بووبێ ئەسەر

دەما کۆمپیۆتەرەک کار ناکە یان ژی دەرەنگ کار دکە، ھارد دیسکێ وێ تژی بوویە، پێویستە کو ئەو بهێت فۆرماتکرن و پرۆگرامێن نوو لسەر بهێن بارکرن دا کو باش کار بکە.

لۆما دبێژم: ل باکورێ کوردستانێ ژی سیاسەت ھاتیە خەتماند. نە ئەنیەکا کوردستانی و نەتەوەیی تێ دامەزراندن و نە ژی رێخستنێن ھەر یەک ژ وان ب چەند کەسانن، دبن یەک.

ئەڤ ژی ب مە ددە زانین کو ب ڤێ قووشێ ئەم دێ نەگھێژن مووشێ. لۆما فۆرماتەک نوو ژ سیاسەتا باکورێ کوردستانێ رە لازمە. ئەو فۆرمات ژی دڤێت عادەت و تۆرەیێن سالێن 1970یێ بێنە ئاڤێتن. فۆرمات ئانگۆ نووژەنیەکا ب مەژیەکی نوو و ل گۆر ڤێ دەما نووژەن ل کوردستانێ بهێت گونجاوکرن، لازمە.

سەدەما فۆرماتان ژی ئەوە کو تو کۆمپیۆتەرێ ژ بەرنامە و پرۆگرامێن کەڤن ئازاد دکەی و یێن نوو لێ سوار دکەی کو ئەو بێ کێماسی کار بکە.

سیاسەتا باکورێ کوردستانێ ژی وەھایە. ب سالمەزن و ب سیاتمەدارێن کو ھێژ ب مەژیێ سالێن 1970 و ئایدۆلۆژیک دفکرن سیاسەتەکا نووژەن یا باکورێ کوردستانێ نامەشە. ژ بۆنا بمەشە گاڤێن باش ھاتن ئاڤێتن. لێ مخابن ئەو گاڤێن ھێژا ژ کەسێن کو ھێژ ل گۆر رێخستنیا سالێن حەفتێیان تەڤدگەرن تێ و ھاتیە خەتماند.

گەلەک ژ وان جامێران نە خەرابن. لێ نکارن ل گۆر دەمێ بفکرن و خوە بگوھەرن. نکارن جوانێن ژ خوە زاناتر گوھداری بکن و تەحەمولا وان بکن. نکارن ژنان د ناڤا پارتیا خوە دە چالاک بکن. ژ بەر کو ئەو مەژیێ وان ھێژ فەئۆدالییە.

ئەڤە دبنە سەدەم کو تەڤگەرا باکورێ کوردستانێ ژی ھاتیە خەتماند و گاڤەکێ ب پێشدە ناهاڤێژن. بەرەڤاژی وێ رۆژ ب رۆژ وەندا ژی دکن، لێ ھەر ئەو، وێ وەندابوونا خوە وەکە سەرکەتنێ ب ناڤ دکن و ل گۆر وێ ژی تەڤدگەرن.

ئەو سیاسەتمەدارێن ژ سالێن 1965-1980یێ تێن نە کو خەرابن. نە کو ناخوازن وەلاتێ خوە ئازاد بکن. نە کو نە دلسۆزێ وەلاتێ خوە نە. لێ مەژی و ئاقلێن وان نەھاتیە گوھەراندن. ھێژ ژی پرانیا سەرۆک و رێبەرێن پارتیێن کوردستانی ژ وان جامێرانا نە کو ب وی ئاقل، فکر و رامانێن کەڤنارە نکارن ژ بۆنا نووژەنیێن باش ئەرکا خوە پێک بینن.

پرانیا وان بەدەلێن مەزن دانە. بەرخوەدانێن ھێژا کرنە، کەتنە زیندانێن داگیرکەران. لێ مخابن ئەو ئیرۆ ل رەوشا نھا یا جیھان و کوردستانێ ناگونجن. نە ئەو خوە دگوھەرن، نە  ژی ئەم دکارن وان بگوھەرن.

لۆما تەنھا رێ ئەوە کو جوانێن ھێژا رێڤەبری و سەرۆکاتیێ ژ دەستێ ڤان کەسانا دەرخن دا کو ئەو بکاربن ببن مۆتۆر. لێ قیمەت و روومەتا مەزن یێن خوە بگرن. ژ تەجرووبە و تەکۆشینا وان دەرسان دەرخن دا کو بکاربن ئاستەنگێن پێشیا تەڤگەرا باکورێ کوردستانێ ژ ھۆلێ راکن.

نھا تەجروبەیێن گەلەک ھێژا و مەزن مە ب ھەڤرە دیتن. مە دیت کو کارێ ژ بۆنا یەکرێزی و ب ھەڤرە کارکرن ب سالان تێ کرن. لێ ئەو کار و خەباتان، ل دەرەکێ ئاسێ دبە، دسەکنە و گاڤەک نەما ب پێش دکەڤە. سەدەم سالمەزنێن رێڤەبەرن کو ھندەک کورسی و مەقام یان بەرپرسی ب دەست خستنە.

د دەما جوانیێ دە مرۆڤ تەنھا ژ بۆنا ئازادیا گەلێ خوە کار و خەباتێ دکە. مرۆڤ کورسی و مەقامان نافکرە. کارێ ئەول ئازادیا کوردستانێیە کو ب مە رە دخولقە. لێ دەما مرۆڤ د ناڤ سالان دە دچیت رەوش و رۆل تێ گوھەراندن. ئێدی مرۆڤ دخوازە ببە رێبەرەک.

دەما کو رێبەری یان سەرۆکاتی ب دەست مرۆڤ ژی دکەڤە، مرۆڤ وەکە بەنیشت ب وێ ڤە دزەلقە. نە دکارە گوھەراندنان بکە نە ژی دھێلە حەرکاندن ببە. یێن بخوازن بکن ژی ئەم ب خوە یان ئەشکەرە یان ژی ب دزی ل دژ وی/ێ رادوەستن.

ھەگەر نە وەھا بە. ئیرۆ ژ ھەر دەمێ بێتر پێویستیا باکورێ کوردستانێ ژ یەکتی و یەکرێزیا ناڤا مالا خوە ھەیە. چ ھەولدان تێ کرن ژی د هەوێن داوی دە ھندەک پێھنا خوە لێ ددە کو ئەو خەراب دبە.

واتە سیاسەت ل باکورێ کوردستانێ بوویە وەکە کەپرا زارۆکان. د دەما زارۆکتیێ دە، مە ژ بۆ خوە کەپر چێ دکر. ژ بۆ دوماهیئانینا کەپرا مە پیچەک دما، ژ بەر کو نە دکەت سەرێ مە، مە ئەو خەراب دکر و دەست ب یەکا نوو دکر.

نایێ بیرا من کو مە چ کەپرێن خوە ب سەرفرازی ب داوی ئانیبن. نھا رەوشا سیاسەتا باکورێ کوردستانێ ژی وەھا بوویە. ژ بۆنا یەکتی و یەکرێزیێ ب سالان کار و خەبات دبە کو مرۆڤ ل بەندێیە ئەو ژ بۆ رایا گتشتی بهێت دیارکرن، ھندەک پێھینەکێ لێ ددە و خەراب دکن. پشتی وێ ژی ژ نوو دە دەست ب کارێ یەکیتی و یەکرێزیێ تێ کرن کو ئێدی باوری ژی نامینە.

یا باش ئەم دەست ژ ڤێ سیاسەتا کو ئەم نکارین ببین خوەدی یەکیتی و یەکرێزیەکا باش، بکشینن. ھەرکەس یان ھەر پارتی بلا بەرێ د ناڤا خوە دە ژ بۆنا ڤێ کار بکە. ئەندامێن خوە فێری چاندا یەکرێزی و یەکتیا نەتەوەیی بکن.

جوان دڤێت ھەول بدن سەرۆک و رێڤەبرێن سالمەزن، ژ رێڤەبرتیا پارتیان دوور بخن. ئەو ب خوە دەستپێشخەریێ بکن کو ئەڤ ئێشا سەرێ سەد سالانە کو نەھاتیە چارەسەرکرن، حەلەکێ ژێ رە بیبینن دا کو بێ چارەسەرکرن. ب کادرۆیێن سالمەزن کو ھەر یەک ژ وان ب چەند نەخوەشیانن، ئێش و دەردێ مە یا یەکتیان نایێن چارەسەرکرن…

چارەسەری مەژیەکێ زەلال، باوەریەکا خورت و نەتەوەیی ئەم دکارین ببین خوەدی یەکرێزی و یەکتیەکا نەتەوەیی دا کو دۆست و دژمن ژی ئێدی حەسابێن مە بکن.