ل ترکیا قەدەغە و سنۆردارکرنا سۆسیال مەدیایێ دەستپێکر

ل ترکیێ قەدەغە و سنۆردارکرنا ل سەر تۆرێن جڤاکی (سۆسیال مەدیا)یێن ناڤنەتەوی دەستپێکر. د ڤێ چارچۆڤەیێ دا بۆ تۆرێن کو نوونەرێن خوە بۆ ترکیێ  دانەمەزراندینە ھەم سزایێ پارە ھەم ژی سزایێن وەکی ئاستەنگکرنا بکارئانینا ئینتەرنەتێ دهێتە سەپاندن.

ئەڤ مژار ل پارلەمانێ ترکیێ دا ژی د ناڤبەرا دەستھلات و ئۆپۆزیسیۆنێ دا بوو سەدەما کارڤەدان و نیقاشێن تووند. دەستھلات ل سەر ڤان کریارێن خوە ب بریارە و ئیدیعا دکەت کو ترکیا دێ ب ڤان گاڤان د وارێ تەکنۆلۆژیا دیجیتال دا بیتە وەلاتەکێ سیبەر.

پارلامەنتەرێ ئاکەپێ یێ بالکەسیرێ موستافا جانبەی دا زانین کو هێژان ژی تۆرێن کو بریارێن راگرتنا وان نەهاتیە بجهئینان هەنە. ھەروھا جانبەی ل سەر ڤێ مەسەلەیێ داخوازا پشتگریا ئۆپۆزیسیۆنێ ژی کر و گۆت: بۆ ڤەکرنا نوونەراتیێن یاسایی ل ترکیێ شەرت گونجاون.

جانبەی ژ بۆ کوردستان24ێ دبێژیت؛ “پڕانیا پلاتفۆرمێن دیجیتال پشتی کو 30 ملیۆن لیرە سزایێ پارە ژ بۆ ھاتنە بڕین یەکجار نوونەرێن خوە شاندن ترکیێ. ئەڤ یەک ژی گرینگیا سیاسەتێن مە یێن خوەجھی و نەتەوی تێخیتە پێش چاڤان. ئەم د ڤی واری دا ژ ئۆپۆزیسیۆنێ داخواز دکەین کو نێزیکبوونەکا باشتر نیشانی ڤان بریار و گاڤێن مە بدەن.”

پشتی فشارا دەستھلاتێ یا ل سەر تۆرێن جڤاکی یێن ناڤ نەتەوی ژ ئالیێ ئۆپۆزیسیۆنێ ڤە وەکی گاڤەکا دی یا سانسوورێ ھاتبوو نرخاندن. جیگرێ سەرۆکاتیا کۆما جەهەپێ ئۆزگور ئۆزەل ل سەر ڤێ مژارێ ئیدیعا کر کو؛ دەستھلات دخوازیت وەلاتی ژ ڤان تۆرێن جڤاکی دوور بکەڤن و تۆرێن کو ل ژێر دەستێ دەستھلاتێ نە بکاربینن لەوما ھەول ددەت کو ڤان تۆران ئاستەنگ بکەن.

جیگرێ سەرۆکاتیا کۆما جەهەپێ ئۆزگور ئۆزەل  دبێژیت؛ “داخوازا دەستھلاتێ ئەوە کو ڤان تۆرێن ناڤ دەولەتی ئاستەنگ بکەت و ب ڤان فشاران وان ژ ترکیێ دەربێخیت. ھەروھا پشتی ڤێ یەکێ ژی دێ تۆرێن ل ژێر حوکمێ خوە ل سەر وەلاتیان فەرز کەن دا کو بشێن ھەموو ئاگاھیێن وەلاتیان ب دەست خوە بێخن و ل گۆر دلێ خوە بکاربینن.”

ل ترکیێ ھشیاریا بۆ دانانا نوونەرێن تۆرێن جڤاکی د 19ێ رێبەندانێ دا ب داوی بووبوو. بۆ تۆرێن کو نوونەرێن خوە دیار نەکرنە 40 ملیۆن لیرە سزایێ پارە ھاتبوو بڕین و ھەروھا نھا ژی بۆ تۆرێن کو بریارێ ب جھ نەئینن دێ قەدەغەیا دەستیری وەرگرتنێ هێتە سەپاندن. وەکی دی بۆ تۆرێن کو ڤان بریاران ب جھ نەئینن پشتی 3 مەھان لەزا ئینتەرنەتێ 50٪ دێ هێتە کێمکرن و پاشێ ژی ژ 90٪ دێ هێتە کێمکرن.