شام-ئەنقەرە-تلئەڤیڤ: گرژیا ل سووریێ د لووتکەیێ دەیە
ئێریشێن ئەسمانی یێن داوی یێن ئیسرایلێ یێن ل سەر بارەگەھا لەشکەری یا ئەبوو ئەل-دوھورێ کو تەنێ 70 کیلۆمەتران دووری سینۆرێ ترکیێ یە، گرژیێن د ناڤبەرا ئەنقەرە، تەل ئەڤیڤ و شامێ دە گھاند ئاستەکێ نوو و گرنگ. ئەڤ گەشەدان ھەڤسەنگیێن لەشکەری یێن ل باکور و ناڤەندا سووریێ سەرووبن دکە.
سەرۆکێ مەھەپێ دەولەت باخچەلی بەرتەکەکا توند نیشانی ئێریشێن ئیسرایلێ دا و دیار کر کو ئەڤ پێنگاڤ راستەراست ئەولەھیا نەتەوەیی یا ترکیێ دخن مەترسیێ. باخچەلی بانگا راوەستاندنا ئەندامەتیا ئیسرایلێ یا د نەتەوەیێن یەکبوویی دە کر و پێشنیارا بەرفرەھکرنا پەیمانا مەکەیێ و ئاڤاکرنا “ھێزا ئاشتیێ یا ئیسلامێ” ئانی زمان.
ژ ئالیێ دن ڤە، وەزیرێ کارێن دەرڤە یێ حکوومەتا ڤەگوھێزا سووریێ ئەسعەد شەیبانی راگھاند کو ئارمانجا وان یا سەرەکی راوەستاندنا ئێریشێن ئیسرایلێیە و دەستنیشان کر کو ھێژ زوویە بەحسا لھەڤکرنەکا ستراتەژیک لگەل تەل ئەڤیڤێ بهێت کرن. شەیبانی ھەر وھا دا زانین کو پلانا ترکیێ یا ئاڤاکرنا بارەگەھەکێ دایمی ل سووریێ نینە.
سەرۆکوەزیرێ ئیسرایلێ بنیامین نەتانیاھو راستەراست بەرسڤا داخویانیێن ئەنقەرەیێ دا و راگھاند کو ھەبوونا لەشکەری یا ترکیێ یا ل سووریێ ژ بۆ وان گەفە. نەتانیاھو ھشیاری دا کو ئەو ب چ ئاوایی تەحەموول ناکن و دەستوورێ نادن کو ھێزێن لەشکەری یێن ترکیێ بەر ب باشوورێ سووریێ ڤە پێش بکەڤن.
