ژ بۆنا یەکتیێ دڤێت ئەم چ بکین؟
بووبێ ئەسەر
ئەز گھشتم وێ باوەریێ کو دڤێت ئێدی ئەم پەکەکە/دەمێ رەخنە نەکین. ژ بەر کو ئەو ب خوە ژی دبێژن کو ئەو نە پارتیەکا کوردانە. خوە وەکە پارتیەکە گەلان رێ ددن. ژ خوە ھەلوەست، نەرین و رەوشا وان دیارە کو د خزمەتا کێ دە نە.
یا دن ب سالانە کو ئەم پەکەکێ رەخنە دکین، لێ مە چ ئەنجام ژێ نەگرتن. ھەلبەت د گەلەک واران دا مفا ژ وان رەخنەیان چێ بوون. ئێدی پەکەکە ب خوە نەما ئینکار بکەت کو ئەو د خزمەتا دەولەتێن داگیرکەران دایە.
گەلۆ ئەم وەکە مللەت، وەکە کەس و کەسایەتیێن وەلاتپارێز، وەکە نڤیسکار و رەوشەنبیرێن کورد ئێدی بەرێ رەخنەیێن خوەیێن چێکەر بدن پارتیێن خوە یێن دبێژنە خوە ئەم کوردستانی نە، باشتر نینە؟
ئەز باوەرم ب رەخنەیێن چێکەر ئەم دێ ب ھەڤرە ھەول بدن و زۆرێ بدن وان پارتیێن خوە دا کو ئەو ژی ب ھەڤرە تەمسیلەکا کوردستانی د بن سەیوانەکا نەتەوەیی دە ئاڤا بکن.
دەما ئەم ل دیرۆکا کوردان دنێرین کو چاند و کولتورا یەکتی و ب ھەڤرەکارکرنا وان چ جاران پێک نەھاتیە. لۆما ژی نکارن خوە و وەلاتێ خوە کوردستانێ ئازاد بکن.
بەلاڤبوون و پەرچەبوونا ناڤا مالا کوردان، دبە سەدەما ژ ھەڤدوخستنا کوردان. دبە قەلسی و لاوازیا پارتیێن سیاسی کو نکارن ببن ئەلتەرناتیفەکێ کوردستانی.
بالا خوە بدنێ؛ دەما ئیمپاراتۆریا عۆسمانی ھلوەشیا ھەما بێژن ژ بلی کوردان ھەمی مللەتێن کۆلۆنیا وان بوون، گھشتن مافێ خوە یێ رەوا.
لێ ژ بەر کو وێ دەمێ ئاغا، سەرۆک عەشیر و مالباتێن کورد یێن مەزن نە ل ھەڤ بوون، یەکتیا خوە نە خولقاندن، کورد ھەر مان کۆلۆنی و ڤێ جارێ کەتن بن دەستێ ترکان.
گەلەک سەرھلدان و بەرخوەدان ل ھەمبەر کۆمارا ترک پێک ھاتن، لێ یەک ژی ب سەرنەکەت. ژ بەر کو یەکتیەک نەتەوەیی د ناڤا کوردان دە تونەبوو. لۆما ژی ھەر سەرھلدانەک ل ھەرێما خوە سەرھلدا و ب وی ئاوایی ژی تێک چوو. پشتی تێکچوونێ ژی چ ھات سەرێ وان ئەم دزانین ئانگۆ دهێتە زانین.
ئیرۆ ژی رەوشا مە کوردان ژ دەمێن بەرێ نە جوودایە. ھەر چقاسی ھەردو دەم ژ ھەڤدو نە دوور بن ژی. لێ فەرقەک گرینگ ئەوە کو د وێ دەمێ دە سەرۆک عەشیر، ئاغا و مالمەزنێن مە نەبوونە یەک، ھەمیان ب ھەڤرە وەندا کرن. لێ ئیرۆ ژی پارتیێن مەیێن کوردستانی نکارن ب ھەڤرە نوونەراتیەکا کوردستانی پێک بینن، ب ڤی ئاوایی ئەو ژی دێ تێک چن.
ئیرۆ ژی ھەمان تشت دوبارە دبن. د وێ دەمێ دە چاوا ئەم کورد نەبوون یەک و مە ھەمیان ب ھەڤرە وەندا کرن. نھا ژی ژ بەر پارتیێن مەیێن کوردستانی نکارن ب ھەڤرە یەکتیەکا نەتەوەیی ئاڤا بکن، ئەم وەکە مللەتێ کورد ھەمی ب ھەڤرە وەندا دکن.
دڤێت ئەم ھەمی ب ھەڤرە کار بکین کو سیستەما نەیەکرێزیا ناڤا مالا کورد ھلوەشینن. ھەتا کو ئەو سیستەم نەیێ ھلوەشاندن، چ یەکیتی و یەکرێزیا ناڤا مالا کورد پێک نایێ.
ھلوەشاندنا وێ سیستەمێ، گوھداریکرنا رەوشەنبیر و نڤیسکارێن کوردە. یێن دەستھلاتان دگوھرن، زالمان تێک دبن، یەکتی و یەکرێزیا گەلان، ل گۆر تێبینی و پێشنیارێن خوە یێن چێکەر رەوشەنبیر و نڤیسکار پێکتینن. لۆما ژی دڤێت ئێدی پارتیێن مە وان گوھداری بکن، رەخنە و پێشنیارێن وان بگرن بەر چاڤان دا کو ئەم ب ھەڤرا ژ ڤێ تەڤلیھەڤیێ ئازاد ببن.
ژ بەر ڤێیە دڤێت ئەم ب یەک دەنگی و ل سەر ئەساسێ چێکەر بکاربین پارتیێن خوە یێن کوردستانی، سەرۆک و کادرێن وان ژی رەخنە بکین، کێماسی و شاشیێن وان ب ئاوایەکی مەعقوول بنڤیسینین کو وان نێزیکی ھەڤ بکین.
چارەسەریا پرسگرێکا گەلێ کورد ل باکورێ کوردستانێ تەنھا د یەکتی و یەکرێزیا ناڤا مالا وان دە دەرباس دبە. ژ بۆنا پێکانینا وێ ژی کار و خەبات لازمە.
