ب ئێریشا کو د 7ێ چلە دە ل ئەشرەفیێ و شێخ مەقسوود دەست پێ کری ڤە، پلانەکا مەزن و قرێژ ل دژی رۆژئاڤایێ کوردستانێ ھاتە مەشاندن. ئەڤ پلان ب ئارمانجا پەرچقاندنا کوردان، شکاندنا روومەتا وان و تەسلیم گرتنا وان بوو. واتە، مافێ ڤەکشینەکا ب روومەت ژی نەدان رۆژئاڤا.
ب ئاوایەکی ھۆڤانە و بێەخلاقی ئێریشی ئاخا کوردان، ملکێ وان، بەنداڤ،پەترۆل و ژیانا وان کرن.
د بیرکارییا ژیانێ دە فۆرمولەک ھەیە: “ھوون تەنێ دکارن ل جھێ کو ئەو دخوازن ل وە بدن خوە بپارێزن.” ژ بەر کو ئێریش ل سەر ھەبوونا کوردانە، وێ دەمێ پاراستن دێ ب کوردیتیێ بە.
و ب راستی، د ئێریشێن ل سەر رۆژئاڤا دە، کوردان ب کوردایەتیێ خوە پاراستن. کوردان ب ھشمەندیا کوردستانێ خوە پاراستن. کوردان ب ئالا کوردستانێ خوە پاراستن. ئەڤ سەرکەفتنا ھەری مەزن یا کوردانە. ل ھەموو وەلاتێن ئەورۆپایێ، د سەرمایا کانادایێ دە، ل لوبنانێ، ل سوروجێ، ل ھەر چار کنارێن دونیایێ، کوردان ب بلندکرنا ئالا کوردستانێ ل بەر خوە دان. ئەگەر ئیرۆ چەتەیێن گرێدایی ئەحمەد شارع و شامێ نەکارینە مینا شێخ مەقسوود بکەڤن حەسەکێ و قامشلۆیێ و تالان بکن، سەدەما ھەری مەزن ئەوە کو کوردان ب ھشمەندی و سەمبۆلێن نەتەوەیی یێن کورد ل بەر خوە دان.
و ژ ھەموو وێنەیان یا ھەری خوەشک ئەو بوو کو ئالا کوردستانێ ل سەر سنگێن شەرڤانێن کورد ھاتبوو دالقاندن. ئەو ئالا کوردستانێ بوو کو ل سەر ئاڤاھیا شارەداریێ یا قامیشلۆیێ، ب سروودا مللی “ئەی رەقیب” ، ژ ئالیێ شەرڤانێن حەسەکێ ڤە دھات بلندکرن.
دبێژن یەک مووسیبەت ژ ھەزار شیرەتان چێترە. ڤان ئێریشان رۆژئاڤا نەچار کریە کو ڤەگەرە سەر کۆکا خوە. ژ بەر کو، د راستیێ دە، پشتی 2013ێ، رۆژئاڤا ژ ناسنامەیا خوە یا کورد-کوردستانی ھاتبوو قوتکرن. بفکرن کو ناڤێ رۆژئاڤا و کوردستانێ د بەرنامەیا ھەسەدێ دە ژی تونە بوو. ھەما بێژە گۆتنا پەیڤا رۆژئاڤا ژی وەکی خیانەت دھات حەسباندن. کوردی وەکی گۆتارا تەرۆریست ھاتە حەسباندن. ئالا کوردستانێ ھاتبوو قەدەغەکرن.
د 17ێ کانوونا پێشین یا 2015ێ دە، ل گرکێ لەگێ، ھێزێن ئەولەھیێ یێن گرێدایی پەیەدێ و یەپەگێ ب ئاڤا زەختکری ئێریشی ئالا کوردستانێ یا 200 مەتران درێژ کرن. گەل ب توندی ل بەر خوە دا دا کو ئالا کوردستانێ نەکەڤە خوارێ. رۆژا دن، سەرۆک بارزانی داخویانیەک دا و گۆت، “رۆژەکێ ئەو دێ پۆشمان ببن.” ژ وێ دەمێ ڤە، ل عاموودێ، قامشلۆ و گەلەک دەڤەرێن دن ئێریش ل دژی سەمبۆلێن کورد ھاتنە کرن. جوانێن شۆرەشگەر ئالا کوردستانێ شەوتاندن، ئێریشی وێنەیێن نەمر مەلا مستەفا بارزانی کرن، و ھێزێن ئەولەھیێ ئێریشی کەسێن کو ب ئالا کوردستانێ دمەشیان کرن.
و ئەو رۆژ ھات. نھا، ھێزێن کو ئێریشی وێ ئالێ کرن، ھەول ددن کو ب وێ ئالا پیرۆز خوە بپارێزن. و ھەموو کورد ب وێ ئالا ل دۆرا رۆژئاڤا کۆم بوونە و وان دپارێزن.
ئالایێن نەناس، وێنەیێن ئۆجالان، گۆتنێن نە-کوردی، سلۆگان و ھتد… دەرکەت ھۆلێ کو ئەو ھەموو تەنێ کارتۆن بوون…
