تم ئەز و ئەز ئەو ل بەر پەز نابە!!!
بووبێ ئەسەر
دڤێت ئێدی ئەم ل باکورێ کوردستانێ میکانیزما رەخنەکرن و ل خوە رەخنەکرنێ مسۆگەر بکن. ئانگۆ ب جھ بکن دا کو تەڤگەر ل باکورێ کوردستانێ ب جەماوەری و ب ئاوایەکی خورت بهێت مەشاندن.
دڤێت ھەرکەس ل گۆر زانین و کارینا خوە تەڤبگەرن. دڤێت ھەرکەس جھ و مەقامێ خوە و بەرپرسیاریێن خوە بزانبن و ناس بکن.
دڤێت سیاسەتمەدارەک بزانبە کو ئەو سیاسەتێ دکە دا کو وەلاتێ خوە ئازاد بکە. کار و ئەرکا وان سیاسەتە. دەما ھەمی ھێز و قاوەتا خوە بدە وێ، دێ وێ گاڤێ ب رەحەتی سیاسەتەک راست ل گۆر بەرژەوەندیا گەلێ خوە بدۆمینە. تو گرانیێ بدەیە چ دێ ئەو ب سەرکەڤە.
نڤیسکارەک دڤێت گرانیێ بدە کارێ نڤیساندنێ دا کو بکاربە ب نڤیسێن خوە ب بەرھەمێن خوە پێشیا تەڤگەرا گەلێ خوە ڤەکە. زمانێ گەلێ خوە ب پێشڤە ببە. رێ و رێبازان نیشانی سیاسەتمەدارێن خوە بدە کو تەکۆشینا وان ھم راست بهێت مەشاندن ھم ژی ب ھێز و قاوەت ببن.
کارێ نڤیسکاران یێ سەرەکی ئەوە کو ئەو بکاربن باشی و قەنجیێن ھاتنە کرن بنڤیسینن. نڤیسکار دڤێت ب رۆمان و چیرۆکێن خوەیێن نڤیسکی دیرۆکا گەلێ خوە، تەکۆشین و بەرخوەدان ملەتێ خوە، دەنگێ ئازادی و بەرخوەدانێن وان بنڤیسینن دا پێشیا نفشێ ل دوو خوە ڤەکن.
نڤیسکار د رۆمان. چیرۆک و نۆڤەلێن خوە دە دیرۆکا گەلێ خوە ب خوەندەڤانان ددا ناسکرن. بوویەرێن پێک ھاتنە دنڤیسینە کو نەیێن ژبیر کرن کو نفشەکی دن ل سەر کۆکا خوە بێنە ناسین و ب زانینا دیرۆکا خوە مەزن ببن.
لۆما ژی ب رەحەتی دکارم بێژم کو د ناڤا جڤاتێن پاشدەمایی و یێن پێشکەتی دە نڤیسکار پیرۆزن. ھەبوونا وان پێشکەتنا ملەتێ وانە. لێ مخابن ئیرۆ ئەڤ ل باکورێ کوردسانێ تونەیە. زێدە قیمەت و روومەتا نڤیسکاران نایێ گرتن. نڤیسکارەکە ب سالان کەدێ ددە بەرھەمەکێ، ب زۆر و زەحمەت ددە وەشاندن. لێ ئەو بەرھەم ھەزار نسخە نایێن فرۆتن. ل گۆر من کەراسەتا مەزن ئەڤە.
پارتی و رێخستنێن مە ژی ل ھەمبەر نڤیسکارێن نەھەڤال یێن وانە، دۆرپێچەکا نەرم ب کار تینن. وەکە تێ خوەستن خوەدی ل نڤیسکارێن خوە دەرناکەڤن. لۆما ژ بۆنا وان شەرتێن کو تو ئەندام بی و کەسان، سەرۆک و رێبەران رەخنە نەکی دبە کو پیچەکێ قیمەتێ بدن تە.
ل گۆر من دڤێت پارتیێن مە فرەھ بفکرن، خوە ژ ئایدۆلۆژیا تەنگ ئازاد بکن. خوەدیتیێ ل ھەمی نڤیسکارێن کو نە ھەڤالێن وانە ژی بکن. سەمینەر و کۆنفەرانسێن ئەدەبی ل سەر ناڤێ وان ئامادە بکن دێ باشتر بە.
دڤێت رەخنەگر ژی ھەبن کو بکاربن کێماسیێن سیاسەتمەدار و نڤیسکاران ژ بۆنا پێشکەتنێ رەخنە بکە. لێ مخابن ئیرۆ ئەو رەخنەگرێن مە تونە نە. ئەڤ کار پتر مایە د ستویێ نڤیسکاران دە. واتە ئیرۆ ل باکورێ کوردستانێ یێن خوەدی دو ئەرک نڤیسکارن. ھم کارێ نڤیسێ دکن ھم ژی جارنا کێماسیێن پارتی و سیاسەتمەداران ئەشکەرە دکن.
لێ ئیرۆ ل باکورێ کوردستانێ کو ھەر کەس ل گۆر ئەرک و بەرپرسیاریا خوە تەڤ دگەرن تونەیە. سیاسەتمەدار وەکە ناڤێ وان ل سەرە کو کارێ وانێ ئەول ئەو ب خوەیە. ھەگەر سیاسەتمەدارەک چقاسی ل سەر ڤێ ئەرکا خوە تەڤبگەرە دێ پتر بەرھەمدار بە.
نڤیسکار یان رەوشەنبیرەک دبە کو نە ئەندامێ پارتیا تە بە، ژ خوە یا گرینگ ئەوە کو تو بکاربی کەسێن نە ئەندامێ تە نە، چالاک بکەی، کار و ئەرکەکێ ل گۆر بەرپرسیاریا وی/ێ بدەیێ. ب وان رە مژوول ببی دا کو ئەو ژی نێزیکاتیێ ل تە و پارتیا تە بکن.
ب ڤی ئاوایی ھم تو کەسەکی قەزەنج دکەی یان ب ئەرکدارکرنا وی/ێ تو وان نێزیکی خوە دکەی. ھم ژی ئەو دێ بزانبە کو پشتگر و پارتیێن کوردستانێ قیمەت و روومەتا وی/ێ ژی دگرن.
لێ وەھا خویایە کو ھێژ پارتیێن مەیێن سیاسی ل باکورێ کوردستانێ نەگشتنە وێ ئاستێ کو بکاربن، کەسایەتیێن نە ئەندامێ وانن، د کار و خەباتێ دە چالاک بکن. هەمان رەوش ژ بۆنا تەلەڤزیۆنێن پارتیان ژی وەھایە. تو دبینی کو تم کەسێن د پارتیا خوە دە بەرپرسن دەردخن. ھەر ئەون و ھەر ئەون. ئێدی مرۆڤ عاجز دبە کو ل وان و ل بەرنامەیێن وان بنێرە. تم دیتنا روویەکی عاجزیێ ددە.
لێ تێ ناگھێژن کو ب گوھداریکرنا دەنگێن جوودا، نەرین و رامانێن ژ ھەڤ جوودا پتر بەرھەمدارە کو ژ بۆنا پارتیێ ژی باشترە. ژ بەر کو ئەو دەنگێن جوودا، کێمانی، شاشی و خەباتێن ھێژا ب تە ددە ناسکرن و زانین.
ل گۆر من ئەڤ ژی کاراسەتەکە و کێمانیەک مەزنە کو پارتیێن مەیێن کوردستانی ڤێ ناکن. دڤێت بکن کو بەرێ خوە بەرفرەھ بکن. نڤیسکارێن نوو و سیاسەتمەدارێن جوودا ژی ب ڤێ رێیێ دکارن قەزەنج بکن.
لۆما تم ئەز و ئەز یێن دن ل بەر پەز، ئەڤ کار نامەشە. پارتی ب پێشناکەڤن. ژ دەرەکێ و پێڤە دخەتمە.
