بووبێ ئەسەر

ھەتا کو ل باکورێ کوردستانێ، پارتی، رێخستن و شەخسیەتێن کو دبێژن ئەم کورد و کوردستانی نە، د رۆژێن تەمسیلا گەلێ کورد دکە، ب ھەڤرە پیرۆز نەکن، باوەریا من تونەیە کو ببن یەک یان ب ھەڤرە کارێن سیاسی د بن کۆنەکی نەتەوەیی دە ژی بکن.

دەما ھەر یەک ژ وان و ل یەک باژاری نەورۆزێ پیرۆز بکن کو ئەڤ جەژنا ملەتێ کوردە. ئەڤ ب مە ددە زانین کو ھێژ ژی پارتیێن مە ژ ھەڤ دوورن. بەرژەوەندیا پارتیێن خوە د سەریا ملەتێ خوە رە دگرن. یا نە دڤێت نەورۆزێ ب ھەڤرە بێ پیرۆز بکن.

دەمێ ھەر یەک ژ وان بیرئانینا نەمر بارزانی د کۆمەلە یان جھێ پارتیا خوە دە، نە ل کۆلانان لێ د ناڤا چار دیواران دە بکن، ل گۆر من تو مانەیا خوە نادە کو ئەم نەمر وەکە سەرۆکێ نەتەوەیا کوردە، ب بیر تینن. ئەڤ تێ وێ واتەیێ کو ھەرکەس ل گۆر خوە نەمر ب بیر تینن. نە وەکە رێبەر و سەرۆکەکی نەتەوەیی یێ گەلێ کورد، دبینن. ئەڤ ژی ب مە ددە زانین کو ھێژ پارتیێن مە ل سەر خەتا نەتەوەیی نە ل ھەڤن. ھێ ژی ژ ھەڤ دوورن.

دەما کو د رۆژێن بیرئانینا مەزن و تەکۆشەرێن خوە دە، ھەر پارتیەک کو دبێژن ئەم کوردستانی نە و ئەو ب خوە بیرئانین یان پیرۆز کرنێ ب سەرێ خوە بکن، نە مەعقوولە. ژ بەر تەکۆشین و بەرخوەدانا ھەمی رێبەر و مەزنێن مە ژ بۆنا کوردستانەکا ئازاد و سەربخوە بوو.

مادەم پارتیێن مە ژی وێ دپارێزن، دڤێت ئەو بیرئانین و تەکۆشەریا مەزنێن خوە ب ھەڤرە پیرۆز بکن. چما یێن دۆزا کوردستانێ دکن ڤێ ب ھەڤرە پیرۆز ناکن؟ ھەر یەک ب سەرێ خوە پیرۆزکرن، رێبەر و سەرۆکێن د بەر تەکۆشینا کوردستانێ دە بوونە جانگۆری، نە راست و دروستە. ژ بەر کو ھەمی ژ بەر یەک ئارمانجێ بوونە جانگۆری. دڤێت ئەم ژی وەکە کورد رۆژا وان ب ھەڤرە ب بیر بینن یان پیرۆز بکن کو قیمەت و روومەتا خوە بێتر ھەبە.

 دەما کو کوردێن سیاسی یێن باکورێ کوردستانێ د رۆژێن وەھا گرینگ دە ب ھەڤرە وێ پیرۆز نەکن، ھوون بزانبن ھێژ یەکتیا ناڤا مالا کوردێن باکورێ کوردستانێ دوورە. لۆما ژی گاڤا ئەول ئەوە کو بەرێ د رۆژێن وەھا دە ب ھەڤرە بوون و ل گەل ھەڤ پیرۆز کرنە. ب ھێز و قاوەتەکا مەزن، ب گرسەیەک بلند پیرۆزکرن پتر واتەیا خوە پێک تینە.

چ دەما تشتێن من ل ژۆر ئانین زمێن، کوردێن باکورێ کوردستانێ ب ھەڤرە بکن، ھوون بزانبن کو ئێدی یەکتی و یەکرێزیا ناڤا مالا وان گھشتیە قۆناغا ھەری نێزیک. ئەو قۆناغ ژی دێ ژ مە بخوازە کو ئەم ھەر یەک ژی ئەرکا خوە بینن جھ.

ژ خوە ئەرکا رەوشەنبیر، نڤیسکار و زانایێن گەل، ئەوە کو ژ بۆنا یەکگرتن و یەکرێزیا ناڤا مالا کوردی خوە بوەستینن، کار و خەباتێ بکن دا کو ئەو ب سەرکەڤە.

ئێدی دڤێت ھەر ئەندامێن پارتیێن کوردستانی ل سەر ڤێ بسەکنن و ھەول بدن کو پارتیێن وان، رۆژێن نەتەوەیی ب ھەڤرە و ل گەل ھەڤ پیرۆز بکن. پیرۆزکرنێن ب ڤی رەنگی، نێزیکبوونا وان ژی تینە ھۆلێ کو سبە ب رەحەتی دکارن ببن یەک.

یا ھەری گرینگ ئەوە کو ئێدی دۆست و دژمن ژی دێ بزانبن کو کورد فێری پیرۆزکرنا رۆژێن خوەیێن نەتەوەیی ب ھەڤرە بکن، بوونە. ئەڤ ژی گاڤەکە کو دێ مە کوردان ب بەرھەڤ بینە کو سبە ئەمێ ب رەحەتی یەکتیا خوە، ژ جیھانێ رە دیار بکن. ژ بەر کو ھەتا ئەم نێزیکی ھەڤ نەبن، ئەمێ نکاربن ببن یەک یان د بن کۆنەکی نەتەوەیی دە یەکتیا خوە پێک بینن.

ژ بەر ڤێ ئەز دبێژم کو دڤێت ئێدی پارتی و رێخستنێن کوردستانی د رۆژێن سەمبۆلا کوردستانێ دە، سەرۆک و رێبەرێن کوردان دە، دڤێت ئەم ل گەل ھەڤ وێ پیرۆز بکن. رۆژێن رەش ژی ب ھەڤرە شەرمەزار بکن. ل گۆر من گاڤا ب ھەڤرە یەکتی یان کارکرن دێ ژ ڤردە دەستپێ بکە.

ھاتنا مەیا با ھەڤ روحیەتا کوردستانی دێ ب ئەندام، دۆست و رێھەڤالێن خوە رە گەش بکە. گەشبوونا وێ روحیەتێ ژی قاوەتا بەرخوەدان و سەرینەتەواندنا گەل ل ھەمبەر داگیرکەران نیشان ددە.

ئیرۆ ل رۆژھلاتاناڤین گوھەراندنێن مەزن دبە و پێک تێن. ھەگەر ئەم یەک بن. خوەدی یەک ھێز بن، خوەدی سەرۆکەکی ھەمی کوردان تەمسیل بکە ھەبە (ل گۆر من ئەو ھەیە. ئەو ژی سەرۆک مەسعوود بارزانییە) ئەمێ وەکە کورد ژ ڤان گوھەراندنێن پێک تێن سوودەکە باش بگرن.

لێ ل باکورێ کوردستانێ ھێژ چ رۆھنیەکا وەھا پێک نەکەتیە. لۆما ژی ل باکورێ کوردستانێ ھەرکەس ھێژ ب سەرێ خوە نە. ھەر پارتی خوە ددن پێش، وەکە ئیسپات بکە کو ئەو ب تەنێ ھەیە. دڤێت ئێدی ئەم ژ ڤێ تەنێبوونێ خوە ئازاد بکن. ببن یەک. بایێ ئازادی و سەرخوەبوونا کوردستانێ بەرب مە دە تێ. ئەڤ ژی فرسەتەکە سەد سالانە. گەلۆ ھەتا سەد سالەکی دن وێ فرسەتەکە وەھا ب دەست مە بکەڤە یان نا؟

لەورا دڤێت ئەم وەکە کورد پارتیێن مەیێن سیاسی، ڤێ یەکێ، رۆژەکێ بەری رۆژەکێ پێک بینن دا کو ئەم بکاربن دۆزا مەلەتێ خوە ب ھەڤرە بپارێزن. ژ پاراستنا مافێ کوردستانیان رە ژی ھێز و قاوەت لازمە، ئەو ژی ئەم دکارن ب ھەڤرە وێ پێک بینن. ھەتا ئەم ب ھەڤرە وانا پێک نەینن وەکە سەیدایێ جەگەرخوین گۆتیە:

“ھەتا کو ئەم نەبن یەک ئەمێ ھەرن یەک ب یەک