خهتا ئۆجالان و گرێدانا تەڤگەرا وی ب ئهجێندایێن دەولەتا ترکیەیێ
د. جوان عەفرینی
نرخاندنەکا د. سەربەست نەبی دهربارێ خهتا عهبدوللا ئۆجالان و گرێدانا تەڤگەرا وی ب ئهجێندایێن دەولەتا ترکیەیێ
ئاخفتنا د. سەربەست نەبی دەربارێ کەسایەتیا عهبدوللا ئۆجالان و رێیا تەڤگەرا گرێدایی وی، وەک یەک ژ وێرەکترین نێرینێن د ناڤا نیقاشێن کوردی یێن ھەڤچەرخ دا تێ حهساب كرن. ئەڤ ئاکادەمیسیەنێ کو ب زمانێ خوەیێ زانستی و ئانالیزێن خوە یێن رەخنەیی تێ ناسکرن، دیتنەکا زەلال پێشکێش دکەت. ئەو دبێژیت کو ئۆجالان، ب تایبەتی پشتی گرتنا وی د سالا 1999ێ دا، بوویە بەشەک ژ حەسابێن دەولەتا ترکیەیێ و گەلەک ھەلوەستێن وی یێن پاشی ل شوونا کو خزمەتا پرۆژەیا نەتەوەیی یا کورد بکهن، زێدهتر ل گۆری داخوازیێن ئەنقەرەیێ بوون.
گوھەرتنا گۆتارێ پشتی گرتنێ
د. نەبی د وێ باوەریێ دا یە کو گوھەرتنا مەزن د گۆتارا ئۆجالان دا د ناڤا گرتیگەھێ دا، نە تەنێ لێڤەگەرینەکا فکری بوو، بەلکو دەربازبوونەکا بۆ پێگەھەکێ سیاسی یێ نوو بوو. ڤێ یەکێ تەڤگەرا کو ب ناڤێ وی تێ ناسکرن نێزیکی مەرجێن دەولەتا ترکیەیێ کر. تێگەھێن وەک “نەتەوەیا دەمۆکراتیک”، “رێیا سێیەم” و “براتییا گەلان”، ھەر چەند وەک رامانێن پێشڤەروو بهێنه پێشکێشکرن ژی، ل گۆری ڤێ ئانالیزێ ئهو بوونە سەدەما لاوازکرنا رویێ نەتەوەی ییێ کورد و رێ ل بەر دەستوەردانێن ھەرێمی و ناڤدەولەتی ڤەکرن کو پاشی ل دژی بەرژەوەندیێن گەلێ کورد ھاتن بکارئانین.
باندۆرا ڤێ خهتێ ل سەر رۆژئاڤا
د. سەربەست نەبی ئەزموونا ل رۆژئاڤایێ کوردستانێ وەک میناکەکا زەلالا ئەنجامێن ڤێ گوھەرتنێ دبینیت. ل گۆری نێرینا وی، سیاسەتا پارتیا یەکیتیا دەمۆکراتیك (پهیهدێ) کو ل سەر فەلسەفەیا ئۆجالان ئاڤا بوویە، بوو سەدەما ئافراندنا ژینگەھەکێ کو رێ دا ترکیەیێ دەستوەردانا سەربازییا راستەراست بکەت. ڤێ یەکێ زیانێن مەزنێن مرۆڤی و جۆگرافی گهھاندن کوردان. نەبی دبێژیت کو نەبوونا سەرخوەبوونا سیاسی و گرێدانا ب گۆتارەکێ کو ھەڤسەنگیا ھێزێ ل بەر چاڤان ناگریت، یەک ژ سەدەمێن سەرەکی یێن کارەساتێ بوو.
ھەمان خهتری ل سەر رۆژھلات ھەیە
ئانالیزا د. نەبی دگههیته رۆژھلاتێ کوردستانێ ژی. ئەو دبینیت کو پارتیا پژاک ل سەر ھەمان رێیا پهیهدهیا ل سووریەیێ دمەشیت. بەردەوامبوونا ڤێ رێیێ دبیت کو رێ ل بەر سیناریۆیەکا وەک یا ل رۆژئاڤا قەومی ڤەکەت. دەستوەردانا د کاروبارێن رۆژھلات دا، یان پەژراندنا سیاسەتێن کو ل گەل راستیا ھەرێمێ ناگونجن، نهدووره کو ببنه بههانه د دەستێ ھێزێن ھەرێمی دا و ل پێشییا وان د دهست ترکیەیێ دا، ژ بۆ پێکئانینا ئۆپەراسیۆنێن نوو یێن سەربازی و ئەولەھیێ.
بانگهوازی ژ بۆ لێڤەگەرینەکا بنگەھین
ب رێیا ڤێ نێرینێ، د. سەربەست نەبی بانگ ل تەڤگەرا گرێدایی ئۆجالان دکەت کو ب وێرەکی و زەلالی د رێیا خوە یا سیاسی دە دەرباز ببیت. وەکی کو ئەو تەکەز دکەت؛ دۆزا کوردی پێدڤی ب دیتنەکا سەربخوە و پرۆژەیەکێ نەتەوەیی یێ زەلال ھەیە، دووری گرێدانا ب ئاژاندەیێن دەولەتان یان پرۆژەیێن کو خزمەتا بەرژەوەندییا گەلێ کورد ناکهن.
