کوردستان، وەلاتێ کورد و کوردستانییایە!
دەولەتێن کو ئاخا ملەتێ کورد داگیر کرنە، بلا باش بزانبن کو گەر کوردەک ژی ب تەنا سەرێ خوە ل سەر روویێ ئەردێ بمینە، وێ دۆزا وەلاتێ خوە بکە.
بلا دەولەتێن داگیرکارێن کوردستانێ، یێن کو ب زۆر و زلمێ، ب قرکرن و سیاسەتا خوەیا ھۆڤانە ل سەر کوردان دمەشینن، ڤێ گۆتنا من ژ خوە رە بکن گوھار و ب جددی بگرن.
ئەڤ دەمەکە کو ل رۆژھلاتێ کوردستانێ، ل ھەمبەر دەستھلاتدارێن دیکتاتۆریا ئیرانێ یا داگیرکار، سەرھلدان ددۆمن. ب دەھان جانگۆری و ب سەدان بریندار و گرتی ھەنە. دەستھلاتدارێن ئیرانێ، ب ھەموو ھێزا خوە و ب ھەموو میتۆدێن خوەیێن ب قرێژ، ئێریشێ تینن سەر چالاکڤانێن ئازادییێ.
وەلاتێن وەکی ئەمەریکا و یەکیتیا ئەورۆپایێ، ل ھەمبەر ڤێ بەربەرییا دەولەتا ئیرانێ بێدەنگن. ئەڤ رەوش ھەم جھێ خەمگینیێیە و ھەم ژی جھێ مەترسیێیە.
پشتی ھلوەشاندنا رەژیما سووریەیێ، ب ناڤێ ھەتەشێ –کو ژ ھێزێن تەرۆریستێن وەکی داعش، ئەل-قاعیدە، ئەل-نوسرە و ئارتێشا ئازادا سووریەیێ پێک تێ–، ل شامێ دیفاکتۆ ئیقتیدار گرتن دەستێ خوە. ھەموو جیھانا مەدەنی ڤان ھێزان ناس دکە، لێ ئەمەریکا کەسەکی ب ناڤێ مەحموود ئەل-شارع (جۆلانی) –کو 10 میلیۆن دۆلار خەلات دانیبوو سەر سەرێ وی–، ئەو خەلات راکر و وەکی “ئاڤاکارێ سووریەیەکە نوو” دەستنیشان کر، پێ رە کەت تێکلیێ، وی بر کۆشکا سپی و ب گەرماھیەک مەزن پێشوازی ل ڤی قاتلی کر. ھەموو ھێز و کەسایەتیێن ھەستیار ژ ڤێ یەکێ شاش مان!
دیسا ئەمەریکا، ژ بۆ ئاڤاکرنا “سووریەیەکە نوو”، دەولەتا ترک یا بەربەری کو دژمنێ ملەتێ کوردە، کر ئالیکارێ جۆلانی ژ بۆ ئاڤاکرنا سووریەیێ! ئەڤ تێ واتەیا کو ھوون کەریێ بەرخان ئەمانەتی گورێ ھار دکن!
وەکی کو ئەم دزانین، دەولەتا ترک، د ناڤ ڤان ھێزێن توندرەو، قاتل و تەرۆریست دە خوەدی ھێزەک مەزنە. ل گۆری ئاگاھیێن ل بەر دەست، ترکیێ ل سەر ئاخا سووریەیێ 30 ھەزار چەکدارێن ژ ڤان ھێزان ئیدارە دکە، پرچەک دکە و ب چەکێن گران وان راسەری دوورزیان، مووسەویان و کوردان دکە.
ب سەرێ سالێ رە، د تاخێن کوردان دە دەست ب پاقژیەک ئەتنیکی یا ل دژی ملەتێ کورد کرنە. ب سەرکێشیا سەربازێن پارامیلیتەر یێن دەولەتا ترک، ڤان ھێزێن توندرەو –ب چەکێن دەولەتا بەربەری یا ترک، ل تاخێن حەلەبێ یێن وەکی ئەشرەفیێ و شێخ مەقسوود ب چەکێن گران دەست ب ئێریشان کرنە. ئەڤ ھێزێن کو قرکرنا کوردان کرنە کارێ خوە، د مزگەفتێن خوە دە کوردان وەکی “قەومێ کافر” پێناسە دکن و “کوشتنا کوردان” وەکی واجبەکێ ئۆلی یێ ئیسلامێ ددن نیشان. ئەڤ میتۆد، میتۆدێن بەربەرێن ترکن و دەھان جاران ل ئاخا کوردستانێ ب ڤان بانگان کۆمکوژی مەشاندنە.
دەولەتا ترک یا بەربەری، لگەل ھێزێن تەرۆریست یێن ل سووریەیێ، ل دژی ملەتێ کورد پاقژیەک ئەتنیکی دەست پێ کریە. ئەو تەرۆریستێن کو ترک وان خوەدی دکن، چەکان ددن وان و ل دژی کوردان بکار تینن، لگەل ترکێن بەربەری د یەک دۆسیایێ دە نە. کوردنۆ، ل ھەمبەری ڤان بەربەران ببن یەک.
دەست ژ سیاسەتا کو خزمەتا دژمنی دکە و کارەساتێن دژمنان یێن ل سەر کوردان ھێسان دکە، بەردن.
رۆژھلات-رۆژئاڤا، باکور-باشوورێ کوردستانێ تویە، جانێ تەیە، برایێ تەیە.
ترک، عەرەب و فارس دەست ب خوینن، دژمنێ تە نە!
دڤێت کورد ڤێ راستیێ ببینن و دەست ژ وان کەسێن قاشۆ ب ناڤێ “سەرۆکێ کوردان” کۆلەتیا کوردان دخوازن، بەردن.
ئیرۆ رۆژا ڤێ هشیاریێیە:
کوردستان یەک وەلاتە.
رۆژئاڤا رۆژھلاتە،
باشوور و باکور راکە.
