب دەست خست. سەرکەفتنا پەدەکێ تێ ڤێ واتەیێ:
1- کورد پشتگریا ھەلوەستا پەدەکێ یا ل دژی کریارێن حکوومەتا فەدەرال یا ئیراقێ دکن.
2- کورد پشتگریێ ددن سییاسەتا پەدەکێ یا د ناڤ جڤاکا کورد دە.
3- کوردان کابینەیا 9ێ یا ب سەرۆکاتیا مەسروور بارزانی و شێوازێ رێڤەبەریا وی، کریار و خزمەتێن وێ خەلات کرن.
4- نە تەنێ کورد، لێ د ھەمان دەمێ دە کوردێن فەیلی، کریستیان، ئێزدی و پێکھاتەیێن دن یێن جڤاکا کوردستانێ – پشتگریێ ددن سییاسەتا پەدەکێ.
5- ل ھەرێمەکێ کو پرانی عەرەبێن سوننی لێ دژین، پەدەکێ رێزا یەکەمین ب دەست خست، ئەڤ نیشان ددە کو گەلێ ئیراقێ ژی پشتگریێ ددە ھەلوەستا پەدەکێ.
رەوش ژ بۆ یەنەکێ پر جوودایە. ھەر چقاسی کو یەنەکێ پرۆپاگاندایەکا بەرفرەھ کر و وەکی دویەمین پارتیا ھەری مەزن دەرکەت ھۆلێ ژی، لێ سیاسەتا یەنەکێ زەربەک مەزن خوار. بەریا ھلبژارتنان، یەنەکێ ھەول دا کو لاھوور جەنگی ژ ھۆلێ راکە و سەرۆکێن دو پارتیێ دن زیندانی کرن دا کو رێژەیا دەنگێن خوە زێدە بکە. ھەتا ل کەلھا خوە یا سلێمانیێ ژی، یەنەکێ 17.000 دەنگ کێم کرن، و ل دوھۆک، ھەولێر و کەرکووکێ ژی 70.000 دەنگ کێمکرن.
یەنەکێ ل دوھۆکێ ژ دەنگدەرێن خوە خوەست دەنگێ خوە بدن کاندیدەکی گرێدایی حەشدا شەعبی، لێ لایەنگر و رێخستنا یەنەکێ ل دوھۆکێ بەرتەکەکە تووند نیشان دا. رێخستن ژ ھەڤ بەلاڤ بوو.
ئەڤ ھەموو تێ ڤێ واتەیێ:
1- کورد سیاسەت و ھەلوەستا گشتی یا یەنەکێ ل ھەمبەر کوردان قەبوول ناکن.
2- کورد ھەلوەستا یەنەکێ ل ھەمبەر دەولەتا ئیراقێ و تێکلیێن وێ لگەل حەشدا شەعبی قەبوول ناکن.
3- سیاسەتێن یەنەکێ یێن ل کەرکووکێ ژ 16ێ جۆتمەھا 2017 ڤر ڤە و سیاسەتا وێ یا ھلبژارتنا پارێزگار رەخمێ نەرازیبوونا کوردان، ل کەرکووکێ بوویە سەدەما وێرانکارییێ.
4- کوردان سیاسەتا بافل تالەبانی د ھلبژارتنێن پارلامەنتۆیا کوردستانێ دە و ئاستەنگکرنا ئاڤاکرنا حکوومەتا ھەرێما کوردستانێ قەبوول نەکرنە.
ئەڤ رەوشا پشتی ھلبژارتنێ یا پەدەکێ و یەنەکێیە. لێبەلێ، پەڤچوونا راستین دێ پشتی ڤێ یەکێ دەست پێ بکە.
ژ بھارا عەرەبی ڤر ڤە، یەنەکە نە ل گۆری بەرژەوەندیێن کوردان و ھەرێما کوردستانێ تەڤگەریایە. د ڤێ دەھسالێ دە خەسارەک مەزن دایە ھەرێما کوردستانێ. دڤێت یەنەکە رێزێ ل ھەلوەستا رایا گشتی د ھلبژارتنان دە بگرە و سیاسەتا خوە بگوھەرینە.
یەکەم تشتێ کو دڤێت یەنەکە د ڤان ھلبژارتنان دە بکە ئەڤە کو دەست ژ تێکبرنا پێڤاژۆیا ئاڤاکرنا حکوومەتا ھەرێما کوردستانێ بەردە. دڤێت یەنەکە ب داخوازێن مەعقوول تەڤلی حکوومەتێ ببە.
ھەر وھا د سەری دە بەرپرسیارێ ونداکرنا کورسیێن کوردان ل کەرکووکێ یەنەکەیە. پەدەکە ژ سالا 2017 ڤر ڤە ل دەرڤەیی کەرکووکێیە. لێبەلێ، پشتی 7 سالان ل کەرکووکێ و پشتی ھەشت سالان ل گەرمیانێ ئۆفیسەک ڤەکر. ھەتا د ھلبژارتنێن پارێزگاریێ دە ژی، یەنەکە ب ئاوایەکی یەکالی تەڤگەریا، رێ ل بەر عەرەبان ڤەکر کو د بورۆکراسیا کەرکووکێ دە جھەکی گرینگ ب دەست بخن. نھا دەم ھاتیە کو داویێ ل ڤان ھەموو کریارێن خەراب بینە. دڤێت یەنەکە ئاڤاکرنا ستراتەژیەکا ھەڤبەش یا کوردان ژ بۆ کەرکووکێ قەبوول بکە.
گەر یەنەکە ھەول بدە کو ب تەڤگەرینا لگەل ھێزێن حەشدا شەعبی، ب ئیدیعایا کو ھێزێن حەشدا شەعبی د ھلبژارتنان دە خورت بوونە، ئێریشەکا نوو ل دژی پەدەکێ بدە دەستپێکرن، ئەڤ دێ خیانەتەک مەزن بە.
دڤێت بافل تالابانی و ئەقلمەندێن وی دەست ژ ھەولێن وێرانکرن و شەوتاندنا کوردستانێ بەردن.
