بووبێ ئەسەر

ئەز وەکە نڤیسکار و رەوشەنبیرەکێ کورد گازی و ھاوارا خوە دگهینم وە کو پشتی بوویەر و کریار و فرۆتنا کەرکوکێ ژ نوو دە، پێشی ل بافل و ھەمی جەلالیان نەیێ گرتنێ، ئیرۆ کەرکوکە، سبە دھۆک و ھەولێرە و دوورە ژی سلێمانیە و ھەمی کوردستانە کو دێ رادەستێ داگیرکەرێن مە بکە. بافل ب ھش و ئاقلێ خوە نە یەکی تەمامە. ژ خوە چ تێ سەرێ کوردان، ژ بەر سەرۆک و رێبەرێن ئاقلێ وان نە تەمام و جەلەوا وان د دەستێ داگیرکەران دە نە.

بافل نە مرۆڤەکی ب ھش و ب ئاقلە. لۆما پر رەحەت دکارە بێ کرین و فرۆتن. دەردێ وی نە کوردستانە. ئارمانج و ھەدەفا وی تەنھا تێکبرنا بارزانیانە. ژ وێ پێڤە چ ئارمانجەکا وی یا دن تونەیە.

ب ڤان بوویەر و کریارێن خوە نە تەنێ ئەو ل ھەمبەر بارزانیان تەڤدگرە، ئەو گاڤ ب گاڤ کوردستانێ رادەستی داگیرکەرێن مە دکە.

ئەو کوردستانا کو ب خوینا جانگۆریێن کوردستانیان، ب رێ و رێبازێن نەتەوەیی، ب بەرخوەدان و رێ نیشاندانا بارزانیان، ب فەدەکاریا پێشمەرگەیێن قەھرەمان کو ھاتیە ئازادکرنێ، دێ بافل تەڤی ژ بۆنا تۆلھلدانا باب و باپیرێن خوە ئیبراھیم ئەحمەد، بفرۆشە. ئارمانج ژ ڤێ ژی تەنھا بارزانینە کو نە ب دلێ جەلالیانە کو بارزانی ھەبن…

ئەز گازی و ھاوارا خوە دگهینم کەس و کەسایەتیێن کوردپەروەر یێن د ناڤا یەنەکێ دە. ھەگەر ھوون وەھا بێدەنگ بمینن، نە تەنێ بارزانی دێ ھەمی کورد وەندا بکن. ئەڤ ئازادی و رەحەتیا کەتیە دەستێن کوردستانیان دێ ژ دەست ھەرە.

ئیرۆ سینۆرێن نوو تێنە دانین. ئیرۆ وەلاتێن نوو تێنە دامەزراندن. ئیرۆ داگیرکەرێن کو ئەڤ سەرێ سەد سالانە کو خوینا کوردان دمێژن، تێنە ھلوەشاندنێ، جھێ کێفخوەشا کوردانە. لێ مخابن ئەم ھەمی کورد و ب تایبەتی ئەندام و سەرکردەیێن یەنەکێ ھەگەر ل ھەمبەر تاوانێن بافلێ خوە رادەستی داگیرکەرێن مە کرییە، بێ دەنگێ و بێ ھەلوەست بمینن کوردستان ژ دەست مە تەڤان دھەرە. یێن وێ وەندا بکن دێ ھەمی کوردێن جھانێ بن.

کوردنۆ و ب تایبەتێ کوردێن مەیێن سلێمانیێ، ھەگەر ھوون ناخوازن وەکە بەری ئازادیا وەلاتێ خوە بژین، دڤێت ھوون ژی ب پرۆتەستۆیێن خوە ڤان کریار و بوویەرێن کو بافل دخوازە کوردستانێ رادەستێ داگیرکەران بکە، بێدەنگ نەمینن.

دەردێ بافلێ ئەوە کو بارزانیان تونە بکە، لێ دێ نکاربە ڤێ بکە. د وارێ فرۆتنا کوردستانێ دە ھەگەر وەلاتپارێزێن ناڤا یەنەکێ و ھەمی گەلێ مەیێن ل سلێمانیێ وەھا بێدەنگ بن، دکارن بێ وەلات بمینن.

بێ وەلاتی، ژیانەکە کۆلەتی و رەزیلییە. لۆما ژی بەری ھەرکەسێ دڤێت ھوون روونشتڤانێن ل باژارێ قەدیم یێ سلێمانیێ و کادرێن ناڤا یەنەکێ یێن وەلاتپارێز، ئێدی رابن سەر لنگان و ل ھەمبەر فرۆتنا کوردستانێ کو ل سەر دەستێ بافل پێک تێ، بێدەنگ نەمینن.

ئەز گازی و ھاوار خوە دگهینم رێزدار سەرۆک مەسعوود بارزانی کو دڤێت جەنابی وی ل ھەمبەر ڤان تاوان، کریار و بوویەرێن بافل بێ دەنگ نەمینە. چ د قادا ناڤنەتەوەیی دە و چ ژی د قادا کوردستانێ دە ژ بۆنا ڤان تاوانێن بافل یێن فرۆتنا کوردستانێ بێ راوەستاندن، بێ ھەلوەست نەمینە.

گازی و ھاوارا خوە دگهینم سەرۆکێ ھەرێما کوردستان رێزدار نێچیرڤان بارزانی کو دڤێت ئەو ب جڤین، کۆنفەرانس و ب سایا ھەولدان و دیپلۆماسیا خوە ل ھەمبەر ڤان تاوانێن بافل چ د قادا ناڤنەتەوەیی دە و چ ژی د قادا کوردستانێ دە، بێ دەنگ و ھەلوەست نەمینە.

ھاوار و گازیا من ژ بۆنا سەرۆکوەزیرێ کوردستانێ رێزدار مەسروور بارزانی ئەوە کو جەنابی وێ ژی ل گەل ھێزێن پێشمێرگە، ل گەل رێ و رێبازێن ل ھەڤکرنەکە مسۆگەر، موداخەلەیی ڤان تاوانێن بافل بکە و بێ دەنگ نەمینە.

بێ دەنگیا جەنابێن وە و ملەتێ کورد. ب تایبەتییا خەلکێ سلێمانیێ دێ ببە ئەنجاما کو پشتی فرۆتنا کەرکوکێ دێ ھێدی ھێدی یا دھۆک، ھەولێر و سلێمانیێ ژی بە. دەردێ بافل و یێن پێ باوەر نە کوردستانە. دەردێ وان ب جەوالان پارە برنە کو ئەو ژی داگیرکەر ب رەحەتی دکارن وان جەوالان بدن بافل.

کوردنۆ، بزانبن کو بافل نھا لیستکەک پر خەتەر دلیزە. بێدەنگیا رێڤەبرێن باشوورێ کوردستانێ و خەلکێ کورد دێ ببە تونەبوونا کوردستانا ئازاد. رابن و ژ ڤان کریار و بوویەرێن بافل رە بێژن بەسە ئێدی…