هونهرا ئۆجالان یا زێدهكرنا مرنێ: «لهعنهتا بێی سهرۆك ژیان نابه» !!
عهبدوللا ئۆجالان رێبهرێ پهكهكێ د پهیاما خوه یا ههری داوین ده كو ژ بۆی كۆنگرهیا 4مین یا كۆمهلهیا پشتهڤانی و ئالیكارییا مالباتێن كو خزمێن خوه وهندا كرنه ره شاندیه دبێژه: ئهز ناخوازم داییکەکە دن شینیێ بگێرە.
نهجارا یهكهمه ئۆجالان خهمگینی و عهفۆیێ ژ مالباتێن عهسكهرێن تركان ره دخوازه، وی د بهرێ ده ژی ل دادگهها تركیهیێ ل همبهری دایكێن عهسكهرێن تركان، عهسكهرێن كو ژ هێلا گهریلایان ڤه هاتنه كوشتن گۆتبوو: «من دڤێت ل بهرانبهر خێزانێن برێز یێن شههیدان ببێژم، ئهز وێ دلئێشییا گران و نهخوهشییا ههوه د دلێ خوه ده پارڤهدكم، ئهز ههڤپشكێ خهما خێزانێن شههیدانم، دلگرانم، سۆزێ ددم ب كریار كار بۆ براتیێ بكم».
ئۆجالان ل وێ دهمێ ژی داخوازا عهفۆیێ ژ دایكێن عهسكهرێن تركان كر و ب یێك پهیڤێ ژی داخوازا عهفۆیێ ژ دایكێن شههیدێن گهریلایان نهكر بوو.
ئۆجالان ئیرۆ ژی هاتیه عهینی تشت گۆتیه و ژ دایكێن عهسكهرێن تركان ره دبێژه: «ئهز ناخوازم داییکەکە دن شینیێ بگێرە». و دیسا ب یێك پهیڤێ ژی بهحسا دایكێن شههیدێن گهریلایان نهكر.
ئۆجالان د بهشهكی دن یێ پهیاما خوه ده گۆتیه: «د قۆناغا نها دە تێکۆشینا ئازادیێ، نە هونەرا زێدەکرنا مرنێ یە، هونەرا برێخستنکرنا ژیانێ یە».
ژ دهستپێكا شهرێ چهكداری یێ پهكهكێ و تركیهیێ، ئۆجالان و رێخستنا خوه سیاسهتا «هۆنهرا زێدهكرنا مرنێ» ل سهر كهچ و خورتێن كوردان د مهشاند، تهڤی خاپاندن، رهڤاندن و شووشتنا مهژیكێ وان، ئۆجالان و رێخستنا خوه بهرێ ب ههزاران جوانێن كوردان دا مرنێ، وان مرن لاییقی جوانێن كوردان ددیت، مرن پیرۆز دكر و ژیان رهش دكر، وان دهوام ژ جوانێن كوردان ره دگۆتن: «ژ بۆ كو هوون بژین، دڤێ هوون بمرن».
پهكهكێ ب دههان ههزار جوانێن كوردان ل ژێر دووریشمهیا لهعنهتی یا «بێی سهرۆك ژیان نابه» ب كوشتن دا نه، ئیرۆ ژی ئۆجالان هاتیه دبێژه: «تێكۆشینا ئازادیێ نه هونهرا زێدهكرنا مرنێ یه»!!.
یا راست ئۆجالان ب ڤێ گۆتنا خوه راست دبێژه، لێ ژ بۆی تركان نه ژ بۆی كوردان، ژ بهر كو وی 43 سالان جوانێن كوردان ب سیاسهتا زێدهكرنا مرنێ ئاژۆتن و پشتره ههر تشت ل ژێر ناڤێ پرۆژهیا «تركیهیا بێی تهرۆر» فرۆتن.
شێنییا كو ئۆجالان ناخوازه چ دایكێن عهسكهرێن ترك ئێدی بگێره، بۆ دایكێن گهریلایان تام بهرهڤاژی یه، پهكهكه كو ههیا ئیرۆ رۆژانه ناسنامهیێن كۆمێن گهریلایان د مهدیایا خوه ده پار ڤهدكه، رۆژانه ل دههان مالێن كوردان شێنیێن نوو چێدكه، دلێ دههان دای و باڤان د شهوتینه.
