رێڤەبەریا خوەسەر و رەوشا رۆژئاڤایێ کوردستانێ!

پەیمانا 10ێ ئادارا 2025ێ دەست و لنگێ کوردان گرێدایە!

رێڤەبەرییا خوەسەر یا رۆژئاڤایێ کوردستانێ، د پێشوازیکرنا پەیمانا 10ێ ئادارێ یا 2025ێ دە، کو د ناڤبەرا فەرماندارێ ھێزێن سووریا دەمۆکراتیک (ھەسەدێ) مەزلووم عەبدی و سەرۆکێ دەمکی یێ سووریێ ئەحمەد ئەل-شەرع (کو ب ناڤێ ئەبوو محەمەد ئەل-جۆلانی تێ ناسکرن) دە ھاتیە ئیمزەکرن، دییارە ستراتەژیەکا خاپاندنێ ل ھەمبەری ملەتێ کورد دمەشینە.

ئەڤ پەیمان، وەکی کو د ئاگاھیێن لبەر دەست دە تێ دیتن، نە تەنێ وەکی “مزگینیەکێ” تێ پێشکێشکرن، لێ بەلێ د راستیێ دە دەست و لنگێن کوردان گرێ ددە و ئارمانجێن وێ یێن راستین ژ ملەتێ کورد تێ ڤەشارتن.

ئەڤ پەیمان، ب دەستێ ئیستیخباراتا ترک (میتێ) ھاتیە ئامادەکرن و ب زەختا دەولەتا ترک، ب ناڤبەینکاریا عەبدوللاھ ئۆجالان، ھاتیە ئیمزەکرن!

ئەڤ ئیدیعا ب بەلگە و ئاگاھیێن ژ چاڤکانیێن جودا تێ پشتگریکرن و دیار دکە کو ئۆجالان، ژ گرتیگەھا ئیمرالیێ، ب نامە و تەلەفۆنان، تەلەکۆنفەرانسان راستەراست باندۆرێ ل سەر رێڤەبەریا رۆژئاڤایێ کوردستانێ دکە و داخوازا “ئەنتەگرەکرنا وان ب دەولەتا سووریێ رە” ژ وان دخوازە. ئەڤ خوەستن ژی داخوازا ترکییەیێ ب خوەیە.

دەستپێکا پەیمانێ و باندۆرا ترکیێ

پەیمانا 10ێ ئادارێ، کو د 2025ێ دە ھاتیە ئیمزەکرن، ب گشتی وەکی گاڤەکێ بەر ب یەکتیا سووریێ ڤە تێ بناڤکرن. د ناڤەرۆکا پەیمانێ دە، تشتێن وەکی راوەستاندنا شەری، ئەنتەگرەکرنا ھێزێن ھەسەدێ د ناڤ ئارتێشا سووریێ دە، ڤەگەرا پەنابەران و پاراستنا مافێن کوردان تێنە گۆتن. د مادەیێ چاران دە ئەڤ رەوشە پر زەلالە:

“4- ھەموو سازیێن سڤیل و لەشکەری یێن باکور و رۆژھلاتێ سووریەیێ، دەریێن سینۆر، بالافرگەھ، قادێن پەترۆل و گازا خوەزایی ئەنتەگرەیی رێڤەبەریا دەولەتا سووریەیێ بێ کرن.”

ژ دێلڤا “رادەسکرنێ”، پەیڤا “ئەنتەگرەکرنێ” ھاتییە بکارئانین. ئەڤ پەیڤا “ئەنتەگرەکرنێ” ژ بۆنا راستییا مەسەلێ نەیێ فێھمکرن، دەمەکە ژ تەرەفێ دەولەتا ترکییەیێ و ئۆجالان ڤە تێت بکارئانین. ئارمانجا بکارئانینا ڤێ پەیڤێ سەردابرنا کوردان ب خوەیە.

لێ بەلێ، وەکی کو من دیار کرییە، ئەڤ پەیمان نە د بەرژەوەندیێن کوردان دەیە.

ئاگاھیێن ژ چاڤکانیێن وەکی رووداو، ئەناب بەلەدی و فرانس 24 و داخویانییێ رێڤەبەرێن دەولەتا ترکان، دیار دکن کو ترکیە، ب رێیا ئۆجالان، ئەڤ 11 مەھن زەختێ ل سەر ھەسەدێ و مەزلووم عەبدی دمەشینە و ب گەفا داگیرکرنا رۆژئاڤایێ کوردستانێ رە، ھەول ددە کو کوردان بەشداری ناڤ دەولەتا سووریەیێ بکە، بێیی ستاتویەکا سییاسی یا دیار ژ بۆ کوردان بێت ئاڤاکرن. بنگەھا ڤان ھەولدانێن دەولەتا ترکییەیێ ژی بلەز بجیھکرنا پەیمانا 10ێ ئادارا 2025ێ ب خوەیە.

ئۆجالان، کو د گرتیگەھا ئیمرالیێ دەیە، ب نامە و تەلەکۆنفەرانسان راستەراست لگەل رێڤەبەریا رۆژئاڤا تێکلیا داتینە و داخوازا “ئەنتەگرەکرنا کوردان لگەل دەولەتا سووریێ” دکە. ئەڤ راستی ژ ملەتێ کورد تێ ڤەشارتن. د سالا 2025ێ دە، ئۆجالان ب ئەشکەرەیی بانگ ل ترکیێ کر کو د پێڤاژۆیا ئەنتەگرەکرنێ دە رۆلەکێ پۆزیتیف بلیزە. ھەبوونا ترکییەیێ یا لەشکەری و ئیستیخباراتی ل سوویەیێ و باندۆرا وان یا ل سەر ھەتەشێ دییارە و ئەڤ یەک ژی نیشان ددە کو پەیمان ب باندۆرا ترکیێ ھاتیە چێکرن. دەولەتا ترکییەیێ، کو ھەسەدە وەکی تەھدیدەکێ دبینە، ب رێیا ئۆجالان ھەول ددە کو کوردان د ناڤ دەولەتا سووریێ دە ئەنتەگرە بکە، بێیی کو ئۆتۆنۆمی یان فەدەراسیۆنێ بدە وان.

خاپاندنا ملتێ کورد و نەبوونا ستاتویەک سیاسی

ب قاسی کو دییارە؛ “رێڤەبەریا خوەسەر”، ب تایبەتی ب گۆتنێن وەکی عەبدولکەریم عۆمەر، پەیمانێ وەکی “مزگینیەکێ” پێشکێش دکە، لێ بەلێ ئەڤ تێنەگھیشتینەکە، یان ژی ھەولدانەک ڤەشارتنێیە؟

پەیمان دیار ناکە کو ستاتویا سییاسی یا رۆژئاڤایێ کوردستانێ چاوا بە – ئۆتۆنۆمی، فەدەراسیۆن یان ژی تەنێ ئەنتەگرەکرنا لگەل دەولەتا سووریێ. ل گۆری ئاگاھیێن ژ 4/1/2026ێ، شاندەکا لەشکەری یا د بن سەرۆکاتییا مەزلووم عەبدی دە ل شامێیە و ئەو رەوشا ھێزێن لەشکەری و ئاساییشێ نیقاش دکن، بێیی کو دەستپێکێ ستاتویا سییاسی رۆنی بکن. ئەڤ ژی، وەکی کو من ل ژۆر گۆتییە، خاپاندنەکە! ژ بەر کو ھەبوونا ھێزێن پاراستنێ ب ستاتویەک سییاسی ڤە گرێدایییە.

-چما رێڤەبەرییا خوەسەر پەیڤا “سوورییەک نەناڤەندی” بکارتینە و نابێژە “ئەم سووریەکا فەدەرال دخوازین”؟

-چما رێڤەبەرییا خوەسەر ئەشکەرە نابێژە ژ بۆنا رۆژئاڤایێ کوردستانێ ئەم “ئۆتۆنۆمیێ”، یان ژی “فەدەراسیۆنێ” دخوازین”؟

ئەڤ یەک نیشان ددە کو ئەو ل گۆری پەیمانا لگەل جۆلانی تەڤدگەرن و ب تەنا سەرێ خوە تێکلیان دمەشینن، بێیی کو لگەل ئۆپۆزیسیۆنا کورد ھەڤرێز بن.

“کۆنفەرانسا قامیشلۆیێ” ژی، کو دڤیابوو کۆمیتەیەکا سییاسی ئاڤا بکرا، تەنێ ژ بۆ گرێدانا ئۆپۆزیسیۆنێ ب رێڤەبەریێ ڤە ھاتە بکارئانین. ئەڤ ژی داخوازا ترکیێ و ئۆجالانە، کو دخوازن کوردان بێ ستاتو بھێلن.

باندۆرا دەرڤە و پێشەرۆژا پەیمانێ

ئامەریکا، کو پشتگریا ھەسەدێ دکە، د پێڤاژۆیێ دە رۆلەک گرینگ دلیزە، لێ بەلێ پەیمان ھین ژی نەھاتییە بجیھانین. د داویا 2025ێ دە، کو دەمژمێرا پەیمانێیە، ھەڤدیتنێن ل شامێ ھین ژی تێنە پاشخستن یان ژی لگەل پرسگرێکان روو ب روو دمینن. ترکیە ژی، ب گۆتنا وەزیرێ کارێن دەرڤە ھاکان فیدان، داخواز دکە کو ئەڤ پەیمان زوو وەرە بجیھانین دا کو ھەسەدە رادەستی دەولەتا سوورییەیێ ببە و کورد تێک بچن.

د ئەنجامێ دە، ئەڤ پەیمان، وەکی کو عەبدولکەریم عۆمەر دبێژە، نە “مزگینی”یە، لێ بەلێ گەفەکە ل سەر ئیرادا کوردان!

کورد دڤێت دەستپێکێ ستاتویا خوە یا سییاسی دیار بکن، بەری کو ھێزێن لەشکەری ئەنتەگرە بکن!

رێڤەبەریا خوەسەر، ب شیرۆڤەکرنا پەیمانێ وەکی “سووریەکە نەناڤەندی”، گەل دخاپینە، ژ بەر کو ئەڤ تێگەھ بێیی ستاتویەک دیار ناڤەرۆکا وێ ڤالایە.

پێشەرۆژا رۆژئاڤایێ کوردستانێ لگەل ڤێ پەیمانێ د خەتەرێ دەیە و ھەگەر نەیێ رەدکرن، دبە کو کورد بێیی ئۆتۆنۆمیەک راستین بمینن.