بووبێ ئەسەر

د ڤێ دەم و دەورانا کو ھەر تشتەک تەڤلیھەڤ بوویە، ئاڤ شێلی، مەژی بەلاڤکرییە، ھەلوەست نەمایە. جڤات تێک چوویە، مرۆڤ بوونە بەرژەوەندی پەرەست. کەشتیا کو ئەم تێدەنە، ھێدی ھێدی ئاڤێ دکشینە. د شەرت و مەرجێن وەھا دە تەنێ لگەل کەسێن خەراب و نەباش مژوولبوون ژ چارەسەریێ پتر، زەرەرێ ددە وێ کەشتیا کو ئاڤێ دکشینە. لۆما دڤێت کەسێن ب ئاقل، نەتەوەیی و نە بەرژەوەندیپەرەست، ھەمی ب ھەڤرە ھەول بدن کو کەشتی بن ئاڤ نەبە.

نھا رەوشا باکورێ کوردستانێ ژی وەھایە. ئەم ئەو کەسێن دخوازین ژ بۆنا گەلێ خوە کەڤرەکی بدن سەر کەڤرەکی، دڤێت ئەم ل گۆر ڤێ رەوشێ تەڤبگەرین. ھەلبەت دێ ئاستەنگی و کەسێن خێرنەخواز زێدە بن. لێ دیسا ژی دڤێت ئەم دەست بدن ھەڤ کو کەشتی بناڤ نەبە.

ئەم ئیرۆ ھەمی رەوشێن ھەڤ، رەوشا خوە و یا پارتیێن خوە دزانین. دزانین کو تو پارتیەکا مە یا باکورێ کوردستانێ کو ژ خوە رە دبێژە ئەز کوردستانی مە، نکارن ببن کەڤرەک دا کو خوە بدە بەر تایرا سیارا کو دهاژۆن سەر گەلێ مە. ئەم ھەمی ڤێ دبینین، ژ بەر کو ئەم کێم قاوەت و بێ سەیوانەکا نەتەوەیی نە، ئەم نکارین وێ بدن سەکناندن.

د ڤێ رەوشێ دە ئەم لگەل ھەڤدو دئاخڤین، دا کو راستیێ ژ ھەڤرە بێژین. ھەگەر ئەم ڤێ نەکین، ئەم دێ پتر وەندا بکن و دکین. ئەم ئەو کەسێن ل دژی خەتا کەمالیستێن کورد، نەبین دیوارەکێ ژ پۆلا، ھوون باوەر بکن ئەم ئەو کەسێن د وێ کەشتیێدەنە بن ئاڤ دبن. بناڤکرنا مە ژی دێ ببە سەدەما تێکچوونا گەلێ مە یا ئازادی و سەرخوەبوونا وی.

ھەر وەھا ھندەک کەس و ئالی، ھندەک ب زانین و ھندەک ژی ب نەزانی ناخوازن کەس و کەسایەتی ل سەر ڤێ رەوشێ بنڤیسینن. یێن دنڤیسینن ژی دخوازن بێ دەنگ بکن. لێ دڤێت رەوشەنبیرێن باوەرمەند چ جاران ل دژی شاشیان بێدەنگ نەبن.

ئەم ئەڤ سالمەزنێن کو ھێژ ساخین و ل ژیانێنە، بەرخوە ددین کو تشتەکی بکین. ھەگەر ئەم ژی تونەبانا، پارتی و رێخستنێن کوردستانی ژی نەمابانا، ھوون باوەر بکن، کەمالیزم ب دەستێن کەمالیستێن کورد دا ل باکورێ کوردستانێ سەد ژ سەدێ ب سەر کەڤیت. ئەم چەند سالمەزنێن کو ل ھەمبەر ڤێ بەرخوە ددین کو ملەتێ مە ب تەمامی وەندا نە بە. ھەگەر ئەم ژی چ ب دزی و چ ژی ب ئەشکەرەیی ب ھەڤ بکەڤین، ئەڤ دبە وەنداکرنا مە هەموویان.

تشتێن ئیرۆ بۆ مە لازم چنە؟

دڤێت ئەم یێن کو د قادا سیاسەتا باکورێ کوردستانێ دە ھەنە، ل ھەڤبن، کێمانی و شاشیێن خوە بدن ئالیکی، ل گەل کێمانی و زێدەیێیێن ھەڤ، ھەڤدو قەبوول بکن، دێ سەرکەتن ببە پارا مە و گەلێ مە. د ڤێ سەرکەتنێ دە ژی دڤێت رەخنە و خوەرەخنەکرن ھەبە.

ئەم ل ھەمبەر ھەڤ خوەشبین بن. چ مرۆڤێن کو ژ مە وەکە سالمەزنان کێمانی نەکربن تونە نە. لێ ئەم نەما دکارین تشتێن چوویی ڤەگەرینین. یا باش ئەم ھەمی کێمانیێن خوە بدن ئالیکی. ژ بۆنا بەرژەوەندیا گەلێ خوە ھەر یەک ژ مە راھێژن کەڤرەکی و بدن سەر وی دیوارێ ژ بۆنا ئازادی و سەرخوەبوونا وەلاتێ مە تێ لێکرن.

ھەگەر ئەز، تو و ئەم وی دیواری ب ئەساسەکی ساخلەم لێبکن، ئەم دێ گەلێ خوە ژ بەر ئافات و تۆفانێن دهێن و وێ هێن سەرێ وی نەپارێزین، ئەم دێ ب ھەڤرا وەندا بکن. لۆما دڤێت ھندەک ب عیناد، ب وێرەکی راستیا گەل و ھەلوەستا کەمالیستێن کورد ژ گەلێ خوە رە ڤەکن و ب بەر بخن کو ئیرۆ ل سەر دەستێ دەمێ پارتیێ ترکبوونا کوردان تێ مسۆگەرکرن. دڤێت گەلێ مە، سیاسەتمەدارێن مە و پارتیێن مەیێن سیاسی ل ھەمبەر ڤێ بێدەنگ نەمینن. بێدەنگی قەبووکرنا بندەستیێیە.

لۆما گرینگە کو ئەم ئەو کەسێن ل سەر دیکا سیاسەتێ مانە، ھەڤدو بگرن، دەست بدن ھەڤ، مل ب مل، دل ب دل ب یەک ھەلوەستێ تێبکۆشن کو خەتا کەمالیزمێ ژ سەر ئەردا خوە دوور بخن.

رەوش خەرابە و دڤێت ئەم ل گەل باش و خەرابێن خوە یەکتیەک نەتەوەیی ب ھەڤرە ئاڤا بکین کو ئەم ب تەمامی وەندا نەکین. لیستکێن مەزن ل سەر دکا کوردستانێ تێنە لیستن. لۆما دڤێت ئەم نەبن تەمەشەڤان. ب ھەلوەست و بریارێن خوە، ب قاوەت و ھێزێن خوەیێن ھەنە، ب روحیەتەک نەتەوەیی، خوەشبینی و ل ھەڤکری دەست بدن ھەڤ.

ئەڤ دۆز نەیا پارتیەکێیە. ئەڤ ئێش، کێشەیا وەلاتەکی و ملەتەکی قەدیمە. دێ کەرەم بکن ل ھەڤ ڤەگەرن، سەیوانەکێ نەتەوەیی ب ھەڤرە دامەزرینن و دەست ب خەباتێ بکن. دێ کەرەم بکن ئەم دەست ژ هاڤێتنا ھەڤ نھا بدن ئالیکی و ب ھەڤرە ل دۆزا گەلێ خوە ڤەگەرین. ب ھەڤرە، نەھێلین کەشتیا کو ئەم تێدەنە بن ئاڤ ببە.

ئێدی دەست ژ پاشگۆتنا ھەڤ بەردن. د دیرۆکێ دە ھەر کەس دێ ل گۆر کەد و خەباتێن ئەنجامدای بێنە بیرئانین. لۆما دڤێت خەبات ببە نەینکا ھەرکەسەکێ. دڤێت ئێدی ئەم رێیا کو خەرابێن مە، فەساد و حەسوودێن مە نەبن رێڤەبرێن پارتیێن کوردستانێ ب ھەڤرە بکەڤن ناڤا ھەولدانان. دڤێت ئەم کەدکار و نەکەدکاران ژ ھەڤ ڤەقەتینین. دڤێت قیمەتا کەس و کەسایەتێن بەدەلێن مەزن دانە بێنە ناسین و  خوەدی ل وان بێ دەرکەتاندن.

ب سەدان نڤیسکار و رەوشەنبیرێن کورد کو نە ئەندامێن چ رێخستنەکا سیاسی نە، ھەنە. ب ھەزاران زانا، ژیر و تێگھشتی ھەنە و نە ئەندامێن هیچ پارتیەکێ نە. ژ خوە ناخوازم بەحسا جوانان بکم. دڤێت پارتیێن کوردستانی ل سەر ڤێ، سەرێ خوە بێشینن. بفکرن کو چما ئەو جانک و جامێر تونە نە. پێویستە رێیا ب رێخستنکرنا کەسێن وەھا بێ دیتن.

ئیجار ئەم ئەڤە ھەمی ل گەل باش و خەرابێن خوە، ل گەل زانا و بیرەورێن خوە د کەشتیا کو ئاڤێ دکشینە دەنە. ب بناڤکرنا وێ ئەم دێ تەڤدە وەندا ببن. ملەتەک و زمانەک تێک دھەرە. باوەری و خوەشبینی نامینە. ھەتا کو رەوش ئەڤ بە چ پێشکەتن ژی نابە.

پێویستە ئەم ھەمی ل گەل ھەڤ، ل گەل پارتی و کەسایەتیێن خوەیێن سیاسی، ژ بۆنا کەمالیزم ل باکورێ کوردستانێ ب سەرنەکەڤە، دەست بدن ھەڤ. رێیا وێ ژی ئاڤاکرنا سەیوانەکا کوردستانییە. ژ بۆنا وێ ژی دڤێت ئەم ب کێمانی و زێدەیێن خوە ھەڤدو قەبوول بکن. دەم ھندک مایە، وەخت وەکە ئاڤا چەمێ دیجلەیێ دحەرکە. گەلەک تشت ژ دەست مە چوون. لێ ژ بۆنا یێن مایی دڤێت ئەم یەک بن.

ھەگەر مە ھەبانا ھێزەکە یەکگرتی

ئەمێ ژی بھاتانا بانکرن وەکە ھەرکەسی

تونە مە ئەو ھێز، قاوەت و براتی

لۆما ئەم نایێن دیتن، وەکە ھێزێن سیاسی