ئەی ملەتێ بێ دەولەت!!! تو دهێیە ژناڤبرن خوە ببینە…
بووبێ ئەسەر
تو، رۆژ ب رۆژ، گاڤ ب گاڤ ل سەر دەستێ پەکەکە-دەمێ تونە دبی. لێ ل ھەمبەر ڤێ مالوێرانیێ ھێژ پارتیێن مەیێن سیاسی تەنێ تەماشە دکن. ب تەماشەکرن و بێدەنگیا پارتیێن کوردستانی، نە یەکرێزی و نەلھەڤبوونا وان، مە وەکە ملەت، ئەندام و وەلاتپارێزان دخاپینن. پەکەکە-دەم ژی ئەندامێن خوە و ملەت کورد دخاپینن. یانی وەکە دارێ ھەردو سەر یێ وی ب پیسیتیێ یە.
دەم لێ دخەبتە کو ل گۆر ئەمر و گۆتنێن باخچەلی کوردان پووچ بکە دا کو کورد ئێدی ھەتا سەد سالەکا دن ژی نەیێن سەر ھەشێ خوە. یا ھەری گرینگ ژی سەرکێشیا ڤێ پێڤاژۆیا تونەبوونا کوردان عەڤدۆ و باخچەلی ل گەل ھەڤ دمەشینن. گەلۆ ئەڤ ژ وە رە عەجێب نایێ؟
پارتیێن مە یێن کوردستانی ژی ب بێھەلوەستیێن خوە، ژ بۆنا ئەڤ پرۆژە ب سەرکەڤە، بێ کو ھایا وان ژێ ھەبە، لێ دخەبتن. ئانگۆ وەکە نزانبن دێ سبەرۆژێ چ بێ سەرێ گەلێ مە، نابینن. یان ژی دبینن، لێ ئەڤ رەوش تێ حەسابێ وان ژی. لۆما نکارن یان ناخوازن ببن ھێز و قاوەتەکا ل ھەمبەر ڤێ…
ئەڤ رەوش ب مە ددە زانین کو ژ بەر ڤێ بێھەلوەستی، نەیەکرێزی و ژ ھەڤ بەلا-وەلابوونێ، گونەھکارێن مەزن ئەو ب خوە ئانگۆ پارتیێن مەیێن ژ خوە رە دبێژن ئەم کوردستانی نە. ب سەر ڤێ ژی رەخنەیان قەبوول ناکن. یێن رەخنا ژی دکن تێن تەھدیدکرن کو ژ ئەندامەتیا پارتیێ دەرکەڤن. ئاھا مالوێرانیا مەزن ژی ئەڤە.
کینەیێن ڤێ دکن؟ چەند سال مەزنێن سەقەت، نەخوەش و بەرژەوەندیپەرەستن کو پارتیان ژ بۆنا مالباتا خوە و کارێن خوەیێن شەخسی ب کار تینن. ڤان سالمەزنێن کو سەرێ 30-40 سالانە رێڤەبەرن، لێ ئەندامەکی وان ژ مالباتا وان د ناڤ پارتیێن وان دە تونە نە.
سەداما چما نکارن ب ھەڤرە ئەنیەک نەتەوەتی دامەزرینن چیە؟ چما نکارن ببن یەک؟ ئاستەنگی ل کویە؟ یێن ڤێ ناخوازن کی نە؟ چما ژ رایا گشتی رە ئەشکەرە ناکن. لۆما دبێژم؛ تێکچوون و تونەبوونا گەلێ کورد، ھەر چقاسی ل گۆر پرۆژەیێن باخچەلی و دەولەتێ دمەشە ژی، بێدەنگی، نەیەکرێزی، نەلھەڤکرن و بێھێزیا پارتیێن کوردستانی ژ یا باخچەلی پەکەکە-دەمێ مەزنترە.
دڤێت ملەت و ئەندامێن پارتیێن سیاسی رابن بکن گازی و ھاوار کو چما پارتیێن مە ژ بەر ڤێ رەوشا خەراب بێدەنگن؟ چما ھێزێن خوە ناکن یەک؟ چما ل دژی کەسێن وان رەخنە دکن ب توندی رادوەستن؟ ھەتا کو بەرسڤا ڤانا نەیێ دایین ئەمێ ھەر وەندا بکن.
سەدەما کو ئیرۆ پرانیا رێڤەبرێن پارتیێن سیاسی ژ سالمەزنان، ژ نەزانان، ژ ترسۆنەکان و بەرژەوەندیپارێزان پێک تێ، چیە؟ چما ڤانا نایێن ڤەکرن کو ملەت ژی راستیێ فێم بکن.
ھەگەر تو ئەندامێ پارتیەکێ بی و ڤانا بێژی، تە ژ ئەندامبوونێ ئاڤێتنێ تەھدید دکن کو تو نەما بوێری بنڤیسی یان بێژی. تو نە ئەندامێ پارتیەکێ بی و ڤانا بنڤیسینی، ھەمی پارتی دبن یەک و ل دژی تە تەڤدگەرن.
ژ بەر ڤێ ئەز دبێژم کو یێن ئاڤێ دکشینن سەر ئاشێ پەکەکە-دەمێ و پرۆژەیا دەولەت باخچەلی، ئەڤ پارتی و رێخستنێن مە ب خوە نە. چ ب زانەتی و چ ژی ب نەزانی.
ھەگەر ئەم خوەدی ھێزەکا نەتەوەیی بن. ھەگەر ئەم خوەدی ئیمکانێن ھێژا و ئابۆریەکا باش بن، دێ ئەڤ پرۆژەیا عەڤدۆ و باخچەلی ئەوقاسی ب ھێسانی ب سەر نەکەڤە.
تشتێن بلەز و پێویست ئەون کو دڤێت زووترین دەمێ ئەنیەکا کوردستانی بهێت دامەزراندن. چقاسی وەخت دەرباس دبە ئەم ئەوقاسی ژ ھەڤ دوور دکەڤن و پرۆژەیا عەڤدۆ و باخچالی ب سەردکەڤە. ل گۆر من دامەزراندنا ئەنیا نەتەوەیی ژی، ل ھەڤکرن و ھەڤدو قەبوولکرنا ھەمی پارتی، رێخستن و شەخسێن ژ وەلاتێ خوە حەز دکن، د ناڤا ھاک-پارێ دە جھ گرتنە.
ھەگەر ئەم دخوازن ل باکورێ کوردستانێ ببن دلۆپەک، ژ بۆنا پێشی ل ڤێ پرۆژەیا تێ مەشاندن بگرین، دڤێت ئەم یەکتیا ناڤا خوە ئاڤا بکن. ئەم دێ ئیرۆ دلۆپەک بن، لێ سبێ ئەم دێ ببن لەھی. لێ ھەگەر ئەم ڤێ دلۆپا ئیرۆ ژی ژ بەر بەرژەوندیێن خوەیێن شەخسی و رێخستنی ھەوا بکن، ئەم چ جاران لەھیێ نابینین…
ھەلبەت ل ھەڤکرنەکا ل سەر ناڤێ ھاک-پارێ ژی ل گۆر من دڤێت پێک بێ و یا مەعقوول ژی ئەڤە. ژ بلی ناڤگوھەراندن و خالا فەدەرالیزمێ، مرۆڤ دکارە دەستوور و بەرنامەیەکا وێ یا ل ھەڤکری تەنزیم بکە.
ئیرۆ مافێ ھاک-پارێ یا ھلبژارتنێ ھەیە و خالا فەدەرالیزمێ د دەستوورا وێ دە ب ئاوایەکی فەرمی جھ گرتیە. ژ بلی ڤان ھەردو خالان، مرۆڤ دکارە گەلەک تشتان ل سەر ئەساسێ ل ھەڤکرنێ بگوھەرە. لێ دڤێت نەیێ ژ بیرکرن کو ل گەلەک باژار، باژارۆک و ل ھەرێمان رێخستنا ھاک-پارێ ھەیە. ئەڤ ژی شانسەکە.
لێ بەری گوھەراندنەکا وەھا دڤێت ھندەک کەس و کەسایەتی ژی خوە بگوھەرن. ژ بۆنا بەرژەوەندیا گەلێ خوە دڤێت بەدەلڤەکەر بن کو ل سەر ئەساسێ ل ھەڤکرنەکێ و ب ھەڤرا پێشی ل ڤێ پرۆژەیا تێ مەشاندنێ، بگرن.
