یەکینەیێن بەرخوەدانا شەنگالێ (یەبەشێ) دو رۆژان بەرێ (26ێ جۆتمەھا 2026ێ) د مەراسیمەکێ دە وەک بەشەک ژ هێزێن ئەولەھیا ئیراقێ تەڤلی حەشدا شەعبی بوون. وەزارەتا پاراستنێ یا نەتەوەیی یا ترکیەیێ ئیرۆ دەربارێ ئەنتەگرەبوونێ دە داخویانیەک دا، کو ئەڤ یەک ژ ئالیێ جڤاکا کورد ڤە راستی رەخنەیێن توند ھات. د داخویانیێ دە وھا ھات گۆتن: “ئەم پێشوازیا گاڤێن بەر ب ئاساییبوونێ ڤە ل ھەرێمێ دکن.” ھەر وھا ھات دەستنیشانکرن کو رەوشا ل شەنگالێ بەشەک ژ پێڤاژۆیا ئاڤاکرنا “ھەرێمەکا بێتەرۆر”ە.
جڤینا چاپەمەنیێ یا ھەفتانە یا وەزارەتا پاراستنا نەتەوەیی یا ترکیێ ئیرۆ (28ێ جۆتمەھا 2026ێ) هات ئەنجامدایین. پشتی جڤینێ، بەرپرسێن وەزارەتێ بەرسڤا پرسێن چاپەمەنیێ دان و نرخاندنەک ل سەر رەوشا داوی یا ل شەنگالێ پێشکێش کرن.
د جڤینێ دە، کو ھەروھا گاڤێن ژ ئالیێ حکوومەتا ناڤەندی یا ئیراقێ ڤە ژ بۆ ئاڤاکرنا دەستھلاتا دەولەتێ ل شەنگالێ ھاتبوون ئاڤێتن ھاتن نرخاندن، ھات دەستنیشانکرن کو پێنگاڤێن بەر ب ئاساییبوونێ ڤە ل ھەرێمێ ھاتنە پێشوازیکرن.
د داخویانیێ دە هەر وھا ھات گۆتن: “ژ ھۆلێ راکرنا ھەبوونا رێخستنێن تەرۆریست ل ھەرێمێ و دابینکرنا ئەولەھیێ ژ ئالیێ ھێزێن ئەولەھیێ یێن فەرمی یێن ئیراقێ ڤە، ژ بۆ ئاڤاکرنا ئاشتیەکا ماییندە و ئارامیێ ل شەنگالێ و گھیشتنا ئارمانجا ھەرێمەکا بێ تەرۆریست، پێشکەتنەکا گرینگە. ئەڤ پێڤاژۆ ب سەرپەرشتییا سازیێن پەیوەندیدار یێن دەولەتا مە ژ نێزیک ڤە دهێتە شۆپاندن.”
پشتی بریارا عەبدوللاھ ئۆجالان یا د 25ێ سباتا 2025ێ دە یا ژ بۆ حەلاندنا پەکەکێ و دەستپێکرنا پێڤاژۆیا دانینا چەکان، یەکینەیێن چەکدار یێن پەکەکێ ل ھەرێمێن جودا یەک ب یەک چەکێن خوە دانین و تەڤلی حکوومەتێن ناڤەندی بوون. وەکی پێنگاڤا یەکەما ڤێ پێڤاژۆیێ، ھێزێن ھەسەدێ یێن ل رۆژئاڤا خستبوون بن دەستھلاتا رێڤەبەریا شامێ. پشتی پەیمانا کو د سباتا 2026ێ دە ھات ئیمزەکرن، ھێزێن ھەسەدێ یێن کو ھەژمارا وان نێزیکی 40.000 چەکداران بوو، ھاتن بەلاڤکرن، و دبستان، سازی، دەریێن سینۆر و بیرێن پەترۆلێ رادەستی حکوومەتا ناڤەندی یا سووریەیێ ھاتن کرن. ترکیەیێ ژی ب ‘رازیبوونێ’ پێشوازیا رەوشا ل رۆژئاڤایێ کر و دیار کر کو ئەوێ گەشەدانێن ل سەر ئەردێ بشۆپینە.
ھلوەشاندنا یەبەشێ، رێخستنا پەکەکێ یا ل شنگالێ، ژی وەکی بەرھەما ھەمان رۆژەڤا ھلوەشاندنا ھەسەدێ تێ حەسباندن. ھلوەشاندنا یەبەشێ نە رێکەفتنەک بوو کو ژ ھێلا کوردێن ئێزدی ڤە ب ئاوایەکی سەربخوە ھاتبە کرن، بەلکو ئۆپەراسیۆنەک ھەڤبەش بوو کو ژ ھێلا دەولەتا ترکیێ و عەبدوللاھ ئۆجالان، رێبەرێ پەکەکێ یێ ل ئیمرالیێ، ب بەشداریا ئیراقێ ھاتیە ئەنجامدان. ھەم چاڤکانیێن پەکەکێ و ھەم ژی یێن دەولەتا ترکیێ دەستنیشان دکن کو پێڤاژۆ ژ لایێ سەرۆکێ رێخستنا ئیستیخباراتا نەتەوەیی یا ترکیێ (میت)، ئیبراھیم کالن ڤە ھاتیە رێڤەبرن.
تێ گۆتن کو سەرۆکێ رێخستنا ئیستخباراتا نەتەوەیی یا ترکیەیێ (میتێ) ئیبراھیم کالن د سەرەدانا خوە یا مەھا تیرمەھێ بۆ بەغدایێ، پلان و نێرینێن ترکیەیێ یێن ل سەر چاوانیا پێشڤەبرنا پێڤاژۆیێ لگەل رایەدارێن ئیراقی پارڤە کربوون و د ڤێ جڤینێ دە شێوەیێ داوی ھاتبوو دیارکرن. پشترە کالن چوو سلێمانیێ و لگەل رێڤەبەرێن پەکەکێ یێن ل ور جڤیا دا کو بریارێن خوە یێن دەربارێ شەنگال و یەبەشێ (یەکینەیێن بەرخوەدانا شەنگال) دە ژ وان رە راگھینە. ب راستی، پێڤاژۆیا ئەنتەگراسیۆنا یەبەشێ بۆ ئیراقێ پشتی ڤێ جڤینێ دەست پێ کر.
