سەرۆککۆمارێ ترکیەیێ رەجەب تەییب ئەردۆگان راگھاند کو بریارا ھلوەشاندنا ھێزێن سووریەیا دەمۆکراتیک (ھەسەدێ) و تێکەلکرنا وان د ناڤا هێزێن سووریێ، دێ ببە دەستپێکا سەردەمەکێ نوو بۆ ئاڤاکرنا ئارامیا بەردەوام ل سەرانسەرێ ھەرێمێ. ئەردۆگان تەکەز کر کو دڤێت سەردەما چەک، توندووتیژی و تەرۆرێ ب یەکجاری ب داوی ببە.
ئەردۆگان د دەما ڤەگەرا خوە یا ژ لووتکەیا رێخستنا ھەڤکاریێ یا شانغایێ کو ل قرقیزستانێ ھاتبوو لدارخستن، ژ بۆ رۆژنامەڤانان ئاخڤی و پێشوازی ل بریارا ھلوەشاندنا ھەسەدێ کر. سەرۆککۆمارێ ترکیەیێ دیار کر کو سازیێن پێوەندیدارێن وەلاتێ وی لگەل ئالیێ سووریەیی ل سەر سینۆری ب ھووری چاڤدێریا پێڤاژۆیا جێبەجێکرنا ڤێ بریارێ دکن.
د بەردەوامیا ئاخافتنا خوە دە، ئەردۆگان ئانی زمان کو واشنتۆنێ ئێدی ب راستیا رەوشا ل سووریەیێ گھشتیە. وی بانگا ھەڤکاریێ ل ھەموو وەلاتێن جیران و دۆست کر کو د پرۆسەیا ژ نوو ڤە ئاڤاکرنا سووریەیێ دە ببن ئالیکار، دا کو رێ ل بەر ئالۆزی و تێکدانا ئاشتیا ناڤخوەیی یا وی وەلاتی بێتە گرتن.
دەربارێ گەشەدانێن سیاسی و پرۆسەیا ئاشتیێ یا ل ترکیەیێ دە، ئەردۆگان رۆنی کر کو پرۆسە پێنگاڤ ب پێنگاڤ بەر ب پێش ڤە دچە. وی دیار کر کو ژ بەر تایبەتمەندییا مژارێ نابت کو بەرنامەیەکا دەمکی یا سینۆردار ژ بۆ بێتە دانین، لێ تەکەز کر کو نەخشەرێیا دەولەتێ یا زەلال ھەیە و کۆمیسیۆنا شۆپاندنێ ب سەرۆکاتیا جیگرێ سەرۆککۆمار جەودەت یلماز دەست ب کارێن خوەیێن فەرمی کریە.
سەرۆککۆمارێ ترکیەیێ دەستنیشان کر کو مەرجێ سەرەکی بۆ بجھانینا چارچۆڤەیا قانوونی ئەوە کو ئالیێ بەرامبەر ب ئاوایەکی کریاری چەکان دەینە و خوە ھلوەشینە. ئەردۆگان ھشیاری دا کو پرۆسەیەکا ب ڤی رەنگی نابە کو زێدە بێتە دەرەنگخستن، دا کو نەکەڤیتە بن باندۆر و زرارێن ھەولدانێن تێکدەرانە.
د بەشەکا دن یا گۆتنێن خوە دە، ئەردۆگان بال کشاند سەر گرینگیا بھێزکرنا “ئەنیا ناڤخوەیی” و گۆت کو ئەڤ پێنگاڤ نە ب واتەیا گوھنەدانا جوداھیانە، بەلکی یەکگرتنا جڤاکێیە د چارچۆڤەیا “لھەڤکرنا مەزنا ترکیەیێ” دە. سەرۆککۆمارێ ترکیەیێ ھەر وھا ھشیاری دا ھەر جوورە گۆتارێن توند یێن سیاسی کو زەرارێ ددن یەکرێزی و براتیا جڤاکی، و دیار کر کو جڤاک ھشیارە و ناکەڤە تۆرا هاندانێن ب ڤی رەنگی.
