سەرەدانا سەرۆك بارزانی بۆ جزیرا بۆتان: مۆركرنا شوناسێیه بۆ كانیا كوردايەتیێ
سمکۆ عەبدولعەزیز
چوونا جەنابێ سەرۆك مەسعوود بارزانی رێبه‌رێ كوردان بۆ جزیرا بۆتان ل دەڤەرا شرنەخێ، نە تەنێ گەشتەك یان سەرەدانەكا ئاسایی بوو، بەلكو “بانگەوازەك” بوو ژ بۆ سەلماندنا هەبوونا مە ل سەر وێ ئاخا پیرۆز.
دەما ئەم بەحسا جزیرا بۆتان دكەین، ئەم بەحسا دل و جەرگێ مێژوویا خوە دكەین؛ ئەو وارێ میر بەدرخانە، لاندكا ئەدەبیاتا مە یا كلاسیك و سۆفیگەریێ یە، و كێلیا هەرە ب هێز یا شووناسا مە یە.
دەما رێبەرەكێ كورد پێ ددانیتە سەر وێ ئاخێ، ئەو ئاخا كو ب دەهان سالە هەول ددەن رەنگێ وێ یێ كوردی ژێ ببەن، ئەڤە ب خوە مەزنترین نیشانا سەروەریێ یە.
جزیرا بۆتان ژ بۆ مە ، نە پارچەكا ئەردی یە، بەلكو بەلگەناما تاپۆیا مە یە.
دەما جەنابێ سەرۆكی ل وێرێ ب كوردی پەیڤی و ناڤێ پیرۆزێ “كوردستانێ” ل وی هولێ ئیناى سەر زمان، وەكی هندێ بوو كو گیانەكێ نوی بەردا لەشێ نەتەوەیەكێ.
ل وی جهێ كو زمانێ مە لێ قەدەغە بوو، سەرۆك بارزانی ب كوردى ئاخڤت، سنۆرێن ترسێ شكاندن و سەلماند كو بەری ئاخ رزگار ببیت، دڤێت هزر و بیر و زمان رزگار ببن.
ژبەرکو چ مللەته‌ك ب تانك و تۆپان ب دوماهى ناهێن، بەلكو ب نه‌مانا زمان و كلتوورێ خوە ب دوماهیك دهێن.
دەما وی بەحسا مەلایێ جزیری كری و گۆتی “ستێرەكە کو هەرگیز ناڤەمریت”، ئەڤە پەیامەك بوو كو ئەم مللەتەكێ بێ ڕەهـ و ریشال نینین.
مەلایێ جزیری نە تەنێ هەلبەستڤان بوو، بەلكو سەرێ كانیا مەعریفەتا كوردی بوو.
ڤەژاندنا ناڤێ مەلایێ جزیری، واتە ڤەژاندنا گیانێ نەتەوەیی ل هەمبەری وان هەمی هزرێن رزى یێن كو دڤیان كوردا ژ ئەسلێ وان دویر بێخن.
خالا هەرە گرنگ، دەما جەنابێ سەرۆكی گۆتنا مەلایێ جزیری دوبارە كری كو دبیژیت: «رێیا حەقیقەتێ ئێكە»، ئەڤە دەرمانێ چاره‌سه‌رییا برینا مە یا ناڤخوەیی یه .
پەیام ئەوە كو: كوردستان ب دوبەرەكی و شەرێ حزبان ئاڤا نابیت، به‌لكو رێیا ئێكگرتنێ ئاڤا دبیت. تاكە رێ بۆ سەركەفتنا مە، ڤەگەریانە بۆ وێ “رێیا حەقیقەتێ” كو بەرژەوەندیا گشتییە نە یا كەسی.
هەروەسا، دەركەفتنا سەرۆك بارزانی ب جلوبەرگێن كوردی و جەمەدانیا سور ل ناڤ جزیرا بۆتان، وەكی هلدانا ئالایێ كوردستانێ بوو بێی كو ئالایەك د دەستی دا بیت. ئەو جلوبەرگ ب خوە شووناسا مه و شۆره‌شا مه ده‌ڤژینیت . نیشاندان بوو كو “ئەم خوەدانێن ڤێ ئاخێ نە، نە مێڤانین.”
ب كورتی و كورمانجی؛ ئەڤ سەرەدانە مژدەیەك بوو بۆ هەمی دۆست و دژمنان:
كو كورد نەتەوەیەك زیندی یە، خوەدان ئاخ و مێژوو و شارستانیەتە.
دۆزا مە نە دۆزا كەمینەیەكێ یە كو ب چەند مافێن بچویك رازی ببیت، بەلكو دۆزا گەلەكی یە کو دڤێت بگەهیتە مافێ خوە یێ سروشتی.
وەكی چەوا سەرۆكی نیشان دای، كوردستانا مەزن بەری کو د سەرێ مە دا ئاڤا ببیت، د باوەریا مە دا ئاڤا دبیت، پاشی ل سەر ئه‌ردنیگاریا جیهانێ دهێته نه‌خشاندن.
ئەڤە ژی وێ چەندێ دگەهینیت كو پاشەرۆژ ب دیارى ناهێته نەخشاندن، بەلكو ئەم دێ ب ئیرادە و هۆشیاریا خوە، پاشەرۆژا خوە د دەستێن خوە دا گرین.
