بووبێ ئەسەر

رۆژا کو پەکەکە ژ لایێ داگیرکەران ڤە ھاتبوو دامەزراندن، ئارمانج و ھەدەفا وێ ئەو بوو کو ھەمی ھێژاھیێن کورد و کوردستانیان تێک ببە. ژ بۆنا کورد نەبن دەولەت چ لازمبوو ئەو کرن، ھێژ ژی دکن.

خراب بوون و وێرانیا د باکورێ کوردستانێ کرنە، داگیرکەران نکاریبوون ئەوقاسی بکن. ژ کوشتن، وێرانی، خەندەک و قەساس نە دیار بگرن، چ تشتێن خراب ھەبوو ئانی سەرێ کوردێن باکورێ کوردستانێ.

پرانیا سیاسەتمەدارێن باکورێ کوردستانێ خەساندن کو نکاربن ژ بۆنا ئەلتەرناتیفەک کوردستانی دامەزرینن، کار و خەباتێ بکن. چ تشتێن خراب و نە ل رێ ھەبوون ئانین سەرێ وان.

ل گەلەک رەوشەنبیر و نڤیسکارێن کورد و کوردستانی وەھا کرن کو ژ بۆنا ئەو ژی نکاربن ب ئەرکێ خوە ڤە رابن. پرانیا وان بەرێ کرنیێن خوە، دوورە ژی خەساندن. ژ بۆنا نکاربن رێیا راست نیشانی کوردان بدن دا کو وەکە مللەت بکاربن خوە ژ شەڤرەشێ ئازاد بکە و وەلاتێ خوە کوردستانا شێرین ئازاد بکن و دەولەتا کوردی راگھینن.

ل هۆزان و دەنگبێژان وەھا کرن کو ب دەنگ و ئاوازێن خوە نکاربوون دەردێ گەلێ خوە ب سترانێن کوردی بینن زمان. مللەت ترساندن، کوشتن و مالێن وان ب سەر واندە ھلوەشاندن دا کو وەلاتێ خوە بتەرکینن، بەرب باژارێن مەزن یێن ترکان ڤە ھەرن.

ب ئالیکاری و ھەڤکاریا داگیرکەران سەدی ھەشتێ ئەو داخوازا داگیرکەران ئانین جھ. د ناڤا پارتی و رێخستنێن وەلاتپارێزان دە ھنگێ فەسادی، فێلبازی، رانت، مەقام و کورسی پێشکێش کرن کو ھێژ ژی ھندەک پارتی و رێخستنێن ژ خوە رە دگۆتن، ئەم کوردستانی نە، ھەشێ وان ھێژ ژی نەھاتیە سەرێ وان و د ناڤا گەرینەکا پەکەکێ دە دزڤرن.

یانی ب گۆتنەک دن باکورێ کوردستانێ ژ مێرانیێ خستن. تشتێن داگیرکەران دخوەستن پێک ئانین. یێن ژ مێرانی دە ژی بکەڤن، وێ نکاربن زارۆکان چێ بکن. پرانیا یێن ھەبوون ژی ل سەرێ چیایان ژ بۆنا ئارمانجەکا ڤالا دانە کوشتن. ژ خوە وەلاتەکی بێ زارۆک ئانگۆ جوان ژی مرییە…

دوورێ ل باشوورێ کوردستانێ ڤەگەریان خوەستن وان دەستکەفتیێن ھاتبوون ب دەستخستن تێک ببن. ئەڤ ژی وەکە شەرێ وان و بارزانیان بوو رێ دان دا کو ھندەک ئەندامێن وان عاجز نەبن. واتە خوەست بێژن ئەم ل دژی فەئۆدالیزما بارزانیان شەری دکن. لێ ئارمانجا سەرەکی تێکبرنا دەستکفتیێن باشوورێ کوردستانێ بوو، لێ ب سەرنەکەتن.

ل باشوورێ کوردستانێ ژی گەلەک وێرانی پێک ئانین، لێ نکاریبوون ور تێک ببن. لەورا پرانیا ھێزێن خوە ب ئالیکاریا داگیرکەران برن رۆژئاڤایێ کوردستانێ کو ور نەبە خوەدیێ خوە و چ ستاتویان. ئیرۆ رەوشا رۆژئاڤایێ کوردستانێ باش تێ زانین کو کەتیە چ رەوشێ، دیارە. ب گۆتنەکا دن ور ژی تێک برن. ھەگەر نە تام ژی بە، لێ ب قاسی داگیرکەران ژ وان دخوەستن ب سەرکەتن. سەرکەتنا وان بوو وەنداکرنا ملەتێ کورد ل رۆژئاڤایێ کوردستانێ…

نھا دیسا دخوازن ژ نوو دە ھێزێن خوە، گەریلایێن خوە بکشینن باشوورێ کوردستان دا کو ور ژی وەکە باکور و رۆژئاڤایێ کوردستانێ وێران بکن و وێ دەستکەفتیا ھەیی ژ ھۆلێ راکن. دڤێت دەستهلاتا باشوورێ کوردستانێ و تایبەتی بارازان یێن خوەدی دیرۆکەک دوور و درێژ یا تەکۆشینا ژ بۆنا ئازادی و سەرخوەبوونا کوردستانێ دانە، ھایداری ڤێ رەوشێ و لیستکێن پەکەکێ یێن نوو بن.

چووینا گەریلایێن پەکەکێ بۆ باشوورێ کوردستانێ ژ نوو دە، نە ژ خێرێ رەیە. ئەو ژی ل سەر داخوازا گۆتنێن رێڤەبرێن ترکیێ دکن. ژ بەر کو وەزیرێ دەرڤەیێێ ترکیێ ھاکان فیدان گۆتبوو: “رۆژئاڤا تەمام بوو. دڤێت ئێدی قەندیلێ (ھوون کوردستانێ فێم بکن) ژی بقەدینن.”

ل گۆر من ئەڤ نامەیەکە ژ بۆنا پەکەکێ کو ھەمی ھێزێن خوە ببن باشوورێ کوردستانێ دا کو ئێدی ل ھەمبەر بارزانیان و دەستھلاتا ور شەری بکن. لۆما دبێژم، دڤێت رایەدارێن باشوورێ کوردستان و تایبەتی بارزانی ژ بۆنا ئێریشێن نوویێن پەکەکێ ئامادە بن.

ھەبوونا باشوورێ کوردستانێ مرن و تێکچوونا ترکیێ و داگیرکەرانە. ژ بەر ڤێیە ھەتا کو ژ دەستێ وان بێ وێ ب سایا پەکەکێ ور ژی وێران و تونە بکن. ل گەل دەستھلات و بارزانیان دڤێت ھەمی کوردێن جیھانێ ل ھەمبەر ئێریشێن پەکەکێ یێن نوو خوە ئامادە بکن…

چاوا کو ھەمی کوردێن ل ئەورۆپا ژ بۆنا رەوشا رۆژئاڤایێ کوردستانێ رابوون سەر لنگان، دڤێت ب وی ئاوایی ل ھەمبەر توندووتووژیا پەکەکێ ژی رابن.  ب یەک ھەلوەست و ئارمانجێ بقیرێن و بێژن: “پەکەکە نە رێخستنەکا کوردانە. ئەو ژ بۆنا ھێژاھیێن کوردستانیان تێک ببە، ژ لایێ داگیرکەران ڤە ھاتیە دامەزراند”. ژ بەر کو ھەتا پەکەکە ھەبە دێ کورد رەحەتیێ نەبینن.

نھا ب زەلالی ھاتیە و تێ زانین کو ئارمانجا پەکەکێ ل سەر داخوازا خالێن خوەیێن ترک، ب ھەمی ھێزێن خوە تێدکۆشن کو باشوورێ کوردستانێ تێک ببن. لەورا نھا گەریلایێ خوە بەرب باشوورێ کوردستانێ ڤە دکشینن. ئەڤ ژی خەتەرەکە مەزنە.