جەمیل بایک، کو ئەندامێ دامەزرینەرێ پەکەکەیا ھلوەشییایە و ھەڤسەرۆکێ کەجەکێ یە، دەمەک درێژە ژ مەدیایێ دوورە. د ھەفت مەھێن پشتی کۆنگرەیا ھلوەشاندنا پەکەکێ یا 7ێ گولانێ دە، بایک تەنێ سێ جاران لگەل مەدیایێ ئاخڤتیە. د ڤان ئاخافتنان دە، بایک پەسنێ دیرۆکا خوە دا و دلسۆزیا خوە ژ بۆ ئۆجالان نیشان دا، لێ ب ئەشکەرەیی پشتگری نەدا پێڤاژۆیا سیاسی.
لێ بەلێ ژ بەر بێدەنگیا جەمیل بایک، کو وەکی کەسێ دویەمین یێ پەکەکێ و دەستێ راستێ یێ ئۆجالان تێ دیتن، ھەر کەس دپرسە: “جەمیل بایک ل کویە، و چما بێدەنگە؟”
ل گۆری چاڤکانیێن پەکەکێ، جەمیل بایک ژ پێڤاژۆیا کو ئۆجالان دەست پێ کریە عاجزە. لێبەلێ، عاجزییا وی یا ھەری مەزن ژبەر گۆتنێن ئۆجالانن یێن کو تێ دە گۆتی “بلا جەمیل بهێت ئیمرالیێ ل جەم من.”
تێ زانین کو بایک دەمەک درێژە لگەل ئۆجالان د ناڤا پەڤچوونەک ڤەشارتی دەیە. ئۆجالان بەری گرتنا خوە د سالا 1999 دە ئەو ژ کار دوورخست، ژێ رە گۆت “دایناسۆرێ پۆرسپی”، و راگھاند کو ئێدی جھێ وی د ناڤ پەکەکێ دە نینە.
لێبەلێ، ئۆجالان ھاتە گرتن و بایک د ناڤبەرا سالێن 1999 و 2025 دە، ئانگۆ د ماوێ 26 سالان دە، پەکەکەیا خوە ئاڤا کر. پەکەکەیا کو ئۆجالان ھلوەشاندی، د راستیێ دە پەکەکەیا جەمیل بایک بوو. جەمیل بایک ژ ڤێ یەکێ پڕ ئاجزە.
لێ بایک ئۆجالان باش ناس دکە و دزانە کو ھەکە ئەو پەیڤەکێ کو ئۆجالان ژێ عاجزب ببە بکە، ئۆجالان بێیی دودلی دێ وی ژ ھۆلێ راکە. ژ بەر ڤێ یەکێ، ئەو ب شێوەیەکێ پۆلیتیک نێزیکی ئۆجالان دبە. د کۆنگرەیا پەکەکێ دە، وی سۆند خوار کو “دلسۆزیا بێ داوی ب ئۆجالان” بدە. لێبەلێ، پشتی کۆنگرەیێ، وی خوە ژ خەباتا چالاک دوور خست، ب ھنجەتا “تەندورستیا خوە یا نەباش”.
ئۆجالان خوە شووندە دایینا بایک فەرق کر. ل گۆری چاڤکانیێن پەکەکێ، د ھەڤدیتنەکێ دە د مەھا تەباخێ دە، ئۆجالان گۆت، “ھەکە ئەو نەخوەش بە، بلا وەرە ڤر و ل ئیمرالیێ لگەل من بمینە.” جەمیل بایک ب توندی بەرتەک نیشانی گۆتنێن ئۆجالان دا. ئەو کەت ناڤ تێکچوونەکە دەروونی. تێ راگھاندن کو وی ژ کەسێن ل دۆرا خوە رە گۆتیە، “سەرۆک دیسا دین بوویە،” و ب تەڤاھی ژ خەباتێ ڤەکشیایە.
بایک ئێدی ناخوازە کەسی ببینە و ژ بەر سەدەمێن تەندورستیێ ب تەڤاھی ژ کار ڤەکشیایە. جەمیل بایک نھا ل دەڤەرەک نێزیکی سلێمانیێ، کو ھندک کەس پێ دزانن، لگەل کۆمەک ژ پاسەوانێن ئەولەھیێ، پزیشکەکێ و فیزیۆتەراپیستەکێ دژیت. تەنێ جارنان مێڤانێن تایبەت سەردانا وی دکن. لێبەلێ، تێ گۆتن کو پزیشکەک ژ ئیرانێ ھاتیە. گەلۆ مێڤانێن وی تەنێ پزیشکن یان ژی لگەل ھندەک لایەنان جڤینان دکە، ڤێ یێکێ سەرکردەیێن پەکەکێ ژی نزانن.
بەسێ ھۆزات و تیمەکا کۆردیناسیۆنێ یا ژ سێ کەسان خەباتێن رێخستنێ دمەشینن.
یێن کو جەمیل بایک ناس دکن دبێژن کو ھەر جارا کو ئەو لگەل ئۆجالان پەڤچوونان دکە، ئەو پرسگرێکەک تەندووریستی دکە ھنجەت دا کو ب رۆژان رازێت و ل تەلەڤیزیۆنێ تەماشە بکە، ب ڤی رەنگی خوە ژبیرڤە دکە. چاڤکانی دەستنیشان دکن کو بایک نھا ژی ھەمان تشتی دکە، تەنێ فیلم و فیلم کارتۆنان تەماشە دکە.
بەلێ، چارەنووسا جەمیل بایک ب ئۆجالان و پێڤاژۆیێ ڤە گرێدایییە.
