نە ھێرسەکە دەمکی بوو…و قەت نە حەرکینا ھێرسا کۆمەکێ بوو…
د دەما یاریا بورساسپۆر و سۆماسپۆرێ دە، ل سەر تریبوونا سڤکاتی و گۆتنێن نەباش ل لەیلا زانا ھاتن کرن. پشتی ڤێ بێرێزییێ، ھەر کەس ژ پارلامەنتەرێن کورد یێن د ناڤ ئاکەپێ دە بگرە ھەیا پارلامەنتەرێن مەھەپێ بوویەر شەرمەزار کر. ھەتا مەرال ئاکشەنەر، کو ژ کەسایەتێن نەتەوەپەرەستێن د سیاسەتا ترکیێ دەیە ژی، ل لەیلا زانا گەرییا و گۆت کو ئەو “پشتگریا وێ دکە”…
لێبەلێ، ئەڤ زمان نە نوو بوو…
ئەڤ زیھنیەت ژی نە نوو بوو…
و ئەڤ بێرێزی نە تەنێ ل سەر لەیلا زانا بوو…
ئەو سڤکاتی و خەبەر ل ناسنامەیا کوردان ھاتە کرن.
ناڤێ لەیلا زانا ل ڤر سەمبۆلەکە. ئەڤە ئەو لەیلا زانایە کو سۆندا خوە ب کوردی ل پارلەمەنتۆیا ترکیەیێ خواری، ئەو ببۆ سەمبۆلا ئاخافتنا ب کوردی و ب ناسنامەیا کوردی سیاسەت کرنێ. ژ بەر ڤێ راستییا زانا، ب سڤکاتی کرنا ب وێ پەیامەک ژ بۆ کوردان ھات شاندن…
ئەڤ زیھنیەت نە زیھنیەتا کۆمەک ئالیگرێن یانەکا فوتبۆلێ یان ژی کۆمەکا سیاسی د ناڤ پارتیەکێ دەیە کو ل دژی پێڤاژۆیا ئاشتیێ نە؛ ئەڤە ئەو زیھنیەتە کو 100 سالن کۆمارا ترکیێ ل دژی کوردان ددە مەشاندن.
نھا، سیاسەتمەدارێن ترک یێن کو بێرێزییا ل لەیلا زانا ھاتی کرن شەرمەزار دکن، گەر پێڤاژۆیا قاشۆ “چارەسەریێ” نەبوویا وان دەنگێ خوە نەدکر. ژ بەر کو ئەو لایەن قەت ل دژی مرنا کوردان دەرنەکەتنە.
ئەو نە ئالیگر، ئەو بەرپرسیارێن وێ زیھنیەتێنە کو کوردان ئینکار دکە.
مخابن، ھندەک لایەنێن کورد، ھەول ددن کو ژ بۆ پێڤاژۆیا ئاشتیێ پرسگرێکێ نەرم بکن، مینا سیاسەتمەدارێن ترک راستیا مەسەلەیێ ئەشکەرە ناکن.
میناک، پارتیا دەم، کو ئیدیعا دکە کو نوونەرتیا کوردێن ل باکورێ کوردستانێ دکە، داخویانیەک دا لێ نەکاری ببێژە، “ئەڤ ئێریشەکە کو ل ھەمی کوردان ھاتییە کرن” وان پەیڤا “کورد” ژی ب کار نەئانی.
ب ھەمان ئاوایی، تەڤگەرا ژنان یا پەکەکێ، KJB، داخویانیەک دا و ئەڤ بێرێزی وەکی ل دژی ژنان ھاتییە کرن ب ناڤ کر. تەڤگەرێن ژنان یێن دن یێن گرێدایی وان ژی داخویانیێن ب ھەمان شێوەیی دان. وان ھەول دا کو مەسەلەیێ وەکی کەشەکی فیمینیزمێ ب ناڤ بکن.
نا، ئەڤ نە کێشەیا ژنانە و نە ژی کێشەیا وەرزیشێیە: ئەو ئێرشەکە ل سەر نرخێن مللەتێ کورد.
د 23ێ جۆتمەھێ دە، ئالیگرێن فەنەرباخچەیێ ژی بێرێزی ل یاریکەرێ کورد دەنز ئونداڤ کرن. تەنێ ژ بەر کو ئەو کورد بوو. پارتیا دەم وێ دەمێ ژی بێدەنگ ما. ئەگەر دەنگێ خوە بلند کربا و گۆتبا ئەڤ سڤکاتی ل کوردان دهێت کرن، دەولەتا ترک دا ترسیت. و چ سڤکاتی ل لەیلا زانا ژی نەدھات کرن.
گەر پارتیا دەم ڤان بێرێزییێن رێخستنکری یێن کو ل لەیلا زانا ھاتی کرن وەکە ل ھەمی کوردان ھاتی کرن ب زەلالی ب ناڤ نەکە و دژی نەسەکنە سبە-دوسبە نکارە پێشییا ھندەک ئێرشێن دن یێن کو بهێن کرن بگرە. ژ بۆ کو پێڤاژۆ نەیێ تێکبرن، دڤێت چاڤێن خوە ل ڤان ئێرشان نەگرن. ژ بۆ ڤێ یەکێ، دڤێت ئەڤ دژمناھییا ل دژی کوردان بهێت ئەشکەرەکرن. و بێ گومان، دڤێت رێیێن قانوونی ژی بهێن مەشاندن.
دڤێت کورد سەرلێدان ل فیفایێ بکن دا کو ژ بۆ ڤان داخویانیێن “نژادپەرەست و دژی-کورد” سزای وەربگرن. دڤێت بەرھەمێن ئولوداگ، کو سپۆنسۆرێ بورساسپۆرێیە، وەرن بایکۆتکرن.
