وهزیرێ ب 10 وهزیران: ئۆجالانێ خوهش جامێر !!
توندیا د ناڤ جڤاكێ ده دهرڤهی ئهخلاقێ یه، ئهڤ یێك من دئێشینه، ههیا وێ چاخا ئهم مهرحهلهیا جڤاكا دهمۆكراتیك دهرباس دكن، سۆز به ئهز مهسهلهییا توندیێ تایبهت یا ل سهر ژنێ چارهسهر بكم، سۆز به ب قاسی 10 وهزارهتان كار بكم.
ئهڤ گۆتنێن ل ژۆر عهڤدللا ئۆجالان چهند رۆژان بهرێ ژ شاندا دهم پارتیێ ره گۆتنه.
ئۆجالان ل سالێن 90ان ل شامێ بهحسا لههنگییا خوه ژ كادرۆیێن ژن یێن پهكهكێ ره دكر، وی د دهورێن پهروهردهیێ ده دگۆت: «ئهز بچووك من كۆتر د گرتن»، وی پهسنێ ڤی كارێ خوه ژ ژنان ره دكر، ئانگۆ وی گرتنا كۆترهكا بهلهنگاز ب لهههنگی و مێرانی ژ خوه ره سهر سهرێ ژنان حهساب دكر.
بهلێ ئهو ئیرۆ ژی هاتیه عهینی تشت دبێژه، ئهو دبێژه: «سۆز به ب قاسی 10 وهزارهتان كار بۆ چارهسهرییا توندییا ل سهر ژنێ بكم». عهڤدللا دخوازه ب ڤی شێوازی خوه وهكه لههنگ و رزگاركهرێ ژنێ ژ توندییا جڤاكێ و ئهخلاقپارێز پێشكێشی ژنان بكه.
د ههڤدیتنا ب شاندا دهم پارتیێ ره ئۆجالان گۆت: «توندییا د ناڤ جڤاكێ ده و ب تایبهت یا ل سهر ژنێ دهرڤهی ئهخلاقێ یه، دڤێ تهدبیر بێن وهرگرتن»، ئانگۆ چ، ههر وهكه مرۆڤ ببێژه: «وهختا مرۆڤ تێهنی دبه، دڤێ ئاڤ ڤهخۆ»!.
گهلۆ چیرۆكا ئۆجالان و نیقاشێن وی یێن سهر توندییا د ناڤ جڤاكێ ده چاوا كهت رۆژهڤا پێڤاژۆیا ئاشتیێ ده؟ وهزیرێ وهزیران دخوازه چ ببێژه؟ گهلۆ بچووكرنا چارهنووسا پرسگرێكا كوردان ب توندییا د ناڤ جڤاكێ ده لۆژیكه؟
سۆز به ب قاسی 10 وهزارهتان كار بكم
ئۆجالان دبێژه: «ههتا وێ چاخا ئهز پێڤاژۆیا ئاشتیێ چارهسهر دكم و مهرحهلهیا جڤاكا دهمۆكراتیك دهرباس بكم، ئهزێ مهسهلهیا توندیێ ژی چارهسهر بكم، سۆز به ئهز ب قاسی 10 وهزارهتان كار بكم».
ئۆجالان دهربارێ چارهسهرییا كو 10 وهزارهت نكارینه بكن گۆت چارهسهری ئهڤه: «ئەز ژ کەسێن من گوهدار دکن رە دبێژم کو ل هەمبەری هەڤدو ب ئاوایەک ئەخلاقی دەست ژ چەکان بەردن. دڤێ گۆتنەکە کو هەڤدو بێشینن ژی نەبێژن هەڤ. پرسگرێکان ب ئاقل و ئاخافتنێ چارەسەر بکن. ئەز توندییا د ناڤ مالباتێ دە، د ناڤبەرا مالباتان دە، د ناڤبەرا ئەشیران دە و د ناڤبەرا جڤاک و باژار دە رەد دکم، دەرڤەیی ئەخلاق دبینم».
ههم تهنێ مایه ئۆجالان ژ جڤاكێ ره ببێژه: ئاقل بن، دهی روون!.
گهلو یا ئۆجالان و رێخستنا وی ئانیه سهرێ گهل ئهخلاقه؟
تهڤی كو رێخستنا پهكهكێ ژ دهستپێكا خوه ڤه ب دروشمهیێن «كوردستانا مهزن، كوردستان یان نهمان و بهرخوهدان ژیانه» دهست ب تێكۆشینا ل دژی دهولهتا ترك كر، لێبهلێ ههر د زوو ده ئۆجالان تهسلیم دبه و دبه یێك ژ زلامێن ههری خزمهتخوهش ژ بۆی دهولهتێ.
ئۆجالان ب قاسی كو خزمهتا دهولهتا ترك كرییه ئهو قاس خزمهتا گهلێ كورد نهكرییه، تام بهرهڤاژی ڤێ وی پهكهكه ژ رییا كوردایهتیێ دوور كر و دروشمهیا كوردستان یان نهمان ب براتییا گهلان و جڤاكا دهمۆكراتیك گوههراند، ئیرۆ ژی هاتییه دۆزا نهتهوهیهكێ ب توندییا د ناڤ جڤاكێ ده بچووك كرییه.
گهلو ما خاپاندنا 50 ههزار جوانێن كوردان ژ كهچ و خۆرتان ب ناڤێ ئهشقا كوردستانێ و پشتره ب كوشتن دانا وان ژ بۆی دهمۆكراتیككرنا دهولهتهكه داگیركهر كارهكی ئهخلاقی یه، یان دهرڤهی ئهخلاقێ یه؟.
قهی وێرانكرنا باكورێ كوردستانێ و دهربهدهركرنا ب ملیۆنان كوردان بێی ئارمانج، ژ ئهخلاقێ یه؟.
ما وهختا ئۆجالان هاتیه گرتن و هێژان د بالافرێ دا تهسلیم بووی و ژ ئهفسهرێن میتێ ره گۆتی: «دییا من تركه، ئهز ژ بۆی خزمهتێ ئامادهمه ئهخلاقه»؟.
كورتولمۆش: ئۆجالان خوهش جامێره!!
ئۆجالان نه جارهكێ تهسلیم بوویه، دهولهتا ترك ب رییا ئۆجالان گهلێ كورد و دۆزا وان تهسلیم گرتنه و ئۆجالان ئهڤ وهزیفه ب دهڤێ خوه ژ دهولهتێ ره پێشنیار كر.
پشتی 42 سالێن شهر و پهڤچوونان، ئۆجالان ل 27 سباتا ئیسال 2025ێ ب قاتهكێ شینێ تاری و تیشێرتهكێ هناری دهركهت، كاغهزهك د دهست ده بوو و ژ پهكهكێ ره گۆت: «چهكان دهینن، خوه فهسخ بكن، مۆدێلا وه نهما».
ئارمانجا مه تركیهیا بهێزه، خوهسهری، خوهرێڤهبرن، فهدهرالی و نهتهوه و دهولهت نهئیشێ كوردانه، ئهو نهچارهسهری نه، بهێزبوونا تركیهیێ چارهسهری یه. گهلۆ ما ئهڤ یێك ژ رهنگێن ئهخلاقێ نه؟.
ژ 27 سباتێ ڤه، ئۆجالان نێزی 10 ههڤدیتن، تهلهكۆنفهرانس و بانگان كرنه و ئهنجام دا نه، د تهڤان ده یێك داخوازی ژی ژ بۆ گهلێ كورد نهكرنه، بهلكو ناڤێ كورد و كوردستانێ ژی نههات سهر زمانێ وی، وهكه كو نومان كورتولمۆش سهرۆكێ مهجليسا تركیهیێ ل ههفتهیا رابووری پشتی كو كۆمسیۆنێ سهردانا ئیمرالیێ كری گۆتی: «ئۆجالان ت تشتهك نهخوهستيیه، ههتا وی فهرمیكرنا زمانێ كوردی ژی نهخوهستیيه» ههما هند مابوو كورتولمۆش ببێژه: وهللاهی ئهڤ زلام خوهش جامێره!!
گهل چما پێڤاژۆیێ پێشوازی دكه؟
بینن بهر چاڤێن خوه، سهرۆكێ جهههپێ ببێژه كورد و ئهم دخوازن ب برایێن خوه یێن رۆژئاڤا ره جیرانهتیهكا باش ئاڤا بكن، و ئۆجالان ژ ئیلهام ئهحمهد و مهزلووم عهبدی ره ببێژه: دڤێ سووریه یهكگرتی به، ههرن شامێ و ههر تشتی تهسلیم بكن. گهلۆ ب یا وه كی ب ئهخلاقه و كی بێ ئهخلاقه؟!
ئۆجالان ئیرۆ هاتيیه دبێژه: «توندییا د ناڤ جڤاكێ ده من دئێشینه»!، قهی چما وی بۆ شههیدكهتنا 50 ههزار جوانێن كوردان جارهكا ب تهنی ژی نهگۆت ئهڤ یێك من دئێشینه؟.
دهستپێكرنا پێڤاژۆیا كو ب پێڤاژۆیا ئاشتیێ هاتیه ناڤكرن، د ئهسل و جهوههرا خوه ده پێڤاژۆیا تركیهیا بێ تهرۆره، ههگهر گهلێ كورد پێشوازی ژی ل ڤێ ههنگاڤێ كربه، تهنێ ژ بهر یێك ئارمانجێ یه، ئهو ژی ژ بۆی ب داوی كرنا وێ قهدهر بێ ئهخلاقیێ یه یا كو پتری 40 سالانه ئۆجالان و رێخستنا وی د راستا گهل ده ئهنجام ددن، ژ بۆی ب داوی كرنا قهتلكرنا بێ ئارمانج یا ههزاران جوانێن كوردانه، ژ بۆی وێ یه كو گهلێ كورد هنهكی ژ بهلایا پهكهكێ و نهفرهتا ئۆجالان رهحهت ببه.
