بوویەرێن ل رۆژئاڤا، بەشا ھەری بچووکا کوردستانێ، ژ 7ێ چلە ھەتا 30ی چلە، گەلەک پرس د ھشێ کوردان دە دەرخستن ھۆلێ و گەلەک راستی ئەشکەرە کرن. ڤان 23 رۆژان تشتێن کو 26 سالان ڤەشارتی بوون ئاشکەرا کرن. نھا کورد دپرسن: عەڤدللا ئۆجالان کییە و ئارمانجا وی چیە؟ گەلۆ فکرێن عەڤدللا ئۆجالان راستییا کوردان تەمسیل دکن؟
و کوردان دیتن کو دەما کو دۆر تێ سەر کورد و کوردستانێ، دڤێت کی پێشەنگ و کی رێبەر بە.
رۆژئاڤا د ڤی شەرێ 23 رۆژان دە ونداھیێن گران دان. ب پەیمانا 30ێ چلە یا د ناڤبەرا ھەسەدێ و شامێ دە ھاتی ئیمزەکرن، رێڤەبەریا رۆژئاڤا %42ێ ئاخا خوە وندا کر. ھەما ھەما ھەمی بیرێن خوەیێن پەترۆلێ وندا کرن. رەژیما سووریێ دەرباسی ناڤا باژارێن کوردان. تەنێ ئالیێ ئەرێنی یێ پەیمانێ ئەڤە کو رێ ل بەر گھیشتنا شەر بۆ باژارێن کوردان یێن وەکی قامشلۆ، دێرک و عاموودێ گرت، ب ڤی رەنگی گەل ژ کۆمکوژیەکێ رزگار کر. واتە، ل رۆژئاڤا، مرن نیشانی کوردان دان داکو وان ب نەخوەشییا ستمێ رازی بکن.
راستی ئەڤە کو پێڤاژۆیا کو رۆژئاڤا ژ کۆمکوژیەکێ رزگار کری و ژ بۆ رێڤەبەریا رۆژئاڤا وەخەت چێکری، یەکبوونا گەلێ کورد بوو، گەلێ کورد مل ب ملێ ھەڤ چەمبەرا پاراستنێ ل دۆرا رۆژئاڤا ئاڤا کر. ب تایبەتی باشوورێ کوردستانێ بوو کەڤرێ بنیاتی یێ ڤێ چەمبەرێ. و بێ گومان، ھەلوەستا سەرۆک بارزانی ل دژی ھەولدانێن داگیرکرنا رۆژئاڤا ھێزا مەعنەوی-مۆرالێ بوو ل پشت کوردان کو بکاربن ڤێ چەمبەرێ ئاڤا بکن. نە تەنێ یا مەعنەوی، سەرۆک بارزانی ب ھەولدانێن دیپلۆماتیک، سیاسی، ئابۆری و ئالیکاریێن گشتی ژی ل پێشیا ئێرشێن ل سەر رۆژئاڤا ئاستەنگیەک چێکر. ب ڤێ یەکێ، وی ب باندۆر ھەمی گۆتنێن پەکەکێ یێن دژی-بارزانیان ژ سالێن 1990 ڤر ڤە بکاردانین د چاڤێن گەل دە کرنە د تەنەکا گلێشی دە.
و نھا، کورد ب خوە ل سەر میسیۆنا عەڤدللا ئۆجالان و رێخستنا وی پر ب گوومان و شکن. ئۆجالان، کو ب سالان وەکی “گرتیەکی د دەستێ دەولەتا ترک دە” تێ ناسین، و ژ بەر ڤێ یەکێ ژ ھێلا گەل ڤە ب ھەستیاری تێ پشتگری کرن، ئێدی ئۆجالان د چاڤێن رایا گشتیا کوردان خلاس بوو. دیار بوویە کو رۆلا ئۆجالان ژ یا حەسەن خەیری ژی خرابترە، کو دەما پێڤاژۆیا لۆزانێ دە کورد د بن رەحما ترکیێ دە ھشت. فانتازییێن ئایدۆلۆژیک یێن ئۆجالان د راستییا سییاسەتێ دە وەکە پڤدانکەکێ پەقیا و دەستکەفتێن لەشکەری ژی ژ ناڤ برن.
تێکچوونا میسیۆنا رێبەرتی-پبووتپەرەستییا ئۆجالان د ناڤ گەلێ کورد دە، ھەری زێدە دەولەتا ترک ترساندیە. ژ بەر کو ئەو ب رێیا ئۆجالان کوردان کۆنترۆل دکە. نھا، ژ بۆ پاراستنا ناڤوودەنگێ ئۆجالان، باخچەلی کەتییە ناڤا ھەولدانا و گەفێ ل کوردێن کو ئۆجالان نە عەجبینن دخوە. دەولەتا ترک، کو د مەشێن ژ بۆ رۆژئاڤا دە ل باکورێ کوردستانێ ب ھۆڤانە مرۆڤان ئیشکەنجە دکە، پشتی کو پەیمان چێبوویی دەستوورێ ددە خوەپێشاندانان. ئانگۆ، ل ترکییێ گۆتنا “بژی بەرخوەدانا رۆژئاڤا” قەدەغەیە، لێ گۆتنا “بژی سەرۆک ئاپۆ” سەربەستە.
ھەکە ھەر کەسێ کو ب بالداری ل مژارێ بنێرە دێ ببینە کو… ل رۆژئاڤا، ئۆجالان وندا نەکر؛ ئۆجالان ب کوردان دا ونداکرن. و دەولەتا ترک دێ ب ڤی شێوازێ خایینتی ئۆجالان ل دژی ھەمی بەشێن کوردستانێ ب کار بینە. ئێدی ئۆجالان وەکی رێبەرکی کورد دیتن خیانەتەکە ل ھەمبەری نەتەوەیا کورد.
و مەسەلەیا رۆژئاڤا ئەشکەرە کر کو دەما دۆر تێ سەر کورد و کوردستانێ، سەرۆک بارزان، ژ ھەلوەستا کوردایەتی تەعویز نەدا، لۆما ژی سەرۆک بارزانی د دلێ ھەموو کوردان دە یەکانە ئەندازیارێ کوردستانەک سەربخوەیە.
