سەرۆککۆمارێ ترکیەیێ رەجە تەییب ئەردۆگان تەکەز کر کو “ھەڤپەیمانیا مەکەیێ” پێنگاڤەکا ستراتەژیک و گرنگە بۆ بجھانینا ئاشتی، ئەولەھی و تەناھیێ ل سەر ئاستا ھەرێمی و ناڤدەولەتی.
ئەردۆگان د ئاخافتنەکا خوە دە ئاماژە ب گرنگیا ڤێ هەڤپەیمانیێ کر و راگھاند: “ھەڤپەیمانیا مەکەیێ بۆ بەرەڤانیا ھەڤپار، کو ل سەر بنگەھا خوەدیدەرکەتنا ھەرێمی و بەرسڤدانا بکۆم ھاتیە ئاڤاکرن، ھەڤکاریەکا گرنگ و کاریگەر پێشکێشی بجھانینا ئاشتی و ئارامیا ل ھەرێمێ و جیھانێ دکە.”
د داخویانیەکا ھەڤپار دە کو ژ ئالیێ کۆمیسیۆنا ستراتەژی یا سیاسی و بەرەڤانیێ یا لھەڤکرنا مەکەیێ ڤە ھاتبوو بەلاڤکرن، ھات دیار کرن کو ھەر سێ وەلاتێن ئەندام “عەرەبستانا سوودی، پاکستان و ترکیە” ب رێیا چالاکیێن ھەڤپار دخەبتن بۆ بھێزکرنا شیانێن خوەیێن بەرەڤانیێ و یەکیتیا ھێزێن خوەیێن چەکدار. ئەڤ ھەڤکاریا لەشکەری ل سەر بنگەھا بپێشخستنا پیشەسازیا لەشکەری، بەرھەمانینا ھەڤپار و تەڤکاریا تەکنۆلۆژیک ھاتیە ئاڤاکرن.
ھێژایی بیرخستنێیە کو ئەڤ لھەڤکرنا بەرەڤانیا ھەڤپار د 7ێ تەباخا بۆری دە ل باژارێ مەکەیێ ژ ئالیێ شاھزادەیێ جینشینێ عەرەبستانا سعوودی محەممەد بن سەلمان، سەرۆککۆمارێ ترکیەیێ رەجەب تەییب ئەردۆگان و سەرۆکوەزیرێ پاکستانێ شەھباز شەریف ڤە ھاتبوو ئیمزاکرن.
ئەڤ پەیمان د چارچۆڤەیا ھەڤکاریەکا بەرفرەھا بەرەڤانیێ دە تێ ئەنجامدان کو ئارمانجا وێ یا سەرەکی بھێزکرنا پابەندبوونا ئالیانە بۆ پاراستنا ئاشتی و ئەولەھیێ، ل سەر بنگەھا بەلاڤکرنا بەرپرسیاریان و تێگەھشتنا ھەڤپار بۆ ئەولەھیا ھەرێمی.
ل گۆری خالێن سەرەکی یێن لھەڤکرنێ، شیانێن بەرسڤدانا ھەڤپار ل ھەمبەر ھەر جورە گەشێ و ئێریشان تێن بھێزکرن. د پەیمانێ دە ب ئەشکەرەیی ھاتیە دەستنیشانکرن کو ھەر ئێریشەکا چەکداری بۆ سەر یەک ژ ڤان سێ وەلاتان، دێ وەکی ئێریشەکا راستەراست بۆ سەر ھەموو وەلاتێن ئەندام بێتە حەسباندن.
