ھاتیمۆگلاری: ژ بۆ پێشکەتنا پێڤاژۆیێ مەکانیزمایەکە یاسایی پێدڤییە
ھەڤسەرۆکا گشتی یا دەم پارتیێ، تولای ھاتیمۆگلاری، د جڤینا کۆما پارتیا خوەیا ل پارلامەنتۆیا ترکیەیێ دە بال کشاند سەر راوەستینا پێڤاژۆیا چارەسەریێ و بانگ ل دەستھلاتداریێ کر کو دەملدەست مەکانیزمایەکە پرئالی و یاسایی وەرە ئاڤاکرن.
ھاتیمۆگلاریێ سەردانا ھەفتەیا بۆری یا داییکێن ئاشتیێ یا ژ بۆ پارلامەنتۆیێ ب بیر خست و دیار کر کو چالاکیا “دەرسۆکێن سپی” بانگەکە دیرۆکی یا ژ بۆ سولحێیە. ھەڤسەرۆکا دەم پارتیێ دەستنیشان کر کو دڤێت ئەڤ پەیاما داییکان ل پارلامەنتۆیێ ببە بەرسڤ و داخواز کر کو “یاسایا ئاشتیێ” بکەڤە رۆژەڤا مەجلیسێ.
تولای ھاتیمۆگلاری راگھاند کو پێڤاژۆ ئەڤ دەمەکە ئاسێ مایە و ژ بۆ دەرکەتنا ژ ڤێ رەوشێ پێشنیارا ئاڤاکرنا سازیەکە پرئالی کر. ھاتیمۆگلاری گۆت: “پێویستی ب مەکانیزمایەکە وسا ھەیە کو د ناڤبەرا سازیێن سیاسی، ئالیێن پەیوەندیدار و جڤاکا سڤیل دە ببە پرا پەیوەندیێ. دڤێت ئەڤ مەکانیزما ب لەز وەرە ئاڤاکرن دا کو ئاستەنگیێن ل پێشیا چارەسەریێ راکە.”
ھەڤسەرۆکا دەم پارتیێ راستەراست بانگ ل سەرۆکێ پارلامەنتۆیێ نومان کورتولموش کر و داخواز کر کو بەرنامەیێن خوەیێن دن بدن ئالیەکی و گرانی بدن سەر راپۆرا کۆمیسیۆنێ. ھاتیمۆگلاریێ تەکەز کر کو د راپۆرێ دە ئامادەکرنا چارچۆڤەیەکە یاسایی ژ بۆ رەوشا پشتی چەکدانینێ ھاتیە دەستنیشانکرن و خوەست کو د ناڤا ڤێ ھەفتەیێ دە “نەخشەرێیا ئاشتیێ” وەرە ئەشکەرەکرن.
ھاتیمۆگلاریێ ب ھەلکەفتا 15ێ گولانێ جەژنا زمانێ کوردی، داخواز کر کو زمانێ کوردی ببە خوەدی گارانتیەکە دەستووری و د ھەر قادا ژیانێ دە (دبستان، نەخوەشخانە، شارەداری) ب فەرمی وەرە بکارئانین. د داویا ئاخافتنا خوە دە، وێ داخوازا ئازادکرنا ھەڤسەرۆکێ شارەداریا جۆلەمێرگێ مەھمەت سدیق ئاکش و ھەموو گرتیێن سیاسی کر، دا کو باوەریا جڤاکێیا ب ئاشتیێ خورت ببە.
