پەکەکە نامیلکەیەکێ ل سەر «بەرهەم سالح» وەکە سەرۆک کۆمارێ ئیراقێ، چاپ دکەت و تێدا بەرهەم سالح ب توندی رەخنە دکەت، بەرهەم سالح ژی ب رێیا یەک ژ راوێژکارێن خوە داخوازێ ژ پەکەکێ، دکەت کو رێکێ نەدەن ئەڤ نامیلکە بهێتە به‌لاڤ كرن.

چاڤکانیێن پێگەها «دارکا مازی» ئاشکەرا کرن، «سەنتەرێ ستراتەژی یێ کوردستان» کو سەنتەرەکێ چاپەمەنی و راگەهاندنێ یێ سەر ب ناڤەندا چاپەمەنی و راگەهاندنا پەکەکێ یە، نامیلکەیەک ل ژێر ناڤێ «بەرهەم سالح و حوکمێ کلیپتۆکراسی» ئانکو «بەرهەم سالح و دەسهەلاتا دز و تالانکەر» چاپ کرییە و تێدا باس ل گەندەلی و بێ هەلوەستییا بەرهەم سالح ل همبەر دۆزا کوردان ل باکورێ کوردستانێ و رۆژئاڤا دکەت.

چاڤکانیێن مە هەر وەها ئاشکەرا کرن، بەرهەم سالح ژ چەند ئالییان ڤە هەول دایە کو رێڤەبەرییا پەکەکێ رازی بکەت رێگریێ ل به‌لاڤ كرنا ڤێ نامیلکەیێ بکەن، لێ بەلێ ئەڤ هەولێن بەرهەم سالح بێ ئەنجام بوونە.

به‌رهه‌م سالح نامه‌یه‌ك ژ بۆی جه‌میل باییك هنارتییه‌ و تێدا رجا كرییه‌ رێگریێ ل به‌لاڤبوونا نامیلكه‌یێ بهێته‌ كرن

چاڤکانیێن مە تەکەز کرن، بەرهەم سالح ب رێیا یەک ژ راوێژکارێن خوە یێ ب ناڤێ «لوقمان حاجی قادر» ل باژارێ «رانیێ» پەیامەک ژ بۆی «جەمیل باییک» هەڤسەرۆکێ کەجەکێ شاندییە و تێدا داخواز ژێ کرییە رێگریێ ل به‌لاڤبوونا ڤێ نامیلکەیێ بهێته‌ كرن، ژ ئالیێ خوە ڤە «جەمیل باییک» ب رێیا «زاگرۆس هیوا» بەردەڤکێ پەکەکێ بەرسڤا بەرهەم سالح دایە و گۆتییە وی، ” کەجەکە ئاگەهداری کارەکێ ب ڤی ئاوایی نینە، هەلوەستێن کەجەکێ ب رێیا سازیێن فەرمی دهێنه‌ راگهاندن، لێ ئەم دێ دیڤچوونا ڤێ بابەتی کەین”.

هێژایی گۆتنێ یە ئەڤ نامیلکە کو تێدا باس ل گەندەلی، دزی و بێ هەلوەستییا بەرهەم سالح همبه‌ری دۆزا کوردان دهێتە کرن ژ ئالیێ «ئاراس تاهر» هاتییە نڤیساندن و هەتا نها کەجەکێ هیچ فەرمانەک ژ بۆی رێگریکرن ژ به‌لاڤبوونا ڤێ نامیلکەیێ دەرنەکرییە و دهێتە چاڤەرێکرن د دەمەک نێزیک دا بهێتە به‌لاڤ كرن، هەروەها بەشەک ژ ڤێ نامیلکەیێ د مالپەرێ «کوردستان پۆست» دا کو پەکەکە پشتەڤانییا وێ دکەت، هاتییە به‌لاڤ كرن.