حكوومه‌تا ئه‌فغانستانێ و تالیبان پێڤاژۆیا ئاشتیێ ده‌ستپێكرن

نەتەوەیێن یەکبوویی راگه‌ھاند، کۆنفرانسا تایبەت ب ئاشتییا ئەفغانستانێ ب بەشدارییا نوونەرێن حکوومەتا ئەفغانستانێ و نوونەر و سەرکردەیێن تەڤگەرا تالیبانێ ل رۆژا 24ێ نیسانێ ل باژارێ ستەنبۆلێ یێ ترکیێ تێ سازکرن.

ل گۆر داخویانییا نەتەوەیێن یەکبوویی، ھەردوو وەلاتێن ترکیە و قەتەر بەشداری کۆنفرانسێ دبن و نەتەوەیێن یەکبوویی سەرپەرشتییا کۆنفرانسێ و كۆمبوونێن نوونەرێن ئەفغانستان و تالیبانێ دکەت.

بەردەڤکێ سكرتێرێ گشتی یێ نەتەوەیێن یەکبوویی ستیڤن دوجاریك دبێژیت: كۆنفرانس دێ كۆنفرانسەکێ بەرفرەھ بیت و د ئاستا بلند دا، ترکیە وەک مێهڤاندارێ كۆنفرانسێ بەشداره‌، ھەروه‌ھا قەتەر ژی کو بەرێ مێهڤاندارییا كۆمبوونێن تالیبان و ئەفغانستانی کرییە دێ به‌شداری كۆنفرانسێ بیت و نەتەوەیێن یەکبوویی ژی سەرپەرشتییا كۆمبوونێن ناڤبەرا نوونەرێن حکوومەت و تالیبانێ دكه‌ت.

دوجاریك دیار کر، ئارمانج ئارامییا ئەفغانستانێ یە داکو دانوستاندنێن ناڤبەرا تالیبانێ و ئەفغانستانێ بگه‌هن ئەنجامەکێ.

هه‌روه‌ها گۆت: ئارمانجا كۆنفرانسێ ستەنبۆلێ بۆ ئاشتییا ئەفغانستانێ، تەمامکرنا کارێن دانوستاندنێن ده‌وحه‌نه‌ بۆ ب دەست خستنا ئارامییا سیاسی.