په‌كه‌كه‌یا هلوه‌شیایی: ئەگەر ئۆجالان یاسایا چارچۆڤەیێ برێڤە نه‌به‌، نایێ جیبجیکرن

رێخستنا په‌كه‌كه‌یا هلوه‌شیایی كو ناڤێ خوه‌ كرییه‌ رێڤەبەریا تەڤگەرا ئاپۆیی دەربارێ “قانوونا چارچۆڤەیی” یا کو د رۆژەڤا پارلامەنتۆیا ترکیەیێ دە یە، دیار کر کو قانوون خوەدی کێماسیێن جدییە و دەستنیشان کر کو ھەتا مەرجێن ئازاد یێن ژیان و کارکرنێ ژ بۆ عه‌بدوللا ئۆجالان نەیێن ئافراندن، ئەڤ قانوون نابە بەرسڤا چارەسەریێ.

په‌كه‌كه‌یا هلوه‌شیایی تێکلداری گەشەدانێن داوی یێن دەربارێ “قانوونا چارچۆڤەیی” دە داخویانیەکە نڤیسکی وەشاند. د داخویانیێ دە ھات دیارکرن، ئەڤ قانوون تەڤی کێماسیێن خوە یێن بنگەھین وەکی “دەستپێکەکێ” دکارە وەرە دیتن، لێ بەلێ بێیی میسیۆنا سەرکێشیێ یا عه‌بدوللا ئۆجالان، پێڤاژۆیەکە راست و ماییندە نە پێکانە.

زمانێ قانوونێ نە زمانێ ئاشتیێ یە

په‌كه‌كێ بال کشاند سەر زمانێ قانوونێ و گۆت: “زمانێ قانوونەکە کۆکێ یا کو ئاشتیێ ژ خوە رە دکە ئارمانج دڤێ نە زمانێ شەر بە، دڤێ زمانێ ئاشتیێ بە.” رێڤەبەریێ رەخنە گرت ژی کو د ئامادەکرنا قانوونێ دە، حەساسیەتێن ئالییان نەھاتنە گرتن و قانوون د چارچۆڤەیەکە تەنگ و ژ رێزێ دە ھاتیە ھشتن کو ئەڤ یەک خزمەتێ ژ پاشەرۆژا ئاشتیێ رە ناکە.

د داخویانیێ دە ھات ببیرخستن کو عه‌بدوللا ئۆجالان ب بانگا 27ێ سباتا 2025ێ نەخشەرێیا ڤەگوھەستنا شەر بەر ب زەمینەکی حقووقی و سیاسی ڤە ب زەلالی دانیە، ل سەر ڤێ بنگەھێ سال و نیڤەکە شەر ھاتیە سەکناندن، لێ بەلێ دەولەتێ ھین گاڤێن قانوونی یێن پێویست نەئاڤێتنە.

رۆلا کۆردیناتۆریێ و ئازادییا ئۆجالان

دەربارێ رۆلا عه‌بدوللا ئۆجالان دە، رێڤەبەریا په‌كه‌كه‌یا هلوه‌شیایی دەستنیشان کر کو رایەدارێن ئاک پارتی-مه‌هه‌پێ ئەڤ پێڤاژۆ وەکی “پۆلیتیکایەکە دەولەتێ” پێناسە کرنە و دەڤلەت باھچەلی ب خوە بەھسا رۆلا ئۆجالان یا وەکی “کۆردیناتۆرێ سیاسیبوونێ و پێڤاژۆیا ئاشتیێ” کرییە.

لێ بەلێ د داخویانیێ دە ھات گۆتن کو رۆلا کو “ئۆجالان د ڤێ پێڤاژۆیێ دە پێ رابە، د قانوونا چارچۆڤەیێ دە نەھاتیە دیارکرن، ئەگەر ئۆجالان نکاربە د ناڤا مەرجێن ئازاد یێن ژیان و کارکرنێ دە کۆردیناتۆریێ ژ ڤێ دەستەیێ رە بکە، گەلەک خوسووسێن کو قانوون دیار دکە دێ پێک نەیێ”.

په‌كه‌كێ تەکەز کر، تەنێ ب رێڤەبرنا یەکسەر یا عه‌بدوللا ئۆجالان و ب ئازادییا وی، گاڤێن د قانوونێ دە ھاتنە دیارکرن دکارن بکەڤن مەریەتێ.

کێماسیێن د ناڤەرۆکا قانوونێ دە

رێڤەبەریێ دیار کر، د ناڤا قانوونێ دە شاشتی و کێماسیێن جدی ھەنە و گۆت: “بێیی بکارئانینا تێگەھا کورد، ڤەگۆتنا بێچەکبوونێ نیشان ددە کو پرسگرێک ب رەنگەکی ھەڤگرتی نەھاتیە نرخاندن. ئەڤ زمان، زمانەکی وەلێ یە کو گەلێ مە و تەڤگەرا مە نکارە قەبوول بکە”.

ھەروھا ھات دەستنیشانکرن، ئەگەر ئازادییا فکری و رێخستنبوونێ نەیێ مسۆگەرکرن، داخوازا “بێچەکبوونا گەریلا” نە ریالیستە. په‌كه‌كێ گۆت، ئەگەر سیاسەتمەدار و گەریلا د ڤەگەرا خوە دە ب گرتن و سووجدارکرنێ رە روو ب روو بمینن، دێ ئەڤ قانوون ژ ئارمانجا خوە دوور بکەڤە.

د داویا داخویانیێ دە ھات دیارکرن کو ئەڤ قانوون دڤێ ببە “دەستپێکەک” ژ بۆ پێشکەتنێن دەمۆکراتیکێن مەزنتر. رێڤەبەرییا تەڤگەرێ بانگ ل گەلێ کورد و ھەموو ھێزێن دەمۆکراسیێ کر کو ژ بۆ چارەسەرییا پرسا کورد و دەمۆکراتیکبوونا ترکیەیێ تێکۆشینا خوە و رێخستنبوونا خوە مەزن بکن، دا کو ئەڤ قانوون ببە خوەدی رۆلەکە راستین یا “چارچۆڤەیی.”