پێڤاژۆیا ھلوەشاندنا رێخستنا په‌كه‌كێ یا شنگالێ یه‌به‌شێ، و تەڤلیبوونا وێ یا ب ئارتێشا ئیراقێ رە، ئیرۆ ب مەراسیمەکێ فەرمی بوو.
پاشەرۆژا رێخستنا په‌كه‌كێ یا شنگالێ، یه‌به‌شێ، دەمەک درێژ بوو کو دھات نیقاشکرن. د 30ێ ئیلۆنێ دە، عه‌بدوللا ئۆجالان پەیامەک شاند و داخوازا پێکئانینا “مۆدێلا ترکیه‌یێ ل شنگالێ” و ڤەگوھه‌ستنا شنگالێ بۆ ئیراقێ کر.
ل سەر ته‌علیماتێن ئۆجالان، پێڤاژۆیا ڤەگوھەستنا شنگالێ بۆ ئیراقێ لەزتر بوو. ئیرۆ، 26ێ جۆتمه‌ها 2026ێ، ھێزێن ل شنگالێ ب مەراسیمەکێ ب فەرمی رادەستی ئیراقێ ھاتن کرن.
د مەراسیمێ دە، کو سروودا نەتەوەیی یا ئیراقێ و ئالا وێ ھاتن بلندکرن، یەک نیشان ئان سەمبۆلا کوردان تونە بوو. کەچێن پچووک، کو ئالایێن ئیراقێ دانە وان، گول ل ئارتێشا ئیراقێ بەلاڤ کرن. د جھ دە پشتی مەراسیمێ، تونێلێن کو ب سالان ل چیایێن شنگالێ ھاتبوون کۆلاندن رادەستی ئارتێشا ئیراقێ ھاتن کرن. ئارتێشا ئیراقێ ئالا ئیراقێ ل سەر بنگەھێن تونێلان بلند کرن و رۆژنامەڤان و نوونەرێن مەدیایێ د تونێلان دا د گه‌ریان.
شەرتێن پەیمانێ نە دیارن
د مەراسیما فەرمی دە، ئارتێشا ئیراقێ و یه‌به‌شێ دو داخویانیێن جودا خوەندن. ھەر چەند ھەر دو داخویانیان بەحسا ئیراقەک بھێز و رێزکنامەیا مافێن ئێزدییان کرن ژی، لێ چارەنووسا ھێزێن لەشکەری ب زەلالی نەھات دیارکرن.
داخویانیا یه‌به‌شێ نیشان دا کو 4،165 شەرڤان تەڤلی پەرگالا ئەولەھیا فەدەرالا ئیراقێ بوونە. د داخویانیێ دە ھەر وھا ھەڤۆکا “ھێزێن مە دێ د ناڤ پەرگالا ئەولەھییا فەدەرال دە وەرن ئەنتەگرەکرن و چەک دێ د بن کۆنترۆلا دەولەتێ دە وەرن دانین” ژی ھەبوو.
ل گۆری مەدیایا ئیراقێ، %90ێ ھێزێن یه‌به‌شێ دێ ب حەشدا شەعبی (ھێزێن سەفەربەرییا گەل) ڤە گرێدایی بن. گرێدانا یه‌به‌شێ ب حه‌شدا شەعبی ڤه، کو ئامه‌ریكایێ زەخت لێ کرییە کو وەرە ھلوەشاندن، وەکی نیشانەک تێ دیتن کو پێڤاژۆ بەر ب جھەکی تاری ڤە دچە.
خەلکێ شنگالێ ژی ژ ڤێ یەکبوونێ پر ب فکارن. چاڤکانیێن ھەرێمی دبێژن کو ھن کەس د جڤاکێ دە ب ئاوایەکی نه‌رێنی ل ھەمبەر پێڤاژۆیێ بەرتەک نیشان ددن، و ژ بەر ڤێ یەکێ شەرتێن پەیمانێ ب تەڤاھی نەھاتنە ئەشکەرە کرن.
ل گۆری چاڤکانیان، پەیمان ب تەڤاھی د بەرژەوەندییا کوردێن ئێزیدی دە یە و ب ئاوایەکی ھاتییە سازکرن کو ب دەمێ رە، کوردێن ئێزیدی ب ئاوایەکی فەردی تەڤلی ئارتێشا ئیراقێ بکە.
ترکیە و باندۆرا ئۆجالان
پشتی کو عه‌بدوللا ئۆجالان د سباتا 2025ان دە په‌كه‌كه ھلوەشاندی، په‌كه‌كێ ب ئاوایەکی ھەموو چەکێن خوە رادەستی ئاڤاھیێن ناڤەندی کر. دەما کو هه‌سه‌ده ل رۆژئاڤا ھاتە ھلوەشاندن و ب شامێ ڤە ھاتە گرێدان، پێڤاژۆیەک وسا ل شنگالێ ژی ھاتە مەشاندن. وەکی دن، په‌كه‌كێ ھەموو مەقام و تونەلێن خوەیێن ل سەر سینۆرێ باشوورێ کوردستانێ رادەستی ئارتێشا ترکیەیێ کرییە.
