ب قاسی ئەم دزانین و فێر بوونە کو د ھەر سالەکا نوو دە ل سەرانسەرێ جیھانێ گوھەراندنێن جدی پێک تێن. د ناڤا سازی و دەزگەھێن وەلاتان دە ژی گوھەراندنێن نوو چ دبە. دەنگبێژ سترانێن نوو. نڤیسکار بەرھەمێن نوو دئافرینن و ھتد.
د وارێ ئاڤاھیان دە گوھەراندنێن خوەشک و رندک ژی تێن کرن کو کیژان وەلات دکارن ب کیژان ئاڤاھیێ ناڤێ وەلاتێ خوە دەرخن پێش، لێ دخەبتن. کورتاسیا گۆتنێ ئەوە کو د سالا نوو دە دڤێت گوھەراندن ببن دا کو مرۆڤ بزانبە مە سالەک ب شاھی، ب کێف، ب ئێش و ئەلەم ل دووڤ خوە ھشتیە. ل سەر ڤی ئەساسێ مرۆڤ، پارتی، حکوومەت و دەستھلات دەست ب کارێ نوو دکن.
د گەلەک وەلاتان دە ژ بۆنا دەمۆکراسی و کارێ باش، پارتیێن سیاسی گوھەراندنێن بەر ب چاڤ دکن. دا کو ل گۆر داخوازا گەلێ خوە تەڤبگەرن. کورتاسیا گۆتنێ ئەوە کو د ھەر سالەکا نوو دە گوھەراندنێن باش ل جھانێ پێک تێن. لێ ل باکورێ کوردستانێ؟
لێ مخابن ئەم کوردێن ل جیھانێ ڤێ یەکێ نابینن. لۆما ژی پێشیێن مە گۆتنە: “سال ب سال خوەزی ب پار”. باوەرم ئەڤ گۆتن تەنھا ژ بۆنا مە کوردان دەرباس دبە. ژ بەر کو پێشیێن مە ئەڤ ژ بۆنا کو ئەم دەرسەکێ ژێ دەرخن گۆتنە. یانی دڤێت ئەم ژی خوە بگوھەرن…
من خوەست د ڤێ نڤیسێ دە پیچەکێ ڤێ یەکێ شرۆڤە بکم
ئەم شۆرەشگەر و وەلاتپارێزێن باکورێ کوردستانێ نکارن و ناخوازن خوە بگوھەرن. ژ دەستپێکا سالێن 1970 کو پێلا وەلاتپارێزی ل باکورێ کوردستانێ گەش و خورت بوو، ھندەک کەسێن زانا کو داخوازا وان ئازادیا وەلاتێ وان بوو. دەست ب کارێن رێخستنی کرن. مالا وان ئاڤا بیت، دەستپێکەک باش بوو. خەباتێن باش و دەلال ب سایا وان کارێن رێخستنیێ، پێشکەتنێن ھێژا ژی چ بوو.
مە پرانی د وان خەباتێن خوە دە پشتی کۆدەتایا لەشکلەری یا 12 ئیلۆنا سالا 1980 کو وەکە ئاگرەکی گوور کوردستان شەوتانەد. ئەم وەکو نۆکا تو ل کەڤری بدی، ل مە ھات. ژ بەر بێ تەجروبەیی و نەکاملبوونا مە یا سیاسەتەکا راست، مە وەندا کرن و ئەم تێک چوون. پشتی بێدەنگیا ب سالان مە ھەرکەسێ ل خوە و ل کارێ خوە نێری.
کوردستان و کارێ رێخستنیێ نەکەت بیرا پرانیێ. لێ پشتی ئازادیا باشوورێ کوردستانێ (1992) و دەرباسبوونا سالا 2000 شەرت و مەرج ل ترکیێ و باکورێ کوردستانێ ھاتن گوھەراندن و ھندەک نەرمی و ئارامی چێبوو. لۆما ژی ژ وان مەزنێن مەیێن وەلات د ناڤا ئاگری دە ھشتبوون و رەڤیان بوو. خوە و ھەمی مالباتێن خوە ل ئەورۆپا ب جھ کرن. خوەستن وێ ئیمکانا پەیدە بوویە دیسا ژ بۆنا خوە و مالباتێن خوە ب کار بینن، دەستب کارێ رێخستنیێ کرن.
ھندەکان پارتی و رێخستنێن نوو ڤەکرن، ھندەکان ژی ل سەر کۆکا خوە یا کو وی ئەو تەرکاندبوو و رەڤیا بوو، ژ نوو دە دەست ب کارێ رێخستنیێ کرن. مالا وان ژی ئاڤا بیت. ل گۆر من ئەو ژی باش بوو
لێ تشتێن نەباش و خەراب ئەو بوو کو ڤانا ئانگۆ ژێھاتیێن مە(!) کەتن سەرێ کانیان ھەمی ئیمکان رێ و رێباز خستن دەستێن خوە. ل وەلات و ل ئەورۆپا نەھشتن جوان یان کەسێن ژ وان زاناتر ببن بەرپرس دا کو کارێ رێخستنیێ ل گۆر دەمێ ب رێڤە بمەشە.
پارتی و رێخستنێن ھەیی ھەر ما ژ وان رە کو د دەما خوە دە ب سەرنەکەتبوون و رەڤیابوون. لۆما لێ خەبتین کو چەند کەسێن وەکە خوە یێن رەڤۆک و بەرژەوەندیپەرەست ژی دیتن. ب نڤیس و بەلاڤۆکان داخویانی دان کو دێ ژ نوودە کارێ ژ بۆنا سەرخوەبوونا کوردستانێ بکن.
لێ مخابن گاڤەکێ پێشڤە نەچوون. ژ بەر کو خوەستن پارتیێ ژ بۆنا خوە و مالباتێن خوە ب کار بینن. کەسێن زانا و ژێر نێزیکێ خوە و پارتیێ نەکرن. ھندەک ب شاشی ژی کەتن ناڤا وان ئەو ژی ب ترس و تەھدیدان بێدەنگ کرن دا کو بکاربن سەلتەناتا خوە بدۆمینن.
گەلەک جڤین، کۆنفەرانس و کۆنگرە ژی پێک ئانین. مخابن ھەمی ژی ژ هەمان کەسان پێک دھاتن. ھەر جارێ ژی ئەو کەسێن من ب ناڤ کرن دبوون سەرۆک و بەرپرس. لێ من ب خوە نەدیت و نەبوون شاھدێ وێ یەکێ کو ڤانا رۆژەکێ خوە گوھەرین. ھەر جار ب مەژیێ سالێن 1970 خوەستن و دخوازن کارێ رێخستنیێ بکن. ژ بەر کو ئەڤ تام ژی ل گۆر بەرژەوەندیا وان یا سەخسی بوو.
