بووبێ ئەسەر

ب قاسی کو ئەز فێم دکم و تێ دگھێژم، ل ئیمرالیێ کۆمیتەیەک ب ناڤێ ھزرا کوردستانێ ژ دلێ کوردان دەرخە، ھاتیە دامەزراندن. ھەمی کار ل گۆر وێ تێن برێڤەبرن دا کو کوردان بکن ترک. ئەڤە ژی پرۆژەیا زیندانا دیاربەکرێ یا ب ناڤێ 5 نۆلی یە. خەباتێن تونەکرنا کوردان ژی ل سەر ناڤێ عەڤدللا دکن. ژ خوە عەڤدللا ژی یەک ژ ئەندامێن وێ کۆمیتێ یا ھەری مەزن و ب باندۆرە.

کاروبارێن ڤێ کۆمیتێ ل گۆر بەرژەوەندیا ترکیێ ب دەستێ زەلامێن دەولەتا کوور دهێت مەشاندن. کارێ وان ژی ئەوە کو کوردان ھێدی ھێدی ل سەر ناڤێ ئاشتیێ، ژ فکرا کوردستانبوونێ دوور بخن. واتە دخوازن کوردان ژ روحیەتا کوردەواریێ دوور بخن.

سەدەما باخچەلیێ کو بەرێ ناڤێ کوردان دبھیست وەکە جنێن چاڤ ل ئاسنی بکەڤە، دبوو. وی بەرێ چ جاران ژی ناڤێ کورد نەدانی سەر زمانێ خوە کو ئیرۆ دبێژە کورد و ترک برانە(!). ل سەر ناڤێ براتیێ دێ کوردان تونە بکن. ژ بەر کو نھا جھ ل وان تەنگ بوویە.

دەما ئەتاترکێ وان ژی وەھا بوو. ب سایا کوردان کۆمارا خوە دامەزراند. بەری دامەزراندنێ دگۆتن: “ئەڤ کۆمارا ترک و کوردانە. ئەم برایێن ھەڤن”. پشتی کو ب سەرکەتن کورد قرکرن، وێران کرن و دەربەدەر کرن. ئیرۆ ژی ڤێ دبێژن. ژ بەر کو ئەو دزانن ل پێشیا وان چ ھەیە.

گوھەراندنێن ل رۆژھلاتا ناڤین تێن کرن، نە پێکانە کو تەئسیر و باندۆرا خوە ل ترکیێ ژی نەکە. ئەڤ تێ وێ واتایێ کو ئیرۆ ھەمی دەستھلاتا ترکان دخوازن ب سایا عەڤدللا، خوە ژ ڤێ تۆفانێ ئازاد بکن. یانی دامەزراندنا کۆمارا دووەم ل سەر ئەساسێ بوویەر و کریارێن دامەزراندنا کۆمارا ترکان یا ئەول تێنە مەشاندن. پلان و پرۆژە یەکن. لێ ل گۆر جھ و زەمانی گوھەرینە.

پشتی ڤێ زانینێ دڤێت کورد چ بکن؟ باوەر بکن ھەرکەس دزانە دڤێت چ بهێت کرن. لێ ناکن. بالا خوە بدنێ بریارێن ژ ئیمرالیێ دەردکەڤن، ب رێیا دەمێ ل ترکیێ و کوردستانێ تێنە بەلاڤکرن. ئەم ژی تەنێ تەماشە دکن و نکارین دەرەوێن وان ب خەلکێ بدین فێمکرن.

مرۆڤێن ژ شەر و پەڤچوونان، ژ کوشتن و وێرانیێ عاجز بوونە، بێ کو کاربن باشی و خەرابیێن ڤێ پێڤاژۆیا ب ناڤێ ئاشتیێ بفکرن، ئەرێ دکن.

ژ بەر کو مرۆڤێن وەستیایی، بێ کار و ب زکێ برچی نکارن ب ئاوایەکی مەعقوول بفکرن. ل گۆر وان راوەستاندنا شەری دێ ھەمی باشیان لگەل خوە بینە.

ھەلبەت راوەستاندنا شەرێ چەکداری باشە. لێ گەلۆ ل پشت ڤێ راوەستاندنێ چ ھەیە و دخوازن چ بکە، تێ زانین؟ نا. ژ بەر کو ھەر تشت ل پاش دەریان تێ مەشاندن. تشتێن ل پاش دەریان تێنە ئاخافتن و ل سەر وان بریار تێ گرتن، تاری نە. ژ خەلکێ رە ب ئاوایەکی دن تێ گۆتن و شرۆڤەکرن.

ژ بۆنا ملەتەکی وەستیایی شەر و کوشتن نەبە، باشە. ملەتەکی وەستیایی و بندەست نکارە وەکە سەردەستێ خوە د مەسەلایان دە شارەزا بن. ئەڤ کار، کارێ پارتیێن سیاسی نە کو دڤێت ئەو ژی ب ھەڤرە ڤێ ب ئاوایەکی ڤەکرێ ژ خەلکێ خوە رە بێژن و بنڤیسینن.

ژ بەر کو ھێزەک خورت و نەتەوەیی ل باکورێ کوردستانێ تونەنە. داخوازێن عەڤدللا و یێن ل سەر ناڤێ وی تێنە گۆتن، د ناڤا جڤاتێ دە جھێ خوە دگرە. ھەر چقاسی د دەستپێکێ دە قەلس ژی بە. وێ رۆژ بێ ئێدی ئەڤێ ببە پەرچەک ژ ژیانا ملەتێ مە.

ژ بەر ڤێ دبێژم، ئیمرالیا نھا بوویە جھ، وار و بریارێن تونەکرنا کوردان ل باکورێ کوردستانێ. ھەلبەت داخوازا بێدەنگکرنا رۆژئاڤایێ کوردستانێ و تەسلیمبوونا وانە ژی. ژ بەر ڤێیە کو دەستھلاتا ترکان دبێژن و تینن زمێن: “شاشیا مە ل باشوورێ کوردستانێ کریە، ئەم دێ ل رۆژئاڤایی کوردستانێ دوبارە نەکن”.

یا راستی عەڤدللا و دەولەت گەلەکی کوور و دوور ل سەر ڤێ مەسەلێ راوەستیانە. ئەڤ پرۆژەیەکە کو ب کێمانییا سەد سالان لپێشە. پێشی ل ڤێ پرۆژەیێ گرتن، ب سایا یەکتیەکە نەتەوەیی یا باکورێ کوردستانێیە.

ل گۆر من ھەگەر ئەڤ پرۆژە ب سەربکەڤە، مرۆڤ دکارە بێژە کو ھەما ھەما کورد ل باکورێ کوردستانێ وەکە کورد دقەدن. یانی دێ ببن وەکە قالکەکی پووچ و بێ واتە.

ژ بۆنا پێشی ل ڤێ بێگرتن ل سەر ئەساسێ خەتەکا نەتەوەیی ھاتنە با ھەڤ یا پارتیێن کوردستانییە. ھەگەر ئەو ئیرۆ ڤێ نەکن. سبێ وێ حەسابێن مەزن بەرێ ژ وان بێن خوەستن.

ھەگەر رەوشەنبیر، دیرۆکناس و زانێن ڤی ملەتی، ڤێ ژ گەلێ خوە رە نەبێژن و نەنڤیسینن، ئەو ژی دێ ببن گونەھکارێن دووەم کو عەفووکرنا وان ژی زەحمەتە.

دڤێت ئەم ژ بیر نەکن کو دیرۆک ھەر تشتەکی دنڤیسینە. باشی و قەنجیێن مە. خەرابی و نەباشیێن مە. کێمانی و شاشیێن مە، تێنە نڤیسین. ھەگەر ئەم ئیرۆ وێ نەبینن، دێ سبە زارۆک و نەڤیێن مە، ڤی حەسابی بدن.

لۆما دبێژم: نە مافێ مەیە کو ئەم زارۆک و نەڤیێن خوە ژ بەر کێمانی و چەوتیێن خوە بشەوتینن. دڤێت ئەم ژ وان رە دیرۆکەک پاقش بھێلن کو ئەو نەبن گونەھکارێن د بەر مە دە.

ئارمانج و خەباتێن ئیرۆ ل ئیمرالیێ تێنە مەشاندن، نە ژ بۆنا مافگرتن یان دەمۆکراسی ئانینا کوردانە. قەداندنا وانە کو ئەو ژی وەکە کێمنەتەوەیێن دن ببن ترک.

ژ بەر ڤێیە کو دەستھلاتا ترکان، ئیمرالی کرنە دەرگەھەک و ئاقلمەندێ وان ل گەل عەڤدللا ل ور پرۆژەیێن مەزن ئامادە دکن کو کوردان ب چ رێ و ئۆلاخان تونە بکن…