دەستھلاتا دەرەوان: 4ێ نیسانێ و ئۆجالان
راستی و درەو دو ژ تێگەھێن ھەری ب ناکۆکێن ژیانێ نە. ئەڤ ھەر دو تێگەھ د تەڤاھیا پێڤاژۆیا جڤاکیبوونا مرۆڤان دە ب بەردەوامی پەڤدچن. گەلەک یا بالکێشە کو ھەر چەند راستی ھەر تم ھەبە ژی، لێ دەرەو پر جاران پتر گەش و ئەشکەرە نە. ھەر وھا گەلەک بکڕێن وێ ژی ھەنە. گەلۆ ئەڤە ژ کاراکتەرێ ئۆنتۆلۆژیکێ دەرەوێ دهێت یان ژی ژ کاراکتەرێ ئۆنتۆلۆژیکێ جڤاکێیە، ئەڤ یەک مژارەک نیقاشێیە. لێ دیرۆک دەستنیشان دکە کو دەرەوەک باش ھاتبە ئاڤاکرن دکارە خوە وەکی راستیێ نیشان بدە. دیرۆکا مرۆڤاھیێ تژی دەرەوێن وەهانە کو وەکی راستیێ ھاتنە پێناسەکرن، باندۆرەکا فکری چێکرییە و مخابنی ڤە کو جەماوەر ژی پەی خوە کشاندییە. د ناڤ ڤێ دیرۆکا ڤرەک دە، عەڤدللا ئۆجالان ژی بەشا کوردان کەتییە.
کەسایەتیا عەڤدللا ئۆجالان یا سیاسی و پێڤاژۆیێن پێشکەتنا وی پر جاران تێنە شرۆڤەکرن. لێبەلێ، دەرۆنییا وی کێم جاران تێ لێکۆلینکرن. د بنگەھ دە، راستی ئەڤە کو ھەکە ھوون کەسایەتیا ئۆجالان و چیرۆکا ژیانا وی یا 77 سالان تەبەقە ب تەبەقە مینا ئارکۆلۆگەکی لێکۆلین بکن، ھوونێ تەبەقە ل سەر تەبەقەیێن دەرەوان ھاتیە ئاڤاکرن ب زەلالی ببینن. و راستی ئەڤەیە کو ئۆجالان د ڤەگوھەراندنا ڤان دەرەوان بۆ چیرۆکێن جوان، دۆماندنا وان و رێخستنکرنا وان دە پر سەرکەتییە. ب راستی، کەس چیرۆکا ژیانا راستەقینە یا ئۆجالان نزانە. ژ بەر کو راستی تونەیە؛ ژیانەکە ئۆجالان ھەیە کو ل گۆری شەرت و مەرجان ھاتیە ڤەھاندن. میناک، ئیرۆ رۆژبوونا وی تێ پیرۆزکرن. ب راستی، کەس رۆژبوونا ئۆجالان نزانە. ئەو نزانە، دایکا وی نزانە. د سالا 1996 دە، دەما کو کۆمەک ژنێن جوانێن ل مالا ئۆجالان دمینن لێ دپرسن، “رۆژبوونا تە کەنگییە؟”، ئۆجالان بەرسڤ دا، “د ناسنامەیا من دە 10ی نیسانێ ھاتیە نڤیساندن، لێ ئەز تام نزانم.” لێ وان ژنان گۆت “سەرۆکێ من ھەیڤا نیسانێ ھەیڤەکا ڤەژینێیە ئەم رۆژبونا تە وەکە 4ێ نیسان پیرۆز بکن” و د 4ێ نیسانێ دە ژ بۆ پیرۆزکرنێ کێک کرین. ژ بەر ڤێ یەکێ، پیرۆزکرنا رۆژبوونا ئۆجالان، کو پەکەکە ڤان رۆژان ڤەگوھەراندیە مەراسیمەکا پیرۆز، دیرۆکەکە کو ژ ھێلا کۆمەک کەچێن بچووک ڤە ھاتیە ئیجادکرن دا کو دلێ ئۆجالان خوەش بکە. ئۆجالان، دزانی کو ئەڤ دیرۆکە دەرەوە، د سالا 2002 دە تالیمات دا و گۆت “رۆژبوونا من پیرۆز بکن”. ھوون “رێبەرەکی” خەیال بکن… وی ھەتا رۆژبوونا خوە ژی ل سەر دەرەوان ئاڤا کربە.
دەماکو رۆژبوونا وی دەرەو بە، وەکی کو تەڤاھیا ژیانا وی ل سەر دەرەوان ھاتبە ئاڤاکرن بە. لاوازیا ھەری مەزنا ئۆجالان ئەوە یا کو ل سەر وان خالان رەخنەیان ل دەوروبەرێ خوە دکە. بنێرە، ئەو ھەر تم ل سەر ژنان دئاخڤە؛ ئەو ھەموو مێران وەکە ھەمبەری ژنێ لاواز رەخنە دکە. لێ ئەو ب خوە دەما کو دۆر تێ سەر ژنان لاوازیا د ھەری مەزن دە دژی. وی فاتما یلدرم (کەسیرە) حەسکرییا ھەڤالێ وی یێ ھەری نێزیک عەلی حەیدەر قەیتان، نەچار کر دا کو لگەل وی ژیانا هەڤژینیێ پێک بینە. پاشێ ژی، وی خییانەت ل کەسیرەیێ کر. ئەو کەسەکە کو دەستدرێژی ل سەر دەھان گەریلایێن ژن کریە. ئەڤ نە چیرۆکەک یان ژی رەشکرنەکە؛ ئەڤ راستییە.
ئەو ھەر تم ل سەر ھەڤالتیێ دئاخڤە، لێ د دیرۆکا شۆرەشێن جیھانێ دە، د چ شۆرەشان دە کەسی ب قاسی ئۆجالان ھەڤالێن خوە نەکوشتنە.
وی ھەر کەس ب خایین و ئاژانتیێ تاوانبارد کر. لێ ژ بلی وی، چ رێبەرێن دن یێن کوردان گاڤا ھاتین گرتن نە گۆت “ئەز دخوازم خزمەتا دەولەتا خوە بکم.”
ئۆجالان نە تەنێ “رێبەرەکە کو ل سەر دەرەوان ھاتیە ئاڤاکرن”، لێ د ھەمان دەمێ دە کەسەکە کو خوە ژ گەل، دیرۆک، کوردستانێ و ژ دۆزێ مەزنتر دبینە. ئۆجالان کەسەکی خوەفرۆش و پۆزبلندە.
ژ بۆ وی، گەل نە ئارمانجەک ب سەرێ خوەیە، ئاموورەکە ژ بۆ پێبەرزبوونا سەرۆکاتیا وی. ب ھەمان ئاوایی، کەسێن کو شەھید دکەڤن ژی ھێزەکن کو “پیرۆزیا” وی زێدە دکن. ژ بۆ مەگخوەفرۆش و پۆزبلندەکی، گەل نە جڤاتەکە کو ھەوجەیی ئازاد کرنێیە؛ گەل قەرەبالغیەکە کو سەرۆکاتیا خوە پێ رەوا دکە. ژ بۆ ئۆجالان، پرسگرێکا کورد تشتەک بوو کو جەماوەری ل دۆرا خوە کۆم بکە. ھەکە، ئۆجالان قەت کەسەکی وە نەبوو کو خەما وی کوردستان بە.
تشتێ ھەری گرینگ کو مرۆڤ ل سەر ژیانا عەڤدللا ئۆجالان ببێژە: ئۆجالان سلسلەیا دەرەوانە. بوویەرێن وی درەون، کەسایەتیا وی درەوە، داخویانیێن وی درەون. پرسگرێکا ئۆجالان نە ئەوە کو وی خەلەت فێم کریە یان ژی خەلەت فکرییە. پرسگرێکا ئۆجالان ئەوە کو وی دەرەوێن خوە وەکی راستی برێخستن کرینە.
ژ بەر ڤێ یەکێ 4ێ نیسانێ نە تەنێ مژارەک رۆژبوونێیە. 4ێ نیسانێ دانانا دەرەوانە ل شونا حەقیقەتێ. ئەو دیرۆکەک ب دەرەوان چێکرییە، چیرۆکەک رێخستنکرییە، و خاپاندنا گەلە. د ئەنجامێ دە، 4ێ نیسانێ نە تەنێ دیرۆکەک درەوینە؛ ئەو سازوومانکرنا درەوانە. ژ بەر کو ل ڤر، نە تەنێ درەوا کەسەکییە، لێ پیرۆزکرنا وێ دەرەوێ و پێشکێشکرنا وێ ژ گەل رە وەکی راستیەکێ. سەرکەفتنا ھەری مەزنا ئۆجالان نە ئازادکرنا گەلەکییە، بەلکو ڤەگوھەراندنا درەوا خوە وەکە چارەنووسا گەلەکییە.
