د دەمێن وەرچەرخانێن مەزن دا، هێزا دەولەتان ب تنێ ب هەژمارا مۆشەکێن وان ناهێتە پیڤان، بەلکو ب شێوازێ ئەو جیهانێ دبینن و ب زمانێ ترس و پەشیوی و پاشەرۆژێ پێ لێکددەن.
به‌لگه‌نامه‌یا ئەمریکی یا تایبەت ب ستراتیژییەتا بەرهنگاربوونا تیرۆرێ بۆ سالا 2026ێ هات، نە وەک راپۆرتەکا ئەمنی یا ئاسایی بەلکو وەک تێکستەکێ سیاسی و فەلسەفی کو دیار دکەت کا ویلایەتێن یەکگرتی چەوا دێ سەرەدەریێ دگەل سەدەیێ نوو کەت و چەوا دێ پێناسەیا دژمنى كه‌ت، گەف، حەتا رامانا جەنگی ب خۆ ژی دوبارە دکەتەڤە.
ئەڤ به‌لگه‌نامه، یا کو پشتی سالێن درێژ یێن مەزاختنا هێزێ ل عێراق و ئەفغانستانێ دەرکەفتی و پشتی گوهۆرینێن مەزن د تەرازییا هێزا جیهانی دا، ب ئاشکرا رادگەهینیت کو جیهان کەفتییە قۆناغەکا تەمام جودا ژ وێ قۆناغا پشتی روودانێن 11ی ئەیلوولێ.
ل رابردووی، ئەمریکا تیرۆر وەک رێکخراوێن چەکدار یێن کلاسیک ددیت کو د شکەفت و بیابانان دا لێ ددان و دشیان ب رێکا سوپا و داگیرکرن و جەنگێن ئێکسەر بهێنە ژناڤبرن. بەلێ ئەڤرۆ، ستراتیژییەتا نوو یا ئەمریکی دبێژیت کو مەترسی ئێدی نە رێکخراوەکا جودایە و نە ژی کەسەکێ ڤەشارتییە، بەلکو بوویە تۆرەکا ئالۆز و پێکڤەگرێدایی کو د ناڤبەرا ڤان بواران دا دهێت و دچیت:
ل ڤێرێ ئەم تێدگەهین کا بۆچی ناڤێ ئێرانێ د ناڤ به‌لگه‌نامه‌یێ دا ب شێوازەکێ جودا ژ یێ جاران دیار بوویە. واشنتۆن ئێدی به‌رێخوناده‌ته ئیرانێ ب تنێ وەک هەڤرکەکێ ئەتۆمی، بەلکو وەک پشکەک ژ تۆرەکا هەژموونا هەرێمی یا گرێدایی ب ملیشیاتان ڤه (جەنگێن نە نەریتی، وزە و جوگرافیایا سیاسی).
هەروەسا به‌لگه‌نامه ب شێوەیەکێ ئێکسەر گرێدانێ دکەتە د ناڤبەرا: عێراق، سووریا، لوبنان، فەزایا ئەلیکترۆنی و دەریایێن نێڤدەولەتی. وەکی کو هەمی رۆژهەلاتا ناڤین بووبیتە ئێک گۆرەپانا ئەمنی یا پێکڤەگرێدایی، ئەگەر پارچەک بهه‌ژێت، یێن دیژى دێ هەژیێن.
بەلێ گرنگییا ڤێ به‌لگه‌نامه‌یێ نە ب تنێ د وێ چەندێ دایە یا کو د بوارێ ئەمنی دا دبێژیت، بەلکو د وێ چەندێ دایە یا کو ژ روویێ دەروونی و فەلسەفی ڤە ل دۆر مێشکێ ئەمریکی ب خۆ ئاشکرا دکەت.
ئەمریکا، پشتی دوو دەهکێن جەنگی، راستییەکا ب ئێش دبینیت: وێ شیا رژێمان برووخینیت، بەلێ نەشیا ئارامییێ بەرهەم بینیت. د گەلەک جەنگان دا ب سەرکەفت، بەلێ ب سەر پەشیویێ (فەوزایێ) دا سەرنەکەفت.
ژ به‌ر ڤێ چه‌ندی باوەریا (عەقیدەیا) نوو ل نك ئەمریکییان ژدایک بوو. ستراتیژییەتا 2026ێ گوهۆرینا واشنتۆن نیشان ددەت ژ چەمکێ جەنگ دژی تیرۆرێ بۆ چەمکەکێ کویرتر و ئالۆزتر: برێڤەبرنا پەشیوییا جیهانی و رێگریکردن ل هەلوەشاینا سیستەمێ نێڤدەولەتی یێ کو ئەمریکا سەرکێشییا وی دکەت.
ل ڤێرێ رەهەندێ فەلسەفی یێ راستەقینە یێ به‌لگه‌نامه‌یێ دەستپێدکەت. ویلایەتێن یەکگرتی ئێدی ل دویڤ سەرکەفتنەکا دوماهییێ ناگەریێت، بەلکو ل ڤان خالان دگەریێت:
1/ گرتنەخۆ (الاحتواء)
2/ ترساندنا ژیرانە
3/ کۆنترۆلکرنا هاوسەنگییان
4/ رێگریکردن ل هەڤرکان ژ گوهۆرینا شێوێ سیستەمێ جیهانی.
واتە ئارمانج ئێدی ژناڤبرنا تەمام یا مەترسیێ نینە، بەلکو هێلانا مەترسیێ یە ل بن کۆنترۆلێ خودا، بێی کو بهێلیت ببیتە تەقینەکا گشتی.
